top of page

SAKRIFIKARSE POR LA PATRIA.




(Teksto-Audio)








Dos semanas antes el soldado Hillel Ofen, miembro de la uñita elit de enjenieria Yahalom de Tsahal (Fuerza de defensya israeliana) ke muryo trajikamente en lo aliskuro de la noche durante una manovra regular de la armada, fue un evenemiento ke atristo el payis, espesialmente sus amigos de kombate. Hillel era, de bendicha memoria, un patrioto egzemplaryo ke mos ambezo kualo sinyifika sakrifikarse por la patria. Durante la alvaya su padre meldo una letra ke el tenia siempre enriva de si, ke muestros politikos aktualos devrian oyirla kon atansion i amanziamyento. Hillel avia eskrito lo siguente, (espero ke mi traduksyon esta justa):

Yo apartengo.

Yo apartengo a mi famiya,a mi komunidad i a mi nasyon.

Yo apartengo a mi estado i a mi patria.

Yo apartengo a la umanidad, a mi konsensya i a la dinyidad

Yo apartengo a la istorya i al futuro.

Yo apartengo a la joya, a la pena, a la esperanza i al espanto.

Todo lo ke va bivir ansi ke mi nasyon va bivir, ke kreyo mi identidad, so yo i le apartengo.

So obligado de protejar, tomar sovre mis alas para defender i guadrar todo lo ke esta dicho aki ariva.

So ovligado de asegurar kon todas mis fuersas sus egzistensyas eternalamente.

Agora yo me siento atado a esta promesa.

Yo apartengo a mi arma, al demenester de ser viktoryozo en la batalya.

Yo apartengo.

El soldado mansevo Ofen kon su eskrita mos da una buena leson de patriotizmo. Las lagrimas mos vienen en meldando su eskrita en forma de prosa. Los ke refuzan de ir a la armada para ser soldados devrian de regretar de sintirsen averguensozos de no ser komo el. Para poder protejar Israel dingun djudyo no devra mankar de azer su dover militar espesialamente los ke biven en el payis. Tsahal es la armada del puevlo djudyo i sin el Israel no poderiya egzistir. Mizmo el djudaizmo puede dispareser si Israel no es defendido. Ademas Tsahal es el ‘pot’ en el kual todos los djudyos vinyendo de diferentes payises del mundo kon tradisyones i kustumbres ke no se asemejan, se mesklan para formar una fraternidad ke dura toda la vida, lo ke aze la fuerza de Israel. Muestra nasyon devra akodrarse de las palavras de este soldado ke dyo a entender su apartenensya al puevlo de Israel. Nesesitamos de no olvidar a kualo apartenemos si keremos kedar djudyos.









Comments


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page