DIENTES POSTIZOS
Durante la dalkavo gerra kon Hamas, Djoha i sus vizinos se toparon en el miklat(abrigo) en el apartamento de Nave Avivim en Tel-Aviv. Djoha se rendyo supito kuento ke se alvido los dientes postizos ariva en su kaza. Oh disho al vizino asentada al lado de el:” Me alvidi los dientes en kaza ire los tomare”. Justo ke se alevanto el vizino lo aferra del braso i le dize: “ Djoha ke te paresyo ke de Gaza te van a echar sandwitches, no nesesitas dientes!!”
**
LO KE NO SE TIENE
Djoha akompanya a su primo mansevo Davichon ke vino de la Amerika al aeroporto Ben Gurion. Vino la ora de espartisyon Djoha le pregunta a su primo:” Dime te plazyo Israel?” “ Manyifiko” le responde Davichon i kontinua “ Solo una koza me desplazyo porke la djente aki no eskapan de avlar de dinero, de kaza, de komidas, en los Estados Unidos al kontraryo se avla de muzika, de literatura, de arte..” Por seguro responde Djoha “ Kada una avla de lo ke le falta!”
**
5 FRIJIDERES
Djoha kuando vino komo ole hadash a Israel trusho 5 frijideres. En la duana le dishron ke el tiene derecho solo a uno, el fonksyonaryo le pregunta porke 5? Djoha se da a entender i dize: “se kere uno para la karne i un otro para el kezo “ Bueno le responde el fonksyonaryo “ Esto ke re dizir 2”. Djoha kontinua: “ Komo, se kere otros 2 para pessah!”. El fonksyonaryo dize: “ Bueno esto aze 4.” Un poko averguersado Djoha a boz basha le dize:” El sinken es para kuando va tener gana de komer puerko, pormo del kasherut, entiendes!!”
**
UN POKO KOSHA
El kazamentero le dize a Djoha ke se kere kazar :” Esta ves tengo un partido maraviyozo, mira la foto de la ijika komo es una morenika luzya.” Djoha le responde: “ La konosko eya no es la ija del djoyero sinyor Daniyel? “ Justo” le responde el kazamentero, “ Saves el montante alto de su dota? Tres milyones de shekeles. ” “ Si la tengo visto una ves, eya kosheava, es ke kontinua a koshear?” El kazamentero le responde:” No siempre solo kuando kamina!!”.
**
ESKUPO
Djoha de Israel se va a vijitar su amigo Andre ke bive en Paris. Andre una tadre de enverano lo yeva a Pigalle i en paseando el las kayes del foburgo kada ves ke renkontra una ermoza seksi mujer eskupe en basho. Una , dos, tres Djoha no se aresta. Andre kuryozo le pregunta i le dize : “ Dime Djoha kada ves ke vez una ermoza eskupes en basho de ke, es ke no te gustan?” “ Si” responde Djoha, “ No es sovre eyas ke eskupo.”” Bien” dize Andre “ sovre ken?” “ Enriva de mi mujer ke deshi en Tel-Aviv.”