LAS ESKOLAS DE LA ALLIANCE ISRAELITE UNIVERSELLE

Mezmo ke los judyos bivyeron en diferentes jeografyas, eyos tuvyeron una vida similar bazada en tradisyones relijyozas fin el diziochen siglo. Esta similaridad empeso a trokar por los judyos de Evropa kon las reformas fransezas, i ansi empeso a formarse emportantes diferensyas entre los judyos oksidantales i los judyos oryantales. Kuando los judyos oksidantales empesaron a oyer los atrazamyentos de los judyos oryantales (kon la presa i el komersyo), eyos pensaron ke deven ayudarles para modernizarlos i ansi empesaron a okuparsen del "Problema del judaizmo oryantal".

Alliance Israélite Universelle (Unyon Judiya Universal) fue fondada por los judyos fransezes en 1860 para garantizar la libertad legal i sosyal de los judyos del Medyo Oriente i Afrika del Norte. El objektivo prensipal de la Alliance Israélite Universelle fue de reformar los judyos oryantales en trokando la forma primitiva de la edukasyon en el oryente. Avriyeron munchas eskolas de la Alianza en el Emperyo Otomano por la transformasyon de la komunidad judiya otomana, asigurando la oksidantalizasyon i la sekularizasyon de la komunidad.

Las eskolas de ‘L’Alliance Israelite Universelle’ (AIU) djugo un grande rolo en la modernizasyon de la edukasyon judiya de muestra komunidad en el dizimueven siglo.

En el empesijo, fondaron la eskola ‘Ecole Israelite Orientale’ en Paris en el anyo 1867, i los buenos elevos de diferentes payizes fueron arekojidos i mandados a Paris por estudyar en esta eskola.

Las eskolas AIU davan grande emportansa a la lingua i a la kultura franseza, ma el ebreo, la Bibla i los otros sujetos no eran tan estudyadas. Los elevos ke eskapavan estas eskolas, avlavan i eskriviyan en franses komo en las eskolas fransezas. Estas eskolas fueron las primeras ke dyeron una edukasyon evropea en el oryente.

Munchos mansevos ke eskaparon estas eskolas fueron muy reushidos i se izyeron dirijantes de las komunidades judiyas.

Mas duspues, las otras eskolas judiyas ke fueron fondadas en las komunidades judiyas fueron enfluensadas por el sistema edukativo de AIU.

Las eskolas AIU eran muy otoriter. Sin dar raporto al sentro de Paris, los dirijantes no puediyan dar dinguna desizyon.

En el anyo 1868, las primeras eskolas AIU de Estanbol, fueron fondada en Hasköy i en Kuskundjuk.

Komo en estos anyos, no aviya una eskola para las kreaturas de las famiyas proves, los dirijantes de las komunidades de Estanbol se sintyeron responsavles, i empesaron a okuparsen de eyos. Se adresaron a AIU, para ke les ayuden en la edukasyon de estas kreaturas i para parotejar la manseves de la enfluensa de las eskolas misyoneras.

Los dirijantes de la komunidad judiya penaron muncho para ke se avra otras eskolas AIU en el Emperyo Otomano.

Kon el ayudo de Baron de Hirsh ke estava en Estanbol, i kon el ayudo de un miyon de frankos, munchas eskolas AIU se avriyeron en el Emperyo Otomano. En Estanbol, en Balat, Dağhamam, Galata, Hasköy: afuera de Estanbol, en İzmir, Edirne, Kırklareli i en Çanakkale.

En el anyo 1912, aviya 71 eskolas de ijos, i 144 eskolas de ijas en el Emperyo Otomano.

Aparte de la edukasyon judiya, esta organizasyon se okupo de arekojer dokumentos del folklor i de la kultura judiya en diferentes payizes, i formaron emportantes arshivos.

Las eskolas AIU djudaron un grande rolo en el developamyento del puevlo judiyo. El puevlo judiyo se aklaro i se izyeron mas aktivos en el komerso i en los echos del gaverno en los anyos dalkavo del Emperyo Otomano.

Duspues de la Gerra Mondyal, las eskolas AIU pedriyeron el kontakto kon el sentro en Paris, i una a una empesaron a serrarsen.