LA ARABIA SEUDITA I ISRAEL

(Teksto-Audio)

Aktualmente estos 2 payizes dezde 75 anyos, inimigos achakes de la kestyon palestiniana nunka gerreyaron entre eyos, nesesitan oy de kolaborar en el aktual Medyo Oriente para renderlo diferente i mas unido. Los 2 governos de estos payizes paresen komo dos amantes ke no se deklaran sus amores achakes de paryentes ke los impiden de azerlo. Ay anyos, kon el ayudo de los Estados Unidos ke las 2 partes miran de rekonoserse de ‘yure’ ma no parvienen malgrado ke el prínchipe Mohammed bin Salman (MBS) esta pronto a azer el paso demenesterozo ma ke su padre, el rey i otros miembros de la famiya real no estan de akordo por razones de politika enterna. En la istorya vieja, los arabos i los djudyos no fueron nunka inimigos. Eyos enjuntos kombatyeron i sufriyeron de los kruzardos. Los raises de sus relijiones son komunas, kreyendo al Dyo uniko.

En la jeografia Medyo Orientala aktuala el mundo arabo sunnito mira de defenderse de la egemoniya shiita del Iran. Este payis siempre miro a kontrolar una parte de las tyerras de la Península araba. Egziste un konflikto sovre las reservas de gas del Golfo partajado entre la Arabia Seudita, el Kuweit i el Iran. La frontera marítima da derecho solo al 40 % de la zona al Iran el kual no respekta esta partisyon i pretende ke toda la zona le apartiene. En serka no mos enkantaremos si no sale un konflikto armado a este sujeto. MBS visto ke los Estados Unidos no le dan la garansiya de proteksyon ke el demanda, ovligado, se torno verso su inimigo istoriko el Iran i mira de estar en buenas kon el malgrado los konfliktos militares egzistentes en el Yemen. La Arabia Seudita todo en renyudando las relasyones diplomatikas kon el Iran no se siente en seguridad kontra una invazyon shiita, razón por la kuala siempre devra estar en alarme.

De otra parte los payizes sunitos de la rejyon todo komo Israel no están kapaches de arestar los proksis shiitos del Iran los kualos kontrolan el Libano, en parte el Yemen i la Siria i miran de aogar el Bahrain a majorita shiita i mas. El Iran no solo es un payis terroristo ke mira a establisir su superyoridad en el Medyo Oriente, el es en mizmo tiempo inimigo de los Estados Unidos i de la Evropa Oksidentala en ayudando militarmente a la Rusia en su envazyon de la Ukrania. Dunke el rejimen de los mollah si se arma de la bomba atomika reprezentera una fuersa destruktiva ke devra ser kombatida por el mundo oksidental, lo ke provokara por seguro una tresera gerra mondiala.

Entremientes kon el apoyo de los Estados Unidos los payizes arabos sunnitos i Israel devran krear un djenero de Nato ke los guadrara de una invanzion shiita. Para parvenir a un akordo semejante La Arabia Seudita i Israel devran kollaborar mano kon mano. La stratejia de defensa en el Golfo kontra el inimigo komun el Iran, dependera de la unyon de todas las fueras del Medyo Oriente si eyas lo keraran. No olvidar ke los puevlos inimigos evropeos despues de la Sigunda Gerra Mondiala se ajuntaron para bivir en pas grasias al Nato, de ke no aplikar esta mizma unyon en el Medyo Oriente?

De su parte en los dalkavos 2 anyos La Arabia Seudita grasyas a MBS troko su politika agresiva de las uniones islamikas seuditas ke kavzaron munchos danyos en el mundo. Munchas organizasyones karitativas internasyolas muzulmanas seuditas ke divulgavan una forma ekstremista del islam fueron arestadas. Nomare por echemplo la ‘Wahhabi charities (bienfezesyas)’, ke dyo grandes somas de dinero a los djihadistos a traverso el mundo i ke finanso el Hamas durante anyos a kometer atakos suisidaryos i sovre todo a organizar la segunda intifada. La organizasyon internasyonala ‘al-Haramain’, ‘La asamblea mondiala de la Juventud Islamika’ apoyaron todo modo de jinero de terrorizmo en el mundo sovre todo el Djihad Islamiko de Gaza. Dezde 2023 la Arabia Seudita aresto totalmente el ayudo material a las organizasyones terroristas, al Hamas en partikular, mizmo un santim no les fue embiyado. Aktualmete solo el Iran, el Katar i un poko la Turkia ayudan el Hamas.

Viniendo a la propagasyon de ideolojias ekstremistas, en el anyo 2001 ‘La liga mondiala muzulmana’ donde su sentro es en la Mekka, al seno del kual se gruparon ekstremistos del mundo arabo sovre todo ‘Los ermanos muzulmanos’ los kualos avian ayudado a espander ideolojias de terror global i krear inimista kontra el djudaizmo i el kristyanizmo en investisyendo milyones de dólares, en el anyo 2019 troko de politika despues ke la administrasyon MBS la ovligo a publikar ‘La charte(reglamento)de la Mekka’ ke fue basada sovre la tolerensya de la inter-relijiozita. Un anyo despues su sekretaryo jeneral se yevo una delegasyon a Auschwitz, lo ke mos enkanta, visto ke esto es un sinyal de un diferente parámetro. Dezde poko tiempo todos los livros de eskola primera fueron revizados i todo modo de inimista kontra los djudyos fue eliminado dando un sigundo sinyal de kerer estar en buenas kon el djudaizmo mundial.

Enfin dire ke MBS esta kreando una mueva sivdad “Neom” serka del Golfo de Akaba, una sivdad ultra moderna ke nesesita una kollaborasyon internasyonala i espesialmente la technolojia israeliana. La ambisyon de MBS es de azer de la Arabia Seudita un líder rejyonal i mizmo mundial. Sin el ayudo de los Estados Unidos i de Israel el es konvensido ke no arivera a su buto, todo en mirando de tomar kon diplomasiya lo mas de profito posivle de un akordo de rekonosensya del estado djudyo.

101 Kuentos Modernos de Djoha-Dr. SELİM YEHOSHUA SALTİ

Buy Now

Apretar al boton para ver todos los eskritos