La Mas Ermoza Sinagoga del Oriente Serkano: Bet Israel de Izmir

El titolo de ariva no es mio. Me lo "rovi" de un artikolo en turko, eskrito por mi amiga Sara Pardo, en una revista de Izmir yamdo Izmir Dergisi de febrero, 2012. Vos dire lo djusto, si Sara Pardo disho ke Bet Israel es la mas ermoza kehila (o kal, asegun dizish en estambol) del Oriente Serkano, es ke es verdad. Eya es la istoryadora de los djudios e Izmir i lavoro por munch anyos komo giya turistika, i oy en dia es tambien una de las pokas mujeres dirijentes de la Komunita Djudia de Izmir.

Lo ke yo vos puedo dizir personalmente es ke Bet Israel es muy emoza kehila, grande i elegante, kon una almenara imensa, mobles, ehal, i dos tevas, i kolonas ke suportan la azara de ariva, todo de akaju (mohagony en inglez, maun en turko) lavrado de mano por artizanes italianos. Tiene lugar para 600 personas asentadas abasho solo, sin kontar la azara (balkon de mujeres) ke agora se uza komo un chiko muzeo.

Ma aparte de su ermozura i su elegansia, Bet Israel tiene grande emportansia por las ermozas memorias de eya ke biven en la memorya i el korason de kada Izmirli en el mundo, sovre de todo los ke mos engrandesimos en su deredor i mos kazimos ayi. Mi ermano Selim Amado, de bendicha memorya, fue invitado a avlar de sus memoryas en un panel en junio de 2007, en las fiestas a la okazion de los 100 anyos de la fondasion - o, mas djusto dizir, de la aviertura - de Bet Israel. Ayi el konto kon muncho detalyo la vida al deredor i adientro de la kehila en los anyos de 1930s asta los 1960s, i su rolo de en la vida i el sentimiento de identidad djudia de los Izmirlis. (Yo tengo el teksto en turko, i esto pronta a mandarselo al ke me lo demandara.)

Noas istorikas

La sinagoga es situada en el bario de Karatash, serka de la Asansor, ke kuaje ya se izo el simbolo de la sivdad de Izmir, despues de la torre del Konak (Konak Saat Kulesi.) En el chiko muze ariva, en la azara, podesh ver, entre otros enteresantes objektos, el ferman orijinal de Abdulhamit, datado de 1905, ke da permision de fraguar el kal. Los rikos, o diremos la mueva burjuazi djudia, de entonses ke estavan pasando a bivir en el muevo kartier de Karatash, al bodre de la mar, kijyeron fraguar una sinagoga al stilo evropeo, kon "plano de basilica", ke kijo dizir la teva allado del ehal en la pared, i no en medyo asigun tenian las viejas kehilas de Izmir. Asta ke se eskapo la fragua por afuera paso dos anyos, entre mientres la moneda turka se devaluo, el revenido kayo, i no podieron kompletar lo de alyentro. Ma aun kon esto, kon varias donasiones, podieron boyadeyarla, i aprontar lo minimom menesterozo, i la avieron a tefila en en Septembre de 1907, para Roshashana, (o, asegun otros, en Marso del mezmo anyo.) La lavor de los artizanes i toda la dekorasion del interior duro unos kuantos anyos mas, i en 1950 uvo una grande restorasion, ke dio su forma final, aunke uvo mas restorasiones desde entonses.

La situasion aktual

La povlasion djudia de Izmir kayo a no mas de mil personas, i todos eyos biven por Alsancak. En los anyos de 1960 se avia avierto la kehila Shaar Ashamayim de Alsancak, i oganyo esta se rekonstruyo en mas grande, para kontener tambien la mikve i el lokal para fiestas i para la Liga (el klub de mansevos djudios) i esta para avrirse en estos dias, para Roshashana. Entre mientres las kehilas istorikas de viejo Izmir se estan rostrando debasho del proyekto yamado "the Izmir Project" ke va ser un sentro kultural turistiko. Ke va ser del kal Bet Israel, agora situada en un kartier ande no mora dingun djudio? Espero ke los Izmirlis, sean de Izmir o de ande es ke sean en el mundo, i todos los djudios ke apresian su ermozura i su istorya, la apoyen i la uzen komo kehila, ke vengan a orasiones de Shabat, o fiestar bar mizvas i bodas de sus ijos aki, en la mas ermoza kehila del Oriente Serkano.