Pontes de tiempo&Despertar el selensio

Pontes de tiempo

Los dias bolan sovre pontes

yevados por el aire.

El kamino se alonja hasta el lugar

onde los sinios hazen sinios.

Un momento se va

el otro se entrega...

La rutina fragua muros

atados a kuedras kon enyudos blandos...

Se van dezatando en el tiempo

ke nase preguntando...

Un momento se va

el otro ya entregado...

-------------------------------------------------------------------------------------------

Despertar el selensio

Hay de despertar el selensio!

Me kedi selenciosa.

Hay de abashar al sotano y de suvir deznuda!

Me dishe, sin duvda!

Hay de kombatir kon mis ojos,

kon mi nariz y kon mi frente!

Me griti kon furia.

Margalit Matitiahu