top of page

KUENTOS MODERNOS DE DJOHA XVII




ALFONS MOS DESHO LA BUENA VIDA

Djoha sovre la desparesyon de ‘Alfons’ su azno, ke lo entero kon yoros, sintiéndose triste no salyo a kaminar buen kadar de tiempo. Su amigo Mordu vijitandolo le disho:” Ombre ya basta, el se hue al paridiso de los aznos i te desho solo, tu mira de topar un muevo.” Djoha kon lagrimas le dize:” Ande topare komo Alfons, oy no se uza mas beymas para viajar.” Mordu le responde:” Djoha, no seas espeso merkate un azno kon 4 karuchas, va za ver ke no demanda yerva freska ma ke solo un poko de benzina.” Enriva de esto se va kon su ijo Robert a un vendedor de otomobiles de segunda mano. Sienes de otomobiles están para vender i Djoha viendo los presyos dize a su ijo, ke dingunos no le plazieron.

Pasa una semana esta ves se va ande un otro vendedor akompanyado de Merkada, topan un chiko Fiat 500 ke le plaze a la mujer. Justo ke Djoha estava para dizir ke ya lo merka, se arepentye. Merkada le demanda:” Deke te arepentites, esta muy ermozo!” Djoha le responde:” Tienes razón kerida el karo tiene kuatro karuchas, ma la direksyon esta delante, yo la kereriya atrás!”

***

CURGUELOS

A Djoha le plaziya muncho curguelos. Merkada kada nada le gizava komida de curguelos a la Edirneliya (Danderne). Kada ves en modo diferente i es ansi ke eya se avia echo muy famoza en Batyam. Las vizinas dechizaron de a zer un medyodia de gizado sovre todo de curguelos, en el lugar de la Asosiasyon de los Turkanos de Batyam i la reyna del diya komo se asperava fue a la unanimita Merkada. Las vizinas le preguntan kuala es la resefta de la komida de curguelos ke le agrada lo mas a Djoha? Merkada suve a la chena i empesa a dar a entender komo giza este plato i dize:” Es muy fasil, una ves los curguelos eskaldadas ajusto el kaldo de karne i bien entendido un poko de ‘pereja’ ”. No eskapo de avlar ke todas kon grande kuryozita le preguntan:” Estas seryoza, ke metes kolonya en la komida? Merkada responde kon trankuilidad:” Siguro, si no komo durmo la noche al lado de mi marido ke no se keda de pedar!”

***

LA PERUKA

Djoha esta enamorado de una famoza artista, amor platoniko de sus eshuenyos. Un dia la renkontra en la kaye se aserka i le dize:” Sinyora si puede ser de darme un punyado de sus kaveyos esto pronto a darvos 100 dolares.” La famoza artista responde:” Himmm, si me das 500 dolares de dare la peruka entera.”

***

LA ORA DE TAKSI

Djoha torna de Estambol onde merko un muy ermozo aniyo yeno de piedras de valor para Merkada a la okazyon del aniversasyo de kazamiento. En salida de Ben Gurion se suve a un taksi kon la chanta chika de viaje onde guadro el aniyo. Arivan a Tel Aviv ma no poden avansar ke apoko apoko, pormo del trafik muy espeso. Aziendo kalor Djoha avre la ventana para tomar aver,sovre esto un ladron se aserka sin darse a konsintir, enkasha su braso i arevata la chanta. Djoha ampesa a echar gritos i aharvandose la kavesa kon las manos dizia :” Kedate, kedate”. Entremientes el shofer mansevo balagan sale del karo korye presto i aferra al ladron todo en oyindo Djoha ke diziya sin estarse:” Kedate, kedate”. El shofer de retorno en dándole la chanta a Djoha le pregunta:” Dime deke dizes kedate kundo yo koryo a aferar el ladron, no entiendo!” Djoha:” Es pormo de la ora del taksi ke kaliya kedarla!”

***

LA TALYA

Djoha vendedor de panyos de ombre en Yafo ve vinir un arabo a su butika. Supito kon un ayre altiguozo le dize en arabo:” Djudyo, D. es grande” Djoha no entiende le pregunta :” Ke talya?”


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page