ELZOHAR I MOSHE DE LEON


El Zohar es konsiderado, al lado de la Biblia i del Talmud, komo una de las tres ovras kanonikas del djudaizmo. Este es el livro de baza de la Kabala (mistisizmo djudio) i en el se topan los sekretos de la kreasion, del universo i de todos los mundos ke lo konstituyen: el mundo vizible i los mundos de arriva ke estan enkuviertos. La influensia del Zohar depaso los limites del mundo djudio. Al prinsipio de la epoka del Renasimiento, verso la fin del siglo 15, algunos sirkolos kristianos tambien empesaron a interesarsen en la Kabala i estudiaron traduksiones de siertas partes del Zohar.

Sigun la tradision, el autor del Zohar es Rabi Shimon Bar Yohay, un gran savio ke bivio en la Tierra Santa en el siglo II. Durante 1000 anyos el livro desparesio asta ke fue deskuvierto de muevo por el gran rabino i kabalista espanyol A-Ramban (Nahmanides, 1194-1270). A-Ramban, ke bivio en Gerona, Catalonia, desho Espanya en 1263 (despues de la polemika de Barcelona) i se establesio en la Tierra Santa. Ayi segun la lejenda topo el Zohar i lo embio a su ijo en Gerona,. De ayi, mos konta la lejenda, este livro santo fue yevado milagrozamente por el viento a Zaragoza onde lo topo R. Moshe de Leon (1240-1305). En este punto se enkontra la lejenda kon la realidad i empesa el kuento de los atadijos misteriozos de Moshe de Leon kon el Zohar. ke nasio en 1240. en Zaragoza.

En 1305 yego de Erets Israel (la Tierra Santa) a Espanya el kabalista Yitshak de Ako, kon la intension de investigar las raizes del Zohar i la verdadera identidad de su autor. El reusho a enkontrarse en Valladolid kon R. Moshe de Leon, ke lo invito a su kaza en Avila para amostrarle el manuskrito antiguo i orijinal del Zohar ke tenia en su poder. Moshe de Leon murio antes ke tuviera lugar el enkontro, ma aun kon esto, Yitshak de Ako kontinuo su investigasion.

Su testimonio - publikado, de manera fragmentaria, por R. Avraam Zakut (Zacuto) (1452-1515) en su livro Yohasin (Linaje), Constantinopla, 1566 - se melda komo una novela detektiva. Las trasas ke topo en su bushkedad yevavan todas a Avila. Es de esta sivdad ke salieron las primeras kopias manuskritas del Zohar, eskritas de mano de R. Moshe de Leon el mizmo. A esta sivdad tambien yego R.Yitshak de Ako para rezolver la enigma del Zohar i de su autor. En Avila bivio en akeya epoka el riko Yosef de Avila, arekavadador de dasios ke tenia munchos bienes en esta sivdad. En el kuadro de los testimonios arekojidos por R. Yitshak de Ako sovre los manaderos del Zohar, el konta sovre lo ke le fue dicho uno de los abitantes djudios de la sivdad, R. David de Pankorbo. Sigun este, despues de la muerte de Moshe de Leon, Yosef de Avila bushko a konvenser a su bivda de darle el manuskrito del Zohar, prometiendole en kontraparte de kazar a su ijo kon su ija.

En baza de las memorias de R. Yitshak de Ako, i de komparasiones kon ovras orijinales de R. Moshe de Leon, los investigadores - en primer lugar el gran investigador de la Kabala, el Profesor Gershom Sholem - yegaron a la konkluzion ke el verdadero autor jenial del Zohar no es otro ke R. Moshe de Leon. El Profesor Yeshaya Tishbi, el kontinuador de Gershom Sholem, ekspreso su opinion ke R. Moshe de Leon eskrivio la gran parte del Zohar despues de 1293, kere dizir ke esta grande ovra fue kompozada en Avila.

Ke es lo ke tiene el Zohar ke lo aze tan espesial i tan diferente de otras ovras de la literatura kabalistika? En primer lugar devemos notar ke las ideas del Zohar no estan ekspresadas de un modo sistematiko, no estan organizadas segun un metodo mental, sino mediante komentarios i interpretasiones mistikas de versikolos i frazas de la Biblia i de otras partes de la literatura djudia relijioza.

Es verdad ke la manera en la kuala las ideas del Zohar aparesen en el teksto es konfuza i puede embrolyar el meldador, darle la impresion ke se trata de un livro enigmatiko i oskuro. Ma el tiene la fuersa de poder avlar no solo a los savios de la Kabala, sino ke tambien a todo el ken save avrir su razon i sus sentidos para absorbrr mesajes mistikos.

La segunda karakteristika ke kale notar kuando se avla del Zohar es su tendensia a uzar un lenguaje simboliko i metaforiko. Es verdad ke para entender lo ke dize el teksto kale desifrar los simbolos ke lo komponen i sin tener las yaves para azerlo el teksto parese enigmatiko i ilojiko. Ma por otro lado esta karakteristika tambien es la ke aze el Zohar un livro tan bivo i avierto a varias interpretasiones. Parese ke es esta kualidad ke dio al Zohar su prestijio i autoridad i ke lo izo un manadero de inspirasion para varias jenerasiones de kreadores en la Kabala ansi komo en otras ramas de la kultura djudia i no djudia. Todo esto mete a Moshe de Leon, el gran sivdadano de Avila, en una alta pozision en la literatura universala.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon