El premyo “Nobel judyo” se va dar a Barbra Streisand a la fin de este anyo. El butto de este premyo es onorar las selebridades judiyas por las reushitas en sus vidas. La artista i kantadora va resivir el Premio Genesis, ke se esta dando desde 2013, en rekonosimyento a sus kontribusyones en varyos kampos, inkluzo las artes i la filantropiya.
El Premyo Genesis ke se dyo en el empesijo de este anyo, para aktivistos judyos i organizasyones sin profito en Ukranya, fue la primera vez ke el premyo no se dyo a una sola persona. Agora, la fondasyon del premyo esta dando un sinyal de tornar atras a la normalidad i elijir Streisand, de 81anyos, ke servyo komo el sembolo de orgolyo para jenerasyones de mujeres i ombres. Estas jenerasyones vyeron el orgolyo de ser judiya en la personalidad de Streisand. Mas de 100 milyones de sus diskos se vendyo; sus albumes entraron al Top 40 mas munchas vezes ke kualsiker otra artista femenina; i es una de las 18 personas ke gano un EGOT: (un Emmy, un Grammy, un Oscar y un Tony).
El objetivo del premio es provokar las donasyones judiyas kreando konsiensya sovre nesesidades particulares. Streisand va dar su premyo de $ 1 milyon a kuatro grupos; protejar el meyo ambiyente, desvelopar la salud de las mujeres, kombatir kon la dezenformasyon en los medyos i ayudar a la djente de Ukranya. “En el dyezen aniversaryo del Premyo Genesis, esto muy kontente de ser onorada kon el Premyo Genesis i de lavorar kon la Fondasyon del Premyo Genesis, ayudar a las organizasyones ke miran a mejorar la sosyedad i muestra umanidad kompartida”, disho Streisand en una entrevista. “Esto muy orgoyoza de mi erensya judiya i siempre fui enfluensada de la tradisyon judiya ‘’tikkun olam’’, ke es reparar el mundo. Espero enspirar otros para konstruir un mundo mijor del de oy”.
La seremoniya ke se va azer al onor de Streisand, se va azer por primera vez en Los Angeles. Antes de este anyo, el premyo se estava dando en una seremoniya en Israel. En el pasado, el premyo se estava dando en kooporasyon kon el primer ministro israelyano. En 2018, el premyo se iva dar a Natalie Portman, ma la artista refuzo de asistir a la seremoniya para protestar los evenemyentos de akel anyo en Israel. La asosiyasyon de la fondasyon kon el primer ministro se eskapo en 2020.
Este premyo se da para onrar las selebridades por sus reushitas en sus profesyones, sus kontribusyones a la umanidad i sus fidelidades a los valores judiyas. Este premyo se da espesyalmente a una selebridad ke ekspoza i utuliza su identidad judiya publikamente. Munchos ke ganaron este premyo fueron personas ke se okupan kon artes, inkluzo los aktores Michael Douglas i Portman; el eskultor Anish Kapoor; el violinisto Itzhak Perlman; i, en 2021, el produktor de filmos Steven Spielberg.
“Su responsabilidad para sanar el mundo esta vinyendo de sus valores judiyas i su identidad judiya, ke Barbra amostro kon orgolyo desde el empesijo de su ekstraordinera karyera”, disho el fondador de la Fondasyon Premyo Genesis, Stan Polovets, en una entrevista kon Streisand. “La filantropiya innovadora de Barbra influenso munchas areas, inkluzo la salud, el medyo ambiyente i la igualdad de jenero’’.
Comments