top of page

LA MANSEVES ES UNA VEZ











El tyempo esta pasando muy presto. Dainda ayer parese ke mandi la eskrita de la otra semana ya me vino el torno. Siguro en mandandola seya por meil seya por whatsupp kale meter emojis.

Sin emojis no es posivle de eskrivir mesaje, munchas vezes una kara ke riye, es ke es komik, u byen una kara yorando es ke le embaraso, un dedo es ke ya esta dakordo, palmas es ke ya le plazyo. Komo estos miles de semboles, rozas, pacharos, korasones no se kere dicho.

En pasadas me vino un meil  kon una fotografiya de tefilin. dishe sera del inyeto, le eskrivi  “ ijo de buena ventura”  por siguro debasho meti vente emojis.

Una semana dospues otra amiga me telefona:

-Forti en indo al tefilin del inyeto de Suzan me tomas i a mi kon la araba?

- Kon grande plazer  ma yo no esto envitada  

- Atyo komodo no te mando meil?

- Si ya me mando

- Eee kestas asperando muy bueno te envito

- No lo tomi por envitasyon

- Ande estas bivyendo? agora es esta manera se emprima una envitasyon i se manda a mil personas, ayde amanyana demanyana a las 8 tomtomame.ara ambezar no ay edad, e kale tomar regalo, no ay tyempo, yo dishe si agora es esta manera me azere moderna, de Vista kopyi i le mandi un meil kon una foto de una lira de oro debasho le eskrivi “MAZALTOV”.

 

Kuando eskrivo me plaze oyir musika. En sintyendo una ermoza musika me vyene mas presto inspirasyon. En la radyo empeso la kantika de ORSON WELLES, esta kantika en tomando anyikos me vyene mas sinyifikativa.

“I know what it is to be youngbut you, you don't know what it is to be old ““yo ya se kualo es ser manseva ma tu, tu no saves lo ke es ser vyeja.”

 

Antes 50 anyos si me dizian ke un diya va pensar komo mi madre me riyiya. Akeos tyempos, me burlava de los konsejos ke me dava i munchas vezes me inyervava, agora esto pensando i azyendo todo lo mezmo, Achakes de los teatros, syempre tuve relasyones kon los mansevos, i mansevas, es otra enerjiya, otras konversasyones otras ideas. Estar kon eyas es ambezar luguares de komer salatas, de la moda, estar al koryente de las eskolas, de la teknolojiya i lo mas mijor  me ambezaron a no bivir por la djente. No ay avlar de hazinuras i de kuras, komo estan todas byen estudyadas me ambezo munchas kozas ke no se i tomo plazer. Es kuryozo i eyas topan plazer de konversar kon mi.  Kreyo, porke ya me ambezi a oyirlas sin kortarles la palavra, no demandarles demandas ke no ay menester, peno a estar en  mezmo nivel.

 

Es verdad ke tomo plazer de estar kon la manseves, ma no vos pareska ke no tomo plazer de estar kon las amigas de mi edad. Por siguro mi lugar es al lado de eyas, a todas las kero muncho byen. Ma de vez en kuando ay unas ke kontan una operasyon ke se izyeron atras 20 anyos, kon la sal i la pimyenta. No kedo pasensya.

 

Tengo  amigas ke son mas de ermanas para mi, dingunas ke no mos manken, ni las mansevas ni las ke pensan komo mansevas. Kale saver la valor, porke

“LA MANSEVES ES UNA VEZ”.

HANUKA SAMEAH.


Forti BAROKAS










Etiketler:

Comentarios


Bizi Takip Edin
  • Facebook Basic Square
  • Twitter Basic Square
  • Google+ Basic Square
WhatsApp Image 2020-09-08 at 20.52.59 (1

İLETİŞİM

Telefon                           :+97236582936
Mail                                :turkisrael@gmail.com

 

KÜNYE

İYT Web Sitesi Künyesi:
Editör                             :Av.Yakup Barokas
Grafik Tasarım              :Şemi Barokas 
                                          Ovi Roditi Gülerşen

© 2018 by Turkisrael.org

bottom of page