ARASKAR LA KAVESA
Djoha turisto, mirando al Duomo de Milano, se le aserka un sinyor aedado akompanyado de su inyeto ke le demanda:” Perdon Sinyor usted es Israeliano?” Djoha enkantado le dize:” De ande intendites?” El Italyano:” Entendi ke sos Israeliano de la manera ke te araskas la kavesa sin kitarte el chapeyo!” Djoha le responde:” Dime sinyor kuando tu te araskas el kulo es ke te desbragas!”
LA YAVE
Djoha i su amigo Mordu dechizyeron de suvir los 24 kates(pizos) de un edifisyo en estado de kostruksyon para ver de la taracha serrada el panorama del lugar. No sea tus karnes, Mordu a delantre Djoha atras suven kon difikultad los 19 kates kuando Djoha se akodra i le dize a Mordu:” Saves kualo mos alvidimos de tomar la yave de la puerta de entrada!”
BEVER
Djoha dezde una semana, oras de tadre, komo de uzo se va al bar popular de la kaye Yarkon i komenda 3 biras. Se las beve ise va. Un dia el barmen le pregunta:” Sinyor Djoha ekskuza mi kuryozita deke dezde un tiempo komendas 3 biras, te las beves i te vas?” Djoha le dize:” Ya saves, Mordu, Yusifachi i yo somos muy amigos, los 2 se hueron a viajar por echo por muncho tiempo, me siento solo i para akodrandome de sus prezensyas bevo biras al lugar de eyos komo si estavan aki!” Una tadre Djoha ariva al bar komanda al barmen solo 2 biras. El barmen en serviendolo le pregunta:” Deke solo 2 i no 3 biras es ke uno de los amigos se muryo?” Djoha kon un ayre seryozo le dize:” No pur sedaka, sanos ke me esten, es ke yo kedi de bever!”
SERRA LOS OJOZ
Djoha oras de tadre va a vijitar ande de su ija Zizi. La koshuegra Sultana por azardo estava ayi. El inyeto Daryo se le asenta en la pierna i le demanda :” Papu por favor serra los ojoz.” Djoha kuryozo le dize:” Deke presyado?” Daryo:” Na, oyi esta demanya ke la granmama Sultana en avlando a mi mama le disho’ kuando tu papa va serrar los ojozos toda la famiya seva azer muy rika!”
SAVE TODO
Djoha mete una anunsya en el jurnal Hayom ke dize:
‘Vendo,Ansiklopedia de 45 volumes en muy bien estado, meta presyo, visto ke no la nesesito mas.’
Sovre esto su amigo Bensiyon el mustachudo ke meldo la anunsya, le telefona i le pregunta kon kuryozita deke vende su ansiklopedia a la mita del presyo?Djoha le responde:” Komo saves me kazi kon Merkada, eya ya save todo!”