AGUA EN LA FİLOZOFİYA SUFİZM

La natura de la agua mos konta una filozofiya. Por egzemplyo, trayete delantre los ojos una agua ke esta koryendo abasho de la montanya. En koryendo, la agua eskoje el kamino kon el manko de reziztensya . Esto kere dizir, por egzamplyo, si sale una roka, no va luhar kon la roka, la agua va kontinuar a koryer. Enspirados de esta natura de la agua, los Sufis dizen: “No te metas kon la djente ke te keren inyervar, kon la persona ke esta djignisheyando kon ti; si lo azes, vaza kedar en el mizmo lugar. Kamina i kontinua tu kamino.

Dizeremos ke la agua ke esta koryendo de la montanya, se enkontro kon un kamino muevo i no va pueder kaminar alrededor de la roka. Akeya vez ke aze? Kon pasensya, se mete a burakar la roka. Siguramente, no es la fuerza de la agua ke la buraka, es la kontinuidad de las gotas de la agua ke buraka la roka. Esto es lo ke lo yaman pasensya. La pasensya no es, asentarse sin azer nada. "La pasensya es imajinar la roza en la espina i el diya en la noche" komo dizen los Sufis. La natura de la agua mos ambeza ke mezmo lo ke mos parese ke es emposivle se puede reushir. Por esto, se kere pasensya.

Siguramente, la agua ke burako la roka kontinua su kamino. La agua siempre korye. Ya save ke se va alimpyar si kontinua a koryer. A las vezes, ay lodo ke se akumula en los bordres de la rivyera; akeya vez la agua no puede kontinuar a koryer. Si va kedar en el mezmo lugar, la agua va empesar a enlodarse. I las personas son komo la agua. Kale ke koryan, kada diya kale renuvelarsen, kale ke se ambezen kozas muevas. Si kedan en el mezmo lugar, kedan atras, se ensuzyan komo la agua.

La agua no se espanta del trokamyento. Aunke las personas dizen ke les plaze el trokamyento, en realidad se espantan del trokamyento. Ke ermozo ke es el trokamyento de la agua! A las vezes ay luvya, a las vezes ay inyeve, a las vezes ay yelo, a las vezes ay vapor. Kuando ay vapor, la luvya suve al syelo i abasha demuevo.

La agua tambien se adapta a su muevo lugar. Kuando la vazyas a una kupa, toma la forma de la kupa; kuando la vazyas a una ridoma, tomo la forma de la ridoma. La agua se adapta a kualsiker lugar ke esta, ma su natura no troka. Las personas ke se adaptan a la natura de kualsiker payis, siempre sorbiven i siempre reushen, porke los ke se adaptan son fleksibles. Los ke rezisten el trokamyento son solidos.

La tormenta detruiza los arvoles mezmo los mas fuertes, ma no puede azer nada a las plantas porke las plantas son fleksibles. Los ke son fleksibles i ke se adaptan presto kedan bivos.

Tambien la agua se desha al koryente. Porke ya save ke a la fin va alkansar a las grandes mares i a los oseanos. Esto es komo desharse al destino duspues ke azes todo posivle

La agua es klara, transparente. Es komo su natura. Las personas, los animales, la natura tienen menester de la agua para pueder bivir. Ande ay agua, ay kozas bivas. Por modo de la estruktura de la agua, los Sufis dizen ‘Azete santo komo la agua’.