Esta semana estuve mirando las komemorasiones de la Shoa en Internet: de la Ermandad Sefaradit (Sephardic Brotherhood) en la Amerika, del Yad Vashem en Israel, de la komunidad Djudia de Estambol, i del American Sephardi Federation. Es muy emportante de akodrarmos, de komemorar, i de azer lo todo a impedir i kombatir el antisemitismo i rasismo ke rezultan sufriensas inimajinable. Sovre todo sintir las estoryas de sovrebivientes de sus bokas es ondamente emosyonante.
Ma lo ke vos kero kontar yo esta ves es otro jenero de estorya - una de salvasion i de triomfo kontra peligros i difikultades - ke su eroa es una ijika de Rodes/Rodos ke empeso, a la edad de 9 anyos, a eskrivir letras (en ladino) a su tio Rafael (Ralph) Capeluto en Seattle, la Amerika, i no kedo asta ke salvo a su famiya. Esta estorya eksepsionala se konta en un livro yamado en inglez titulado A Hug from Afar (Un Abraso de Leshos.)
Todos konosen a Anna Frank de Amsterdam, ma ken konose a Klarika Barki de Rodes? Los eskritos de Anna Frank, enteresantes i emosyonantes komo son, no sirvieron a salvarla de su mala suerte. Las letras ke eskrivyo Klara (Claire) Barki no solo ke dokumentan la vida djudia en Rodes antes i durante la Segunda Gerra, i la saga de una famiya en venser peligros i difikultades para salvarsen de las penches (unyas) del nazismo i imigrar a l’Amerika, son tambien el instrumento prinsipal ke salvo a la famiya.
Ke se izieron Las letras de Claire Barki?
Por mas de 60 anyos dinguno savia ke dainda egzistian. En 1994 (depues de la muerte de Claire en 1991, a la edad de 70 anyos) las toparon adientro de un kuti en la musandara de la kaza de Ralph Barkey. Moris, ermano de Claire, las treslado de ladino al inglez, i Cynthia, la ija de Claire, las arekojo, i djuntos kon fotos i otros muy enteresantes dokumentos, las redakto en el livro A Hug from Afar, ke se publiko en 2014, kon sigunda edision en 2016. El titolo es traduksion de la fraza kon la kuala la chika Claire konkluiva mucnhas de sus letras: “vos bezo i vos abraso de leshos.”
La estorya de la famiya Barki
Esta larga i komplikada estorya merese ser meldada en el livro, ma vos do aki un kurto rezume.
Rafael Capeluto, ermano de la madre de Claire, avia emigrado a l’Amerika en 1920, i se topava en Seattle, kazado kon Rachel Alhadef, tambien de Rodes, en 1930, kuando Claire le empeso a eskrivir letras, kontandole de la famiya, de la eskola (estava en la tresera klasa de la eskola primaria) mandandole saludos del resto de la famiya, i mas. Claire era la grande de 6 kiraturas (3 ijos i 3 ijas) de Avram Barki (nasido en Aydin, Turkia) i Rachel (Capeluto). Los ermanikos de Claire se yamavan Viktor, Moris, i Jak) i las ermanikas Rachel i Regina.
Claire, nasida en 1921, era muy entelijente i siempre la prima de su klasa. La isla de Rodos estava en kontrol de Italia desde 1912, tomada del Imperio Otomano. (La ortografia i algnos vokabularios de las letras tienen la influensa del italiano.) Kon el arivo del fashismo, la vida se izo muy dura, i Claire kontava las difikultades en sus letras, no solo a su tio, ma tambien a su tia Rachel (mujer de Ralph) i otros. A vezes eskriviya letras a nombre de su mama, la kuala no podia eskrivir en letras latinas (solo eskriviya en soletreo Rashi.) De sus letras esavemos tambien las repuestas ke les yegavan de la Amerika.
En 1938 salio la ley ke todos los ke no nasieron en Rodos (komo Avram, el padre de Claire) deven salirsen de la isla. Finalmente el 30 Mayo de 1939 la famiya parvino salir a Tangier en Maroko, viajando en el vapor de kargo Mar Egeo asta Italia, i de ayi kon otro vapor arivaron a Tangier el 2 Julio 1939. Kedaron en Tangiers asta 1945, en no muy buenas kondisiones, letras indo i viniendo. Ma no tenian haber ayi de lo ke estava akontesiendo a sus otra famiya en la isla de Rodos, ande todos los djudios ke kedaron ayi fueron mandados a Auschwitz. Komo se ambezaron? Ken de la famiya se deperdio? I esto es otra estorya.
Las grandes difikultades burokratikas de los Estados Unidos para darles la permision de imigrar, aunke Rachel i Ralph estavan aziendo lo todo posible, i muncho mas, es komo meldar un romanso de adventuras, kon muncho suspenso a saver komo se va rezolver todo.
No yegaron a la Amerika todos endjuntos. Ma finalmente se adjuntaron en Seattle kon el arivo Avram (padre de Claire) en 1949. Claire se kazo en 1960 kon Philip Flash i tuvo un ijo i una ija (la ke edito el livro.) Oy en dia ay mas de 50 desentientes de la famiya Barki (Barkey) en la Amerika, grasias al koraje i persistensia, i las letras de la ijika Claire de Rodes.
El livro
En Internet podesh meldar un poko mas sovre este livro ekstraordinaryo, i tambien ver una pajina de una letra de Claire en: http://jewishstudies.washington.edu/sephardic-studies/a-hug-from-afar-rhodes-to-seattle/ I dainda mijor es sintir a la sinyora Regina Barkey Amira, ermana de Claire, meldar una de las letras en: https://www.facebook.com/WorldJewishCong/videos/10154925015679805/?v=10154925015679805
I, siguro, en estos dias de abrasar de leshos, si meldash inglez podesh bushkar en Amazon para merkar i meldar el livro “A Hug from Afar.”