Vos avizare ke durante los mezes de la karantina del Kovid 19, estando sin kuafor el 90 % de las blondas se dezaparesyeron, en Israel!!
UN ANUNSYO
Djoha mansevo, mete un anunsyo en el jurnal Haaretz
‘Desidi de kazarme, so mansevo i solo, bushko mujer manseva.”
Al dia resive 100 repuestas:” Ven toma la mia.”
VIJITA
Djoha unos kuantos diyas antes Rosh Hashana telefona a su ijo Robert i le dize:” Pashayiko tu madre i yo dechizimos de espartimos. 40 anyos de kazamiento ya es bastante para mozotros!” i serra el telefon. Robert no save kualo azer yama a su ermana Zizi i le konta lo ke se esta pasando. Zizi se merekia muncho i alevanta un telefon a su padre i dize:” Aba, komo de dechizyon tuguerta tomatech de espartivos, pur sedaka no vaygash sin ke Robert i yo vinimos a Israel, al Gran Rabinato.” Djoha le responde:” Bueno presyada vos vamos asperar kon los inyetizikos.” i serra el telefon.
Merkada de su parte no entendiendo nada de las konversasyones entre padre i ijos, le pregunta:” Asi bivas Djoha kontame kualo estuvites avlando kon los ijos?” Djoha le responde:” Na, te estavas merekiando ke ivamos kedar solos por las fiestas, no ay mas de preokuparte Robert i Zizi i los inyetos están viniendo por Rosh Hashana, imajinate ke no les esto mizmo pagando los bilyetos de aviyon.”
KEN ES EL PRIMER
Merkado se kesha i le dize a Djoha:” Kreo ke ya basta este komporto ke tienes kuando tornas del lavoro i ke saludas en primero al perro!!” Djoha le responde:” No tienes ka estar en la puerta antes de el!”
GANAS DE KOMER
Merkada enkontra a Perla, su prima, en indose al charshi(bazar). En avlando Perla le demanda komo esta Djoha? I ajusta:” La dalkavo ves ke mos vimos me avias dicho ke avia peryido la gana de komer!” Merkada:” Si es verdad, ma agore esta mijor. Me lo yevi ande un buen doktor ke le konsejo de bever una chika kupa de konyak antes los pransos.” Perla kuryoza demanda:” Entonses?” Merkada responde:” Na, agora kome sesh vezes al dia.”
KENES BEBE?
Djoha una noche se va ande su amigo Bensiyon el mustachudo i le pregunta si se puede kedar por la noche en su kaza. Bensiyon le dize:” Kon muncho plazer te alikodo, ma no puedo darte la kamareta de los musafires por ke se esta kedando aya Bebe. Si keres durme en el kanape del salón o partaja la kamareta kon Bebe.” Djoha sin pensar le responde:” No, no me deranja de durmir en el kanape.”
A la demanyana en indose al banyo ve una guapa blonda, seksi, vistida de solo un string. Djoha enkantado le pregunta:” Buen dia ken sos tu?” La mansevika le responde:” Yo so Beatris, ma podesh yamarme Bebe. I vozotros ken sosh? Djoha:” Yo so el rey de los tontos!”