top of page

“ECHAR İ NO DURMİR, ASPERAR İ NO VİNİR, AZER İ NO AGRADESER”


(Teksto-Audio)

(Yazarı sesli dinlemek için tıklayınız)





Por siguro ke es muy djusta esta dicha.

Para mi echar i no durmir es lo mas mal. De unos kuantos anyos para aki, el esfuenyo de la noche no lo tengo muy famozo. Afilu ke me echo byen tadre, yene me alevanto demanyana muy demprano i si durmi 4 o 5 oras sin espertarme digo Baruh Aşem.


(ya lo se ke estash diziendo esto es vejes, si, ya lo se muy byen).

Es kuryozo, agora ke no tengo responsabilita de mandar ijos a la eskola i aparejar dezayuno, me esperto sin alarm demanyana matrana. Akeos tyempos, me akodro entre los dos servises ke vinian a tomar a los ijos para yevarlos a la eskola, aviya 6 puntos de tiempo libero ansi yo por 6 puntos me echava de muevo i me durmiya. Kijo dizir esto es la vida.


Demanyana me alevanti kon yugo ke me va ir a ver a mi inyeto el chiko. Tomi el kafe ke uzo, me visti, el tyempo esta maraviyozo, mi elmuera me disho andavos al park…

Sali a kamino apenas paso 5 puntos empesa una luvya, se estan avyendo los syelos. Asperando el otobus dyeron anonso ke el otobus se bozdeo en kamino , manko de una ora no pode vinir un otro. Pensi kon esta luvya tomare un taksi , ande ni un taksi no ay por semejansa, todos yenos i no me estan tomando. Alora dishe tomare la araba(koche) torni a kaza avri la chanta… komo no iva tomar la araba no tomi la yave. Suvi a kaza avri la chanta, no pode ser, me olvidi de tomar la yave de kaza. Abashi ande la vizina ke tyene mi yave, sono sono no ay dingunos. De muevo sali a kamino zar zor (kon difikulta) ya topi un taksi, me suvi, el shofor empeso a gritar ke la araba es mueva ke le esto mojando los koltukes, ke ay trafik de vista, ke me abashe. Empesi a arogarle para ke no me abashe, le dishe la madre lavora mi inyeto va kedar soliko, kualo ay yevame. Neyse dospues de una ora ya vine ande mi ijo aryento las aguas, avri la chanta ke le va pagar, kon este telash(asigo) paras no tomi. Le dishe aspera tomare de mi ermuera te pagare, yene empeso a gritar a kifurear (mentar) en diskutyendo kon el shofor veyo ke mi inyeto se esta abokando por la ventana i me esta yamando:

-babaanne gel (granmama ven)

Ke me muera yo no, ya se va kayer. Por aki el shofor me esta maltratando por aya mi inyeto se esta abokando, mi ermuera ya vido ke vine de vista se suvyo a su araba i se fue ke ya kedo tadre al echo…

“no tabokes pasha yasto vinyendo”

Kero gritar no me esta salyendo la boz, kero piyadades dingunos no me estan vyendo …


Enduna mesperti kon una palpitasyon, aryento la sudor i el garon tomado ke kedi durmyendo en el kanape de la kamareta de asentar… Oh…Bendicho el Dyo era un mal eshuenyo ke vide… ma asibivayo el dia entero estuve kon la enfluensa de este koshmar pesgado.

Esfuenyos buenos, repozo bueno, buen purim i buenos anyos.






Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page