LA IDENTIDAD DJUDIA DE CAMILLE PISSARRO

El famozo pintor Camille Pissarro, konsiderado komo “el padre del impresionismo” era desendiente de una famiya djudia de orijin portugez ke se avia konvertido al kristianismo, todo en mateniendo sekretamente su relijion djudia ke fue transmetida de jenerasion en jenerasion durante 250 anyos. Su bisnono Pierre Rodriguez Alvarez Pizzarro nasio en la sivdad de Braganza, en Portugal, serka de la frontiera kon Espanya. El nono de Camille, Joseph Gabriel ke nasio en 1776, avia emigrado, verso la metad del siglo 18, a Bordeaux, en Fransia ande ya existian chikas komunidades djudias. En el anyo 1700 el rey Louis XIV avia desidido de rekonoser a estos muevos kristianos komo djudios, aun ke de fakto solo. Es solamente basho el reyno de Louis XV (1723) ke eyos fueron konsiderados ofisialmente komo djudios. El granpapa de Camilla Pissarro estava entre estos konversos ke avian tornado al djudaizmo de manera ofisiala. Eyos ovraron para el establesimiento de una komunidad prospera ke, entre otras, se okupo de todos los menesteres de sus miembros. La povlasion djudia de Bordeaux ke, en 1713 kontava 500 almas ya avia yegado a 1550, a la vilya de Revolusion Franseza, en 1789.

Joseph Gabriel Pissarro, ke era uno de los miembros mas aktivos de la komunidad de Bordeaux, se kazo en 1789, kon Anne Felicite Petit, ermana de Isaac Petit, ke bivia en la izla de St. Thomas, en los Caribes, ke en akeya epoka apartenia a la Korona de Danimarka.

En segito a la muerte de Isaac Petit, uno de los ijos de Joseph Gabriel, Frederic, fue embiado a St. Thomas, afin de ayudar a la bivda Rachel Petit, ke era su tia par aliansa, en los negosios de la famiya. Abraham Gabriel Frederic Pissarro i Rachel Manzana Pomie, ke no es otra ke Rachel Petit, se namoraron i se kazaron en Charlotte Amalie, en St. Thomas. Es ayi ke nasio, en el 10 de Djulio de 1830. Jacob Abraham Camille Pissarro.

A la edad de 12 anyos Pissarro fue embiado por su padre a la Pension Savary serka de Paris, ande resivio una edukasion segun la tradision i la kultura fransezas. Despues de un periodo de 6 anyos de estudio i de aver sido graduado, Pissarro torno a St. Thomas para ayudar en los negosios familiales; ma aun ke estava muy bien pagado, a la edad de 20 anyos el entendio ke el komersio no es para el. Djuntos kon el pintor danezo Fritz Melbye, ke fue tambien su maestro, en 1854 partio a Venezuela ande bivio durante dos anyos la vida de un verdadero artista. Siendo ke su famiya le avia prometido de apoyar su kariera de pintor, el torno a St. Thomas por un kurto tiempo i en fin, en 1855, se aresento en Paris. El studio ayi en diversas institusiones akademikas inkluzo la Eskola de Bellos Artes (Ecole de Beaux Arts) i la Akademia Suissa.

Verso la fin del anyo 1859, a la vilya del Dia de Kipur, Camille resive una letra de su padre Frederic, en la kuala el akodra a su ijo ke deve vinir a tomar taanit kon eyos i pasar del Dia del Gran Pardon djuntos kon su famiya. Esto mos da una idea de lo ke eran las relasiones entre Camille Pissarro i su famiya. Una de las pokas vezes o puede ser ke la unika vez ke Pissarro se refero a su relijion fue kuando murio su padre.El eskrivio a su tio : “El Dio es grande. EL mos tomo lo ke teniamos de mas presiozo en este mundo: devemos enkorvarmos i kreer SU providensia.”

Durante la gerra franko-prusa (1870-1871), Pissarro partio a Ingletierra i torno a Fransia verso la fin de 1871 i topo sus primeras ovras destruidas por los soldados prusos. El lugar de enkontro de los impresionistas en Paris era el Café de la Nouvelle Athenes, en la Plasa Pigalle. Uno de sus amigos, el eskritor George Moore avia dicho deskriviendo a Pissarro “El es muy intelijente i apresiado djudio. Kon su barva blanka i sus kaveyos blankos, mos akodra al Patriarka Avraam.

El pinto prinsipalmente panoramas i aun ke no bivio largos anyos en St. Thomas, a la vista ke fue enfluensado por su povlasion lokala siendo ke algunas de las figuras en sus pinturas tienen una kolor eskura. Es muy probable ke la enfluensa de Pissarro sovre sus kolegas no fue apresiada a su djusta valor, ma aun kon esto el supo krear relasiones amigavles kon pintores komo Edgar Degas, Paul Cezanne i Paul Gaugin…. El murio el 13 de Novembre 1903.

I por fin: Pissarro, su ovra i el Muzeo de Israel: En el mez de Disiembre de 1952, Mordehay Narkis, Direktor del Muzeo Bezalel, ke mas tadre devino parte del Muzeo de Israel, avia eskrito a Paul-Emile Pissarro, el mas djoven ijo de Camille Pissarro, afin de rengrasiarlo por las eskritas de su padre i las pinturas pintadas por el mizmo ke fueron donadas al Muzeo. Paul Emile avia prometido a M. Narkis de organizer una ekspozision de las ovras de su padre para markar los 50 anyos de su muerte i pinturas pintadas por el mizmo. Ma esta prometa no fue kumplida. Es solamente 40 anyos mas tadre, en 1994, ke el inyeto del pintor, Joachim, realizo esta prometa i una ekspozision de las ovras de Camille Pissarro tuvo lugar en el Muzeo de Israel.

En la koleksion del Muzeo se topan oy 28 pinturas i 18 litografias de este famozo pintor ke pokos son los ke saven ke era desendiente de los djudios ekspulsados de Espanya.