De mizmo ke en la mayoria de los puevlos, onde los sefaradis tambien avia munchos ke tenian superstisiones atadas a la kreensia ke semos entornados por fuersas i seres malefikos ke bushkan a kavzarmos danyo i de los kualos devemos protejarmos. La mas konosida de estas fuersas malefikas es el "ainara" (ebreo para "ojo malo") i el folklor sefaradi es riko en remedios, para la lucha kontra este mal, komo por el uzo de "echar livianos" i aprekantar a la persona sospechada de aver sido viktima del "ainara".
Ma en desparte del ainara, ke era la fuersa malefika de la kuala uno devia de guadrarse lo mas, avia tambien otras fuersas, otros seres de los kualos kalia akavidarse siendo ke eyos tambien bushkan - sigun estas kreensias - toda oportunidad de kavzarmos danyo.
Se trata de los "guerkos" al deredor de los kualos se kreo, sovre todo en los puevlos del Oriente, todo un mundo de leyendas, kreensias i superstisiones, algunas de las kualas subsisten asta muestros dias, malgrado todos los progresos de la sensia i de la edukasion moderna.
El eskritor i folkloristo sefaradi Mihael Molho, al kual devemos una grande parte de muestras konosensias sovrel el djudaizmo de Gresia en la epoka ke presedo la Sigunda Gerra Mundiala i el Olokosto, trato bastante anchamente de este tema en su livro "Usos y Costumbres de los Sefardies de Salonica" (Ed. Instituto Arias Montano, CSIC, 1950).
El eskrive ke sigun lo ke kreiyan los sefaradis de Saloniko, los guerkos se topavan en todo lugar, ma preferavan morar en las tombas, los pozos i los lugares en ruinas. Ay guerkos inofensivos, ma la mayoria de eyos son danyozos i peligrozos. Eyos kavzan toda klasa de malatias i son peligrozos espesialmente para los rezin kazados, las mujeres prenyadas i los rezin nasidos.
Una de las superstisiones atadas a este tema era por enshemplo ke kalia protejar a los bebes rezin nasidos ansi ke a sus madres en los 7 dias asta la “beraha de Berit” (la sirkunsizion), siendo ke “Lilit”, las mas famoza i peligroza de los “mijores de mozzotrios” se atakava djustamente a las mujeres ke veinan de parir i a sus bebes. Es por esto ke las rezin paridas o eran desjadas solas, i uzavan kedar en kaza, akompanyadas por miembros de la famiya, asta del dia de la sirkunsizion.
Otra superstision venia siguramente de los dias en los kualos no avia en kaza una kanalizasion para desbarasarse de las aaguas uzadas, i eyas eran echadas a la kaye. Se pensava entones ke el echar agua kaente por la ventana, en la eskuridad de la noche, puede trayer graves desgrasias siendo ke esta agua puede kayer sovre uno de los guerkos ke salin afuera, al eskureser, i ensanyarlo kontra el ken echo la agua. Djuntos kon esto, se podia evitar las konsekuensas negativas de un tal akto si antes de echar la agua se dizia a boz basha: "Apartad la buena djente, ke vo a echar agua kaente".
Es kuriozo ke los sefaradis no uzan yamar a los guerkos por sus nombre, sino ke los yaman “buena djente”, "los de abasho" o "los mijores de mozotros", komo si se bushka a apaziguarlos en dandoles nombres ke no los ofendan. La konvinksion ke la mijor manera de luchar kontra estos seres es de apaziguarlos i akontentarlos se reflekta, entre otras, en una kostumbre ke estava en uzo en las komunidades sefaradis, asta el prinsipio de muestro siglo.
Kuando akontesian siertas kozas inuzualas i a las kualas no se podia topar eksplikasion, komo por enshemplo ke eran oyidos durante la noche ruidos estranyos, o ke una tijera o un kuchio etc. desparesian de manera estranya, los ke eran mas superstisiozos kreiyan ke esto era un sinyo ke "los mijores de mozotros" kerian la kaza por unos kuantos dias.
Para apaziguarlos i evitar ke eyos agan de sus malas echas, la famiya entera se pasava temporariamente a otro kaza, despues de aver areglado una meza kuvierta kon una variedad de kumidas i dulserias. La kaza era serrada i deshada vazia durante unos kuantos dias, en los kualos se kreiya ke los "mijores de mozotros" se akontentavan en komiendo de lo ke les avia sido aprontado. De esta manera se pensava ke eyos renunsiarian a molestar esta famiya i ke a su retorno, despues de unos kuantos dias, eya podria tornar a su modo de vida regular, sin tener ke espantarse de sus sanya o deskontentez.
Estas kreensias se reflektan tambien en algunos de los refranes i kuentos populares djudeo-espanyoles, onde "los de abasho", "los mijores de mozotros" djugan un rolo bien importante. Djuntos kon esto deve ser klaro ke oy son bastante raros los ke kreen ainda en estas superstisiones. No solo esto sino ke estan menguando mas i mas los ke konosen este aspekto del folklor sefaradi, i esto es pekado siendo ke todo este kampo de la erensia kulturala djudeo-espanyola no fue ainda bien dokumentado. Muy pokos eskritores i ainda menos folkloristas, antropologos o etnografos se aven okupado de estos uzos. Komo konsekuensa de esto ay a penas unos kuantos livros ke tratan de este tema seriozamente, dedikandole mas ke uns pokas linyas o pajinas.
Es en el korso de los ultimos anyos solo ke los investigadores empesaron a darsen kuento de la importansia ke tienen las kreensias i superstisiones komo uno de los aspektos mas interesantes del folklor, i ke el merese ser mas anchamente estudiado i investigado. Komo konsekuensa de esto ya se empeso a arekojer material, a analizarlo i kompararlo kon el de otras komunidasdes i otros puevlos, ma la verdad es ke ainda falta muncho para tener una buena konosensia de este tema.