AKAVIDO KONTRA LOS TERREMOTOS

(Teksto-Audio)

Aze mas de una semana ke el sud-este de la Turkiya i el nord-este de la Siriya fueron sujetos a muy fuertes terremotos ke kavzaron la muerte de miles i miles de umanos en sus eshuenyos. Sivdades enteras fueron destruyidas, miles de edifisyos, inkluendo mizmo ospitales, fueron derokados, un dezastro inegualado, apokaliptiko, donde 16 milyones de turkos i arabos se toparon en la natura kaji sin techo, en puro invierno.

El mundo vido kon tristesa las difikultades ke la Turkia i la Siriya enkontraron i ansi mas de 40 payizes no mankaron de mandar espesialistos para salvar lo mas posible de djente ke kedaron debasho los blokes de beton de los edifisyos ke se derrokaron. Los dezastros naturales no se arestan a las fronteras de los payizes i el ayudo de los umanos no las toma en konsiderasyon, al nombre de la umanita mizmo inimigos trayen sus apoyos. Israel bien entendido, fue uno de los 2 payizes ke mando supito sus ekipos espesialistos a la sivdad de Kahramanmaras (sh) el episentro del primer terremoto. Kon muncha difikultad los isaraelianos fueron kapaches de yegar a la sivdad visto ke todos los kaminos de la zona sinistrada estavan apenas pratikavles.

Mas de 17 aviones militar israelianos trusheron al aeroporto de Gaziantep 420 miembros del ekipaje de espesilistos de salvamyento kon un ospital de kampanya, melizinas, agua i komanya para el personel. Eyos fueron otonomos en sus lavoros i en despartes ke salvaron muncha djente en kitandola kon maestredad de las ruinas, miraron a kurar todo modo de firidos. Se vido grande rekonosensya i amistad de la parte de los otoktonos en todas las sivdades onde los israelianos intervenyeron i no se kansaron de bindizirlos sovre todo a los miembros de la Unidad Hatzalah ke fue forsada de retornar supito a Israel sin eskapar su misyon, por ke avia duvda a ke sea atakada por los terroristos arabos. Ma el lavoro de los otros va kontinuar tanto ke será demenester.

La chika komunidad djudia de Antakya (solo 14 miembros) fue ayudada por la komunidad de Estambol, i yevada a su sivdad, ma malorozamente el prezidente i su mujer peryeron sus vidas en el edifisyo en el kual bivian. Triste fin para djente de valor, renomada en la sivdad de Antakya. Ansi disparese la prezensya djudiya de 2500 anyos i su sinagoga en esta zona istorika. Grasyas a los dirijentes komunitaryos los sefertorot fueron salvados i yevados a la sinagoga de Adana.

Los terremotos de Turkiya i de la Siriya se sintieron mizmo en Israel lo ke sinyifika ke komo uma devemos ser atentivos para aparejarmos i ser prontos en kavzo de un semejante dezastro. La administrasyon responsavle del governo devra tomar todas la prekosyones menesterozas i ser dotado de un budjeto adekuado. No abasta solo de estudyar, de kartografyar las roturas de las plakas tektonikas, de trayer muevos reglamentos en las fraguas, si non de kontrolar de serka todo modo de muevo edifisyo durante su konstruksyon. Mirar de arrezyar o de renovelar los edifisyos en estado de non konformita kon los standartes. Ser siempre akavidozo i no pensar ke lo ke arrivo a otros no mos arrivera. Nunka se save kuando i komodo la tyerra tremblera. En el anyo 2016 se le prezento al Komite de defensya de la Kenesset un senario onde se demonstra ke en kavzo de un terremoto en Israel, 7000 personas muriran, 8600 se fierreran seryozamente, 28600 edifisyos se destruyeran en dando danyo a otros 290 mil edifisyos i ke 170 mil sivdadinos kedaran sin moradas. Visto esto sin ser muncho pesimisto los dirijentes aktuales devran apoyar a ke un budjeto konsisyente seya votado en serka dando la posibilita a ke muevas teknolojiyas sean inovadas lo ke mos dará la posibilita de salvarmos a justo tiempo.

En el anyo 1927 un terremoto de magnitud 6.25 donde el sentro era en el norte de la Mar Muerta kavzo sienes de muertos i donde se derrokaron en partida las sivdades de Yericho, Nablus, Hevron, Yerushalayim i mas. Serra yerrado de alvidaremos este terremoto kon el ke akontesyo en 1837 en Safed en el norte de Israel, en pensando yerrado ke son faktos istorikos ke no tienen mas un effeto sovre la situasyon aktuala. Al kontraryo devemos konsiderarlos kon atansyon i mizmo akodrarmos ke durante el sigundo Beit Amigdash, en 31 BCE de muestro tiempo, 30 mil personas muryeron a kavza ke la tyerra tremblo. Oy Israel tenyendo una povlasyon de mas de 9 milyones de indeviduos kon sivdades anchas i edifisyos altos la peryita puede suvir a serka 300 mil sivdadinos. Ademas no olvidar ke Israel se meneyo kuando a 100 kilometros al sud de Elat tuvo lugar un terremoto kon magnitud 7.23 en Novembre de 1995, al kual los responsables de akea epoka no dyeron dinguna importansa. Vino el tiempo de tomar i este aspekto danjorozo en konsiderasyon.

Es de rogar al todo poderozo de guadrarmos de ora mala semejante a la kuala los de Turkiya i los de Siriya arreyevan. No va ser fasil para estos puevlos de olvidar durante jenerasyones lo ke les afito. Es verda, mozotros umanos no podemos i no tenemos la posibilita de impedir los terremotos, ma podemos mirar kon saverisyo de prevenir los danyos ke mos kavzaran.

Yazarın tüm yazıları için tıklayınız