Plantas vagabondas & De la distansia

Plantas vagabondas

Siempre las mismas eskaleras,

siempre la misma mar en el tejo,

y el sol se va rompiendo.

No des al temor ke te ame tanto.

Somos erantes

komo plantas vagabondas

pasando de un lugar sin nombre

al otro iluzionado,

onde las kolonas de kalor

kedan selensiozas

komo es tu boka de amor.

No des al temor ke te ame tanto.

De la distansia

Te yamo de la distansia,

te espando mis manos

de la memoria de los dias.

Tu figura aparese, flotando,

komo una holograma,

bolando sovre cayes y pontes

sovre alturas y montanias,

En los kampos de invierno,

en el murmuro del aire,

en las alas del pasharo

ke bushka el sol...

En el selensio de la kaza,

en la eskuridad de mi puerpo

onde nase muy estrania

la luz.

Margalit Matitiahu