LAS TRES KUKLAS

Kontado por KOHAVA PIVIS – 2000

Un rey de China tinía un amigo bueno. Al amigo del rey de China le agradava muncho viajar en munchas sivdades. Kada vez ke vinía a topar al rey de China, le traía un suvenir..

Una vez, kuando vino de Fransia, le trusho un kutí grande, divizado en tres etajes.

Avrió el rey el uno, sta mirando: una kukla muy ermoza, vistida bueno, kon djoyas, blonda... Avrió el sigundo etaj, ay ayá entr’una kukla mezma, vistida, endjoyada i peynada... blonda! Avrió el treser etaj del kutí, i vido entr’una kukla tamién.

Disho el rey: “Kualo es esto? Tres kuklas mezmas me trushitis?”

Le disho el amigo: “Kale ke topes kuala es la mas valable”.

La ija del rey, ke stava ayá, le disho: “Papá, éstas kuklas no son mezmas! Ay diferensia...”

Le disho el padre: “Sí? Ke diferensia?”

Tomó la ija un kordoniko de seda i le disho: “Papá, mira, akí, en la orejika de la primera kukla ay un burako. Si yo entro el ilo de akí, sali de la otra oreja. La otra,” le disho, “si se lo entro de la orejika, le sali de la boka. I la tresera,” disho, “si se lo entro de la oreja, se keda en la tripa”.

“Aa!’ le disho el padre, “sos bien entelijente, ija mía!”

Le disho el amigo: “Esto es komo kon las personas. Ay ken le entra de la una oreja i le sali de la otra. Ay ken le entra de la oreja i le sali de la boka. I el tresero, el ke le entra de la oreja i no le sali, es el mas valable, porké save tener el sekreto”.

Le disho el amigo al rey: “Tu ija es tanto entelijente, ke la kero por mujer, si me la das”.

Le disho el rey: “Sí, te la do, porké sólo eya puede ser la mujer de un ombre komo ti!”