SER SIONISTO

(Teksto-Audio)

(Yazarı sesli dinlemek için tıklayınız)

Atrás 15 dias fiestimos kon grande alegría i orgolyo los 73 anyos del establesimiento del Estado de Israel. Las fiestas echas en Israel siguente el dia de komemorasyon de muestros disparesidos en las diferentes guerras i atakos teroristos, fueron maraviyozas. El dia de independensya fue fiestado kaji en todos los payises amigos i espasialmente en los Estados Unidos, en el Kanada, en la Australia en iluminando mizmo los edifisyos ofisiales de kolor mavi(azul). Esto mos prova ke no solo la uma djudia ma ke milyones de umanos a traverso el mundo keren el bien de Israel i lo respektan malgrado ke es chiko en superfisia ma grande en valor. Este anyo me impresyoni muncho en viendo la reuchita de la lucha de las otoridades sanitaryas ke dieron i dan kontra el virus de la korona, ke es un model, una referensya unika para el mundo entero.

Ansi me konvensko ke so sionisto, porke kero bien a mi patria, porke rogo dia i noche a ke ayga pas i entendimiento entre los djudios i los arabos palestinianos. Nasido en Estambol me engrandesi en un sentro sionisto antes i después del establesimiento de Israel. Siempre fui atado a el i nunka manki kon mis pokos remedios a mirar a zer konoserlo i azer achetarlo por los goyes de mi doredor. Enfin a una edad avansada el todo poderozo me ayego a azerme ole i vinir a bivir en mi tyerra entornado de toda mi famiya. De otro lado dezde 20 anyos no me aresti de lavorar por el bien de los turkanos establisidos komo mi en Israel i miri de azer avansar akademikamente los estudyos de muestro immenso patrimonio sefaradí en establesiendo la fundasyon Selim Salti i el Instituto Salti en la Universidad Bar Ilan en Tel Aviv.

De mi perspektiva personal digo ke no abasta todo esto para ser un sionisto. So sionisto por ke kreygo komo todos los israelianos en una verdadera demokrasia en abrasando el esprito del umano i de su valor en la vida umana, konvensido de kererla bien en mostrando tolerensya i akseptasyon del otro. So atado a los prensipyos de baza de los derechos del umano i de la independensya personal. Me gusta kombatir kon fuerza por los derechos umanos, kontra su inimista en estando fuerte en frente del teror i de sus menasas. Espero ansi ke la nasyon israeliana será amada i ke avra manko de antesimitizmo kontra el djudaizmo.

Ser sionisto es dar la repuesta a los anti israelianos, ke en mayoriya no konosen bien la istorya del judaizmo o son mal entensyonados, en dizyendoles ke el ‘Sionizmo’ es un muvemento nasyonalisto bazado sovre 3 kriteryos

a) AmYisrael: ke los djudyos somos un puevlo i no una komunidad de religión

b) Eretz Yisrael: ke egziste un atadijo bibliko-nasyonalisto a la tyerra de Israel

c) Medinat Yisrael: ke el puevlo djudyo tiene el derecho de establisir un estado moderno en la tyerra de sus antepasados.

Ademas el antisemitizmo es un fenómeno antiko dezastrozo ke komo un virus se espandyo en el mundo kristyano i mas despues en el muzulmano. Los ke aborresen los djudyos en akuzandolos de todo modo de mal egzistente deven ser kombatidos mizmo si trokan la fatcha del antisemitizmo en anti-israelizmo. La istorya mos da a entender ke no se topa una melezina a este fenómeno, ma kon pasiensya i konvensimyento ken save si un diya los israelianos serán kapaches de amahar la ardor de este movemento.

So sionisto porke komo lo dicho Hertzl si lo kereramos lo alkansaramos. Mi puevlo es entelijente i laboryozo ansi en menos de un sieglo fue kapache de krear en un chiko territoryo una grande nasyon respektada oy en dia por la mayoriya de las umas del mundo i mizmo de los arabos. El akordo de rekonosimiento de Abraham basta para provarlo. Tengo la esperansa ke este sirkolo se ancheara i ke otros payizes arabos se ajuntaran a este akordo komo fue el kavzo del Sudan i del Maroko. Grasias a esta intisyon de establisir la pas en el Medyo Oriente, una kolaborasyon serkana de los Estados Unidos i del mundo muzulmano arabo sunnito kon Israel dará la oportunidad de arestar la inimista de los rejimes radikalos, espesialmente el Iran i los grupos teroristos ke el suporta.

So sionisto porke me alegro de ver ke mas de 3 milyones de djudios izyeron sus aliyas dezde la fundasyon de Israel, sin espantarsen de la situasyon de gerra ke egzistiya i ke egzista oy en dia. Miles de mansevos djudyos sin sus famiyas vinieron a ser soldados en la Armada de Defensya de Israel(Tsahal) para defenderlo. Kon su kreativita immensya Israel fue kapache de krear muevas armas de defensya ke ayudaron de guadrarmos de una muerte absoluta i sin entrar en detalyos vos dire ke somos una de las nasyones la mas bien defendida i sigura del globo. En 73 anyos la povlasyon del payis pujo de 550000 sivdadinos a 9 milyones trezyentos mil donde el 74 por sien son djudyos. Por razones ekonomikas un grande nombre de etranjeros asperan vizas de entrada al payis para vinir lavorar koza ke prova ke devemos ser muy atentivos a esta kestyon para no kayer en el estado bastante difisil en los kualos se topan los payizes evropeos.

Ser sionisto para mi me importa porke en muy kurto tiempo Israel se izo la nasyon inovativa la mas konosida del mundo. Miliardas de dinero koryo i korre kom un chorro a este payis para poder merkarle su teknolojiya o investisir en las mas avansadas inovasyones ke se dezvelopan. No se de ande ampesar para darvos a entender todas las teknolojias onde Israel es ekselente. Spesialisto en agrikultura, en farmakolojia, en armamento, en sistemas de guidansa i mas, kada dia ke pasa el payis se enrikese mas. Malgrado la provedad kronika egzistende el payis se enrikese enormamente. Ken de mozotros se pensava en los anyos 1949 ke un dia Israel va tener 21 miliardero i 12 primados de Nobel.

Esto seguro akeyos mondyalitos de la siedra ke meldaran esta eskrita me akuzaran de ser demazyado nasyonalisto i mizmo rasisto. No me emporta, porke por ke no lo so i siendo moderamente romantiko adoro mi puevlo i mi payis. So un demoktariko konvensido i amante de la pas.