ME VISTO TU KARA SOVRE LA MIA

ME VISTO TU KARA SOVRE LA MIA

A la memoria de mi madre Matilde Leon Reytan

Me visto tu kara sovre la mia, y kon tus ojos veo tu ermoza sivdad natal. La tristeza y la maravia te anvelopan en viendo lugares ke ya no los konoses mas.

Te amostro las kayes y las forterezas, y espando mi mano para ke tu de muevo puedas las piedras tokar.

El kamino me yeva verso la Torre Blanka. kon tus jovenos pieses suvo asta la punta alta, y tus memorias se ajuntan a las mias.

kon tu bos me siento prononsiar nombres konosidos por ti, sus figuras se arebiven kuando les konto por tu vida.

En supito, reflekta en mis ojos tu dulse sonriza.

---

NO ME YAMES LOKA

No me yames loka porke me bolo de mi puerpo,

No me yames loka porke enkadeno mi alma,

No me yames loka porke mis pasos me yevan a lo deskonosido, trubian mis noches gotas de vino amargo,

No me yames loka si te digo ke ay siekolos que te amo.