KUENTOS MODERNOS DE DJOHA XIII

Munchos lektores me preguntan deke kada 15 diyas publiko solo 5 kuentos o konsejikas. Al pareser, la kantidad no les abasta i keren meldar mas. Yo dire, ke para riyir i a su torno azer riyir, los kuentos devran sidos retenidos en memoria. Komo se dize muncho miel bulaneya(da angusya) ansi digo yo, esto es lo mizmo, la persona toma muncho mas plazer i se akodra mas fasilmente kuando la kantidad de kuentos es chika.

***

EL REY MALO I LOS KAZALINOS

En la antikita avia un rey en Kanaan muy malo, sanginaryo ke mizmo por una mirada tuguerta matava la persona. Un dia dechizio de ir a vijitar el kazal onde bivia Djoha. Mando a su ayudante para informarlos. Los povres kazalinos no supieron komo resivirlo i se.hueron ande Djoha el kual les disho de aparejar un grande pranso. 3 diyas i 3 noches se lavoro para el pranso ke le gusto muncho al rey, kuando vino a vijitarlos. El no se asperava tanto ceneryos de komidas kon tanto de savrozor. Para rengrasyarlos les mando, unos kuantos diyas mas tadre, komo regalo un elefante. El pakidermo durante 3 mezes no izo ke komer i derokar los kampos ensembrados. Los kazalinos no supieron kualo azer enfrente de esta desgrasya i le demandaron a Djoha komo salvarse de la beema. Djoha disho ke kalia ke todos los ombres del kazal esten prezentes detrás de el para demandar del rey la permisyon de mandarlo atrás. Djoha les disho ke no ay de espantar i ajusto:” prométeme ke no me vaj a deshar solo.” Todos juraron i se prezentaron delante del rey detrás de Djoha.

Kuando Djoha avyo la bako para responder al rey la razón de sus vijita , miro atrás i vido ke todos los kazalinos se fuyeron. Djoha en riva de esto disho:” Sinyor rey vine a informarte ke los kazalinos kon grande kontentes keren muncho bien al elefante ke les regalates i me demandaron de dizirte ke están prontos a resivir un sigundo !!”

***

DJOHA I EL GARSON

Djoha uzava ir al mizmo restoran kada medyodiya. Un dia el garson Zvulun ke sempre lo servia, vido ke se metyo a avlar al pishkado lufer ke le servyo. Zvulun le pregunta: “Sinyor Djoha tu uzas avlar al pishkado?” “Si” responde Djoha. El garson:”El te entiende, kualo le dizes?” Djoha :” Siguro ke me entiende, le pregunto novelas de mi primo de Haifa!” Zvulun:” I el te reponde?” Djoha:”Si me disho no podo responderte por ke ay un anyo ke me kitaron de la mar!”

***

EL PROPRIETARYO

Djoha una demanyana se va a vijitar el rabino Ovadya en Holon para demandarle ayudo para una bivda kon 3 kreaturas chikas, ke deve 5000 shekeles de kira. Si la dezmazalada no los paga fin a la fin de la semana el patron de kaza la va echar a la kaye. Ribi Ovadya se impresiona en frente de este kavzo i dize:” Povretika, va mirar lo ke podo arekojer de los yahides de mi sinagoga, ma entremientes te do 500 shekeles de mi parte.” Djoha:” Mersi muncho al nombre de eya kerido haham Ovadya.” Ribi Ovadya:” Dime Djoha eya es paryente tuya ke te estas okupando tanto?” Djoha:” Grasias por vuestra jenerozita sinyor haham, no del todo no tengo paryentes.” Ribi Ovadya:” Bueno de ande este intereso?”Djoha:” So yo el proprietaryo del apartamiento!”

***

DUDU (David)

Merkada vijitando su amiga de chikes Rebeka la topo triste i keshoza. Merkada:” Deke estas triste kerida?” Rebeka :” Kualo ke te diga, kualo ke te konte, si saves komo mi marido se komporta kon mi, kada noche viene a las 3 de la demanya medyo borracho.” Merkada:” Atyo na! la mizma koza se paso kon Djoha, ma presto se arepintyo de vinir tadre.” Rebeka:” Esto kuryoza de saver komo troko, kualo le izites?”Merkada:” Nada de espesial, no fue difisil de darme a entender, kada vez ke venia tadre después de medya noche le dizia -atyo tu sos Dudu?” Rebeka:” Eee kualo Dudu?” Merkada:” Rebeka te alvidates ke mi marido se yama Djoha?”

***

FUNERALES

Durante los funerales del rikinyon sinyor Kurzberg en el Monte de Azitunas en Yerushalayim, ven ke en un hal de perros Djoha no se aresta de yorar i de echar gritos de dolor. Un sinyor se le aserka i le pregunta:” Dizime por favor sosh de la familia?” “No” responde Djoha, el musafir “Bien de ke yorash?” Djoha:” Es justamente pormo de esto!”