Muy buenos dias keridos. Eskapimos kon el premier de el primer djugo kon bueno. Los partisipantes estan en una oforia, no egziste biervos para esplikar. Unas de las artistas estan kon una konfiensa; Barbara Streisand kedava chika en el lado de eyas. Unos enpesaron kon kuentos, a tomar shena en la Turkiya. I munchas bavajadas ke no vale la pena de notarlas.
Si miramos de el lado komo uno ke konose la ovra; no es ke no tienen razon, de egzajerar en el kavzo. A la fin; en Isreael por la primera vez! djugaron una piesa de ora i media, i en la lingua Ladino. Devemos de alavarlos ma; En todo kavzo prefero de selebrar la koza; kon mezura!
Kuando una ovra reushe; sale en medie tantos partneros de el sukseso. Ansi es en la vida, no se topo asta oy en dia; una otra manera de komporto. El ke konose su valor; no echa tino a esta egzistensia. Kontunea en su kamino…
En uno de los dias, despues de el djugo. Resivi una konversasion, (ganeden bueno tenga) de parte de el estimado Moshe Shaul. Me envito a una entrevista. Lo vijiti en su buro. Kara riente, la persone konsiente alegria renkontrando una porsona semejante. Ma seriozo de mizmo en su kantidad. Un personaje ke save lo ke kere. En la manera ke el prezenta su dezeo, muy difisil de refuzar.
Kurto, durante la konversasion ke da gusto, me propozo de inchir lugar, en la trasmision de la programa en lingua Ladino; eskrivir i derijir skeches, ke tomaran el lugar de "SHIMON, SHIMON" ( Para los ke sintian i se akodran)
Le espliki; sovre el grado de la lingua ke yo uzo. Ke es un poko diferente de la lingua ke se uza en las emisiones. Me disho: " Albert tu apareja lo ke pensas, ke seya kon una lingua limpia. Si nesesitamoz de korijar siertas kozas, mos asentamoz endjuntos."
Esto era una opurtunidad parami. Ma! la parte difisil era; kale abastar kada semana un skech. Yo komo uno ke es patron de famiya i lavoro; sera un pezgo, dopio en kantidad de lo ke puedo rezistir. Le prometi a tornarle repuesta i mos espartimos. Devià de pensar bueno, a no kavzar danyo a dengunos, a mi famiya en presipio. Pensar toma tiempo, ansi ke vamos a kontunear; a la semana ke viene. Saludozos i alegres.
(A kontunear)
Albert ANAH
Ladino: AMOR EN LA ZINGANERIA 13 anyos -Albert Anah
Comentários