LA SIRIA DE AL-SHARAA
- 13 dakika önce
- 4 dakikada okunur
Ay un siglo ke la Siria fue establesida despues de la Primera Gerra Mondiala en las tyerras del Imperio Otomano vensido i okupado por los 2 payizes imperyalistos de akel tiempo, la Britanya i la Fransa. Las frontieras de esta mueva entidad fueron trasadas por los dirijentes de estos 2 payizes sin tomar en kuento los lugares onde bivian etnias i sektas diferentes. Tal los kurdes, los sunnitos, los alauites, los arabos kristyanos, los druzes i mas fueron forsados de bivir komo sirianos en siendo, mizmo oy, divizados a no kerer ser una nasyon unida.,
Padre i ijo Asad de orijin alauita kon una mano de fierro fueron kapaches de dirijar el payiz fina a antes 2 anyos en kreando mas o menos una unyon nasyonala en dando a kada etnia o sekta una sierta otonomia de rijirse en sus territoryos komo les gustava. Despues de la kayida i del egzilo de Asad ijo, el payiz entonses se divizo en diferentes partidas. Los kurdes kontrolando una grande partida de la Siria del nord-este del Efrat kon el apoyo de los Estados Unidos formaron sus propya armada ke lucho kontra Issis i ke fueron dezde 2019 kaji independientes. Los sunnitos majoritaryos, enkavesados por Ahmed al-Sharaa, siendo apoyados por el governo Turko, fueron kapaches de konkistar Damasko, la kapitala i ansi de mirar a reunifikar el payiz en luchando kon los kurdes, los alauites i los druzes ke reprezentan las mas importantes minoridades de la Siria.
La destruksyon de la otonomiya kurda dyo komo se asperava un resultado negativo entre la otoridad temporarya fundamentalista sunnita de Damasko i los kurdes, lo ke izo pujar la inimista entre las 2 etnias ke persisten a ser inimigas. Dezde del Desembre 2024 importantes violasyones etno-sektaryas tuvyeron lugar supito despues de la kaida de Asad ijo. Durante Febrero/Marso 2025 los alauites ke biven al bodre del Mediteraneo fueron atakados en kantidad i matados por las milisyas sunnitas, en kontra partida de un atako de la milisya alauita a un punto de kontrol del poder sunnito. En Avril 2025 esta vez, los druzes fueron arakados por las unidades militaras de Damasko i por las milisyas islamistas afilyadas al poder de al-Sharaa. En Julyo 2025 los druzes de Sweida fueron masakrados en grande kuandidad ke eran kaji sin defensya, uvo mas de 1700 muertos.
Los Beduinos vizinos de los druzes i inimigos de siempre, avian arevatado komersantes druzes lo ke pusho a Israel a intervenír kon su aviasyon para defenderlos, koza ke forso a las fuersas de Damasko de travarsen de la enklave druza. No olvidar ke egziste paryentes entre los druzes israelianos i los ke biven de la otra parte de la frontiera. Esta klaro ke Israel no permete a ke a las sivdades druzas entren polisiya o armada sunnita. De vez en kuando el líder Sheik Hikmat al-Hijri i sus sempatizantes organizan manifestasyones en las kayes de Sweida para rengrasyar a Israel en demandando a ke el territoryo druze sea aneksado por Israel. Bien entendido no egziste unanimidad a esta idea, la kuala parese aktualmente utopista.
El dalkavo konflikto ke tuvo lugar entre las fuersas militaras demokratikas kurdas i las milisyas sunnitas fueron en Enero 2026 ansi los kurdos fueron ovligados de travarsen al este del riyo Efrat. Todo esto prova ke es difisil de amalgamar las partidas alauitas, kurdas, i druzas kon la de los sunnitas. Malgrado ke el fundamentalizmo muzulmano reprezentado por al-Sharaa i su klik mira de guadrar una uñita al seno de la Siria i malgrado la voluntad de los payizes oksidentales de apoyar el poder temporaryo aktual de Damasko, será difisil de topar un akordo entre las diferentes komunidades. Sin futuro, el solo remedyo a ke la Siria kontinua a egzistir es de estableser una federasyon entre las etnias, idea a la kuala la Turkiya se opoza del espanto de ver en el norte de la Siria un Kurdistan fuerte i dezvelopado kon intisyones de reklamar zonas del sud de su payiz povlado por kurdes.
Malgrado ke en parte las fuersas militaras kurdas se integraron en la armada nasyonala, serka de 8000 kombatantes kurdos refuzaron de azer parte, lo ke prova el sentimiento nasyonalisto ke egziste en el Kurdistan siriano. Los kurdes reprezentan el 10% de la povlasyon siriana i la SDF (fuersas demokratikas sirianas) de fakto mantienen una otonomiya en Kamishli, Kobani i Hasakah lugares ke reprezentan el korason del Kurdistan siriano.
Los alauites ke reprezentan el 12% de la povlasyon jeneral del payiz son organizados sovre 2 identidades: la primera es una asosiasyon relijioza-komunala fondada por los lideres aparteniendo al Konsilyo Supremo Alauit, la sigunda una kadena de personal armado organizado por komandantes del viejo rejim. Ademas ay el grupo yamado ‘Grupo popular de Rezistensya’ dirijado por miembros ke apartenieron a la armada i a las fuersas de seguridad del rejim Asad yamado Mikdad Fatiha. Viejos dirijentes del tiempo de Asad ke se topan agora en el Libano partisipan aktivamente a estas organizasyones, ma evitan de krear problemes al poder de Damasko.
A la eksepsyon de Israel ke mira de protejar los Druzes i la Turkiya de ayudar a los sunnitos no ay aktualmente dingun otro payiz oksidental ke mira de okuparse, de ayudar o de intervenir en los echos de al-Sharaa. Los Estados Unidos abandonaron sus proteksyon de los kurdes i los Iranyanos de los alauites. Solo el Katar kon la Turkiya, 2 disiplos de la politika de los Ermanos Muzulmanos miran de enfluensar el ambasador amerikano Tom Barrack, delegado de los Estados Unidos para la Siria de obtener el akordo de Washington para deshar al-Sharaa en poder.
Dezde un sierto tiempo al-Sharaa se keda kayado i no mira de provokar Israel, su armada topandose a 30 kilometros de Damasko, i no responder por el momento a la demanda del prezidente Trump de destruyir su prensipal inimigo, el Hezbollah del Libano. Kuanto tiempo mas al-Sharaa podra azer su ‘takkiye’ (rolo falso) para kedar a la kavesa del payiz, kestyon ke keda por las oras sin repuesta.
Dr.Selim Salti
Es ke meldatesh la eskrita de una semana antes?
Yorumlar