Keridos lektores,
A mi umilde opinyón los kuentos i las konsejas komik mos ayudan a eskabuyirmos del stres i de la kanserya, porke riyir i deves en kuando echar tarakas de rizas ez un jinero de melezina ke mizmo kalma las dolores del puerpo. En despartes cugan un rolo importante para el dezvelopamiento del meyoyo del umano. Eyos en azyendo riyir, komo se save, mos ayudan a olvidar la aravya, la kolora i a ser manko inyervozo. Es esto, la razón por la kuala me gusta kompozarlos o adaptarlos. Espero ke los meldash kon plazer.
***
SONYO
A medya noche Djoha supito se esperta i le da una dada kon el kovdo a Merkada durmiendo al lado de el en dizyendole:” Merkada espertate presto.” La dezmazalada apenas avre el ojo i le pregunta:” Ya me espantates, kualo se pasa?” Djoha le dize:” Ayudame presto a topar mis antojos, por ke estava viendo un sonyo muy interesante, no lo kero peryer i verlo bien!”
***
EL TARTAMUDO
Merkada se hue ande su ija Zizi ke morava en un lugar peryido serka de Beer Sheva onde la sola koza interesante ke avia de ver, era la stasyon del treno. Una demanyada solika en kaza kon el inyeto Yarden se hueron a la stasyon, i se asentaron en un banko a asperar para ver vinir el treno. En supito, el shef tartamudo de la stasyon se aserka i les dize en tartaleando, ke en 15 puntos el treno va vinir. Efektivamente el treno viene i se va i los muestros kedan asentados. Un poko mas tadre se alevantan i se van a topar al shef i le preguntan a ke oras el treno para Tel Aviv viene. El shef mira a su selular i les responde:” Oootroos unoooos dieeees miminunutoos.” Merkada i Yarden se asentan por de muevo en el banko i asperan. El treno viene i se va i los muestros no se meneyan de sus lugares. Visto ke no avia kedado dingunos en la stasyon ke solo los muestros, el shef se mirikiyo,se aserko i les demando deke no se suvieron al treno? Merkada le repondyo:” Sinyor shef no es ke tenemos la intisyon de viyajar, ma ke solo le gusta a mi inyeto oyirte avlar.”
***
EL KARO
Djoha kijo ayudar i azer un jesto a su amigo Nesimachi ke se le muryo la mujer, hue a la ajensia de anunsyos para publikar el anunsyo de la muerte de la mujer del sinyor Nesimachi en el jurnal HAYOM. Djoha de la eskaseza i del espando ke le va kostar muncho eskrivyo en sima del formular ke le dyo el empyegado simplemente ‘ Se muryo mi mujer Klaricha esto triste, Nesimachi Alkulumbre ’. El empyegado le dize: “ Sinyor fina 20 biervos se paga el mizmo presyo. Sovre esto Djoha ajusta ‘Se vende Toyota 2002 en buen estado,adresarse al sinyor Nesimachi’.
***
AGAYAS
Djoha sintyo ke un muevo doktor de puso avyo su klinik al lado de su apartamento i komo sufriyendo de almoranas a no poder estar asentado koryo verso el . La sekretarya le disho de asperar porke avia muncha djente. Ma eya no manko de avizar el doktor de la vinida de Djoha, ombre respektado i selebre en la sivdad.
El doktor muy okupado le disho a su asistente en su primer dia de lavoro de okuparse en la kamareta de anlado de Djoha. Supito Djuha se topa en frente de un muy mansevo doktor al kual le dyo a entender ke esta sufriyendo de las almoranas. El asistente no entendyo el languaje de Djoha, le disho de avrir la boka i de dizir en gritando la letra A. Djoha se demando de si para si ‘yo tengo dolor de kulo el me dize avre la boka’. Sovre esto Djoha miro de darse a entender sin resultado, entremientes el asistente en gritando le disho:” Ken es aki el doktor tu o yo.” Djoha sin remedyo avyo la boka i vido ke este doktoriko después de la konsultasyon le ekrivyo una resefta por hapes ke kuran la dolor del garon.
Djoha al momento de irse i no siendo kontente de la vijita, supito se dezbrago i se aboko en dizyendo al asistente:” Doktor visto ke ya esto aki mírame si pode ser, por favor, las agayas komo están!”
***
LA SINAGOGA
Djoha un dia se topo en Bnei Brak i en kaminando en una kalejika estrecha renkontra a uno de los pretos vistidos al kual le pregunta onde se topa la sinagoga del kuartyer? El barvudo kon su chapeyo redondo de samarra le dize:” Kuala sinagoga demadas, aki ay un mabul de sinagogas.” Djoha: La ke no vos gusta frekuentar i onde se aze lo mas pokas orasyones?”