Todos ya savemos ke las gerras emprovese los paizes i dan danyo a las destruksyones emportantes. Lo mas emportante a la ekonomiya global.
Dospues de las gerras los problemes son muncho mas fuertes de antes de las gerras.
En los ultimos anyos, kaji dos milyones de kriyaturas muryeron en las gerras. Ken muryo kon dolor, ken por no aver medika i lo mas muryeron solos. Kaji 3 milyones de kriyaturas kedaron deskapaches i munchos de los ke kedaron bivos, kedaron guerfanos sin madres sin padres sin famiyas. Nunka de sus vidas, no van a olvidar el espanto de akeas oras. Lo mas de estas kriaturas, estan leshos de una proteksyon de famiya, kualos en kampos para refujyados, kualos marjinados.
Los mas muncho ke ven danyo son las kriaturas muevas nasidas i debacho de sinko anyos. Esto lo pagan las famiyas porke no topan lo ke es menester para darles a komer i vaksinarlos para las epidemiyas.
Unos kuantos mezes antes tuvo barmitzva mi sovriniko. Mestava aparejando para ir a la fyesta ma malorozamente kon esta maldicha gerra no ayegi a irme. Tanto ke se aparejaron les kayo el gozo al pozo.
Para alegrar al mansevo, lo fyestaron en el lugar militar ke estava el padre. Kuando me mandaron el video me kayo las lagrimas dishe, porke pekados ke kulpa esta kriatura i kualo esta bivyendo, por siguro ke nunka de su vida no se va olvidar de este diya.
Alora, ande esta los derechos de kriaturas? Ande keren ke bivan, todos tyenen la mizma emportansa, sin apartar su kolor, su orijin relijyoza i su etniko.
“En la guerra nunka no ay ganadores”.
Me demando deke i por ken sestan muryendo tanta manseves?
Rogamos ke seskape este galut una ora mas antes i dingunos ke no tengan mal i muerte.
Agora desharemos las gerras porke ay diyas i mezes ke estamos kon las notisyas de la gerra. Arogo al dyo ke se eskape una ora mas antes ı mas ke no se mueran kriaturas, mansevos ni dingunos.
Por un minuto desharemos la gerra i sonriyeremos un poko.
<En el tyempo de la sigunda gerra mondial Moiz kon Salamon estan konversando:
Moiz ke dizes i a mozos mos toman a la gerra?
Agora te dare a entender:
Ay dos posibilidades Salamon, mos toman u no mos toman.
Si mos toman ay dos posibilidades, u mos mandan atras porke semos aedados, u mos mandan a la fronte.
Si mos mandan atras no ay problem, si mos mandan al fronte ay dos posibilidades.
U ganamos la gerra u pedremos la gerra.
Si ganamos no emporta, si pedremos ay dos posibilidades, u kayemos esklavos u mos murimos.
Si kayemos esklavos no emporta, si mos murimos ay dos posibilidades, u mos enterran u mos mandan a una fabrika de papel.
Si mos enterran no ay problem, si mos mandan a la fabrika de papel ay dos posibilidades, u mos azen papel de periodiko u mos azen papel de tualet.
Si mos azen papel de periodiko no ay problem si mos azen papel de tualet, Salamon akea ves estamos medra.
Kedavos en las buenas oras
コメント