Sovre La Fiesta de las Madres (1)

En los dias pasados, selebrimos una fiesta muy presyoza para las mujeres: “El dia de las madres”. Es verda ke este dia no es tan selebrado aki en Israel, ma en Turkiya -komo en munchos otros paises mas-, es selebrado kon un chiko regalo, un buketo de flores, un bezo kayente, una komida de famiya, o a lo menos, -para las ke tienen sus keridos en paises leshanos-, un sohbet de telefono.

Savej komo i kuando se empeso a selebrar esta fiesta ?

El konsepto de “la fiesta de las madres” ke konosemos oy, lo devemos a una ijika Amerikana, Anna Jarvis. Anna peryo su madre a 12 anyos. Un anyo despues de la muerte de su madre, en el 12 Mayo 1907 Anna organizo en una iglesia de Filadelfia un dia espesyal para rekuerdarla. En el anyo ke viene, Anna eskrivyo letras i petisyones a munchos politisyanos, ministros i otoridades relijyozas demandando kon insistensya la fundasyon de un dia tradisyonal para todas las madres. I ansi fue ke en 1908, el sigundo alhad del mez de Mayo fue akseptado komo “dia de las madres” no solo en Filadelfia ma en la Amerika entera.

En 1914, los esforsos de Anna trespasaron las frontierras de los Estados Unidos, i la Evropa deklaro ofisyalmente este dia de selebrasyon para las madres.

En Turkiya la primera selebrasyon fue empesada en 1955.

Ya savej ken son los primeros padres i madres de la historia?...

Adam i Hava, sin dinguna duda!.. Eyos no tuvieron ni padre ni madre ma tenian un solo pariente: …El Dio !

I el Dio, despues de kriar la tierra i los sielos, los kriyo i la primera koza ke les disho fue :

-“Vos defendo!.. NO!…”

-“NO? Kualo NO… ?” pregunto Adam,

-“Ke NO komej de la fruta defendida!” disho Dio.

-“Fruta?.. Fruta ay de komer?.. Olé! Ven, korre, Hava ke tenemos fruta defendida!!”

-“Ayde, La komeremos” disho Havva.

-“Noooo!.. no es posible” disho Adam!

-“Por sedaka ke NO komej de akeya fruta!” disho El Dio!

-“Deke ez esto..?” disheron los dos de mismo boka.

-“Porke yo so vuestro padre i ansi vos ordeno” disho El Dio.

Esto disho, iii…, unos kuantos momentos mas tarde, los aferro en medyo de un grande festino de mansanas.

-“Yo no vos dishe de no komer de esta fruta ?”

-“Si ya mos dishites.. maa…”

-“Maa.. ke maaa?.. deke komitej?..”

-“Es eya ke empeso” disho Adam,

-“No es verdad, tu komites el primer” le disho Hava.

-“Ama TU me dishites de komerla” le respondyo Adam,

-“Sos TU ke…”

-“No,.. TU, si TU….”

I ansi es ke el Dio Baruh-u, viendo ke no va pueder salir Abash (!) kon sus proprias kreyaturas, desidyo de punisarlos...–de darles una “ceza”-.

La -ceza- fue ke Hava sera fekunda i paridera, i dara luz a sus chikos kon grandes dolores. De akel dia en delantre, esto fue el orden del mundo… Un orden ke no kambyo asta muestros tiempos, i nunka kambiara…

Me parese ke tenemos de kitar una konklusion de esta konseja vieja komo muestro mundo. Ma por seguro ke la konkluzion no es ke muestros ijos mos son dados en punisyon –en ceza-… No!, esto no es la konklusiyon..

Yo penso ke la konklusion es ke, kuando mozotros parientes, penando i lazdrando kon amor, pasensya i insitiensia para amostrar a muestros ijos i ijas el kamino derecho, dandoles konsejos i edukasyon,… Devemos de akodrarmos ke - Si el Dio tan poderoso no reusho kon sus kriansas komo keremos mozotros reushir.??

I es ke,.. Tres madres judias estan asentadas en un kafe debasho de un sol kayente de primavera, charlando. Despues de unos kuantos momentos de silensio, una de eyas echo un grande suspiro :

-“Aah, ah, aaah!”…

-“Oooff.. off.. madre mia… off.. !” sospiro profundamente la sigunda.

-“Aaa no!,” disho la tresera, “ de muevo el mizmo problem ! Vos akodro ke desidimos ke oy, no ivamos a avlar de muestros ijos!”.

Si, keridos lektores, ser madre kere dizir ansyas i sakrifisyos sin fin, a empesar del dia de nasimyento… Ma kere tambien dizir grande felisidad, amistad, amor i ...antes de todo, orgolyo.

(Vai continuar)

Apretar al boton para ver todos los eskritos

ONLINE İYT KİTAP