La realidad es ke no egziste dinguna madre en el mundo ke esta kriyando a su kriatura en djudio-espanyol, ni dinguna kaza ande esta lingua es lingua diaria.
Estonses, a kualo vale los esforsos ke azemos para mantenerla en vida?
En las kavas semanas vide ke algunas personas pensan ke estamos lavorando en vano, i ke muestra lingua no tiene dinguna valor. Esto lo disho klaramente el Sr. Viktor sinyor Viktor Albukrek de EStambol en el filmo "The Final Hour" ke se mostro en el festival de filmos sefaradis en New York el 26 fevrero, fue kon la prezensia de su protagonista Deniz Bensusan. Yo no vide el filmo ma vide pedasos por Internet en:
https://vimeo.com/159245563. Empesando al minuto 2:30, el sr. Albukrek dize (en mi traduksion del turko):
"...Yo le digo a mi ijo ke vayga i se ambeze espanyol, ma nunka le dire ke se ambeze el djudeoespanyol. I ademas, kreygo ke los ke se estan embezando [el djudeoespanyol] estan pedriendo sus tiempo," I en riyendose adjusta, "Shsh... Dingunos ke no lo sientan, me van a echar afuera de la komunidad!"
Vos dire lo djusto me embarasaron muncho estos biervos del Sr. Albukrek, i las tenia dainda en tino kuando meldi en Şalom artikolos sovre el maraviozo Dia Internasional de Ladino ke tuvo lugar en Estambol el 16 febrero, 2020. Ke ermozura! Komedia, kantes, konsertos, konsejas - todo en ladino. Miri todos los videos ke avia, i meldi en Facebook las reaksiones de la djente. Uno detras de otro alavaron todo, i felistaron a los ke salieron en shena i lavoraron para realizarlo. Ma unas kuantas personas eskrivieron pensamientos paresidos a lo del sr. Albukrek. Aki vos transmeto partes de estos, en mi traduksion del turko:
G.M. Regreto, ma aparte de los ke la djente de 50 anyos para ariva ke la ENTIENDEN ma no la pueden avlar, oy ya pedrimos esta lingua. Vuestros esforsos para arrebivir el ladino son komo esforsos flakos de personas aedadas a resusitar un hazino ke esta en koma i en kudio intensivo. Los ke savian la linga mas o menos, kon pokos biervos turkos mesklados, dezde muncho tiempo ke ya se fueron al eterno... La jenerasion manseva ke esta en sus 30 no solo ke no la pueden avlar, ni la entyenden. Triste ama verdad...
V.K. Sinyores i sinyoras, mozotros arrebashimos esta lingua. A los ke la avlavan los yamavamos "djudio de la Kula." Mintira es? Esta lingua no va vinir atras. Si veniya atras, mi papu iva venir atras.
Estos komentos negativos resivieron tambien buenas repuestas komo la sigyente:
D.N. No es solo la lingua, estamos lavorando para evitar la muerte del folklor tambien: uzos kostumbres dichas, proverbos, kantikas, komidas, ets. ...En munchos paises estan lavorando [por esto],
Vale la pena?
Kuando demandi esta kestion en Ladinokomunita tomi munchas repuestas pozitivas, komo las esperava. Estonses ize la demanda a los ke publikan revistas o boletines en otras linguas, ma siempre tienen una seksion en ladino. Kije saver deke kontinuan a inkluyir kozas en ladino, saviendo ke los meldadores no seran munchos.
Aki vos do las repuestas ke me eskrivyoron.
Repuesta de Yakup Barokas (IYT - Asosiason de Turkanos en Israel)
(Traduizida del turko.)
Kuarenta anyos antes, kuando en Israel publikavamos la revista "Dostluk" (Amistad), o el jurnal "Haber" (Notisia), yo era el editor, i siempre davamos lugar al ladino. Desde entonses ke lo konosko a Moshe Shaul. Kuando torni a Estambol, el Şalom tenia una oja en ladino, i kontinuimos ansina en los 11 anyos ke yo fui direktor de publikasion. A Klara i Eli Perahya siempre los kije muncho bien i los admiri muncho. Yo entiendo todo, ma no la puedo avlar a kavza de "Vatandas Türkçe konush" ("Sivdadino, avla en Turko" el slogan nasionalisto ke ovligo a todos de avlar en turko.) Mezmo tuvi tiempos ke pensi "Para kualo keresh arrebivir una lingua muerta? Los mansevos ke se ambezen el ebreo." Ama en Turkia los mansevos ni avlaron en ladino, ni se ambezaron ebreo. Aun kon esto, pokos de mi edad, ke ya no son mas mansevos, empesando kon Silvyo Ovadya i Karen Gershon, estan kontinuando en este lavoro [de mantener la lengua.] Kol Hakavod.
Me demandas deke estamos dando lugar al ladino en muestro sitio en Israel? Ladino es un pedaso muestro, muestra kultura. No es solo una lengua, es Tarbut, kultura. Es esto ke mos aparta de un marokano, de un ashkenazi, i mos aserka a un djudio bulgaro o un djudio grego. Si avlamos ladino o no, mos emosyonamos kuando sintimos kantikas en esta lingua. Yo kreygo ke en djudaismo tradisiones i kultura tienen la mezma grande emportansa ke la relijion. Es menester de mantenerla. Es verdad ke en Turkia la komunidad se esta amenguando, i en Israel los mansevos se estan aziendo Israelianos. Estonses devemos lavorar mas duro para mantener la vida del ladino, i ensenyar akadademisienos en institutos komo el Selim Salti.
Kon amistad,
Yakup
Repuesta de Judith Roumani (Editora de Sephardic Horizons)
(Traduizida del inglez.)
Kreygo ke mi repuesta va ser muy diferente de los ke le kontaron a Rachel deke kreyen ke vale la pena prezervar i uzar la lenga Sefaradi de Ladino/Judeo-espanyol/Judezmo. No Sus avlantes no estan de akordo ke nombre darle a la lengua, ma desharemos esta kestion por agora.
La seksion de la lengua en Sephardic Horizons kontiene de uno a tres eskritos--estorya, artikolo, kritika de livro, o poezia--en kada numero. La idea es ke la djente pueden pratikar el meldar, i posiblemente mezmo responder. Siendo ke publikamos de tres a kuatro vezes al anyo, no es posible tener las konversasiones ke egzisten en otros foros o sitios de Internet. Ma los lektores apresian lo ke publikamos i mos mandan eskritos muevos a publikar.
Deke yo me entereso en prezervar i kontinuar la lengua de los sefaradis? No es la tradision de mi famiya i yo no la sinti en mi chikez. Me la embezi a traves de manuales i CDs i en "ekstrapolando" de otras lenguas ke estudyi, i oy en dia en kontinuando a meldarla i eskrivirla un poko. Komo estudiante tuve el benefisio de estudiar la istorya linguistika i los dialektos de la Peninsula Iberika en Nottingham University de Ingliterra, i kreygo ke tuve una buena baza akademika. Emosionalmente, kreygo ke devemos azer todo el esforso ke podemos azer para prezervar la diversidad i rikeza de las linguas djudias, porke son la otentika ekspresion de las eksperiensas djudias istorikas, espesialmente de akeyas ke fueron kaji destruidas en la Shoa. A esto devo adjustar un sierto inat, obstinasion, i (asegun me dize mi famiya) una atraksion mia a luchas "kishotikos", lo ke [en kavzo del djudeoespanyol] no es mas una lucha pedrida, porke grasyas a los benefisios del Internet, mas i mas mansevos se enteresan i los biervos [en ladino] korren entre los aedados i los djovenes.
Mazal Bueno i Vidas Largas a la lengua, lo ke sea ke la yamesh, i a los ke la avlan.