“KUANDO EL BENADAM AZE PLANOS PARA EL AVENİR EL DYO SE RİYE”

En mi chikes, apenas eskapava Purim, en las kazas empesava un movimyento. Emprimero era enkalar la kaza i despues kon sira, azer kashones i kantones, lavar las mantas, dar los kolchones al hallach, abashar la loksa del yukri.

Mi nona ya empesava azer planos del seder de pesah. Kuando se aserkavan los diyas era majar la muez en el mortero, pasar la prasa por el tropito, eskaldar espinakas, kuantos kilos tomava mi madre no se, me akodro en tres leğenes blankos ke era leğenes de pesah, aviya tanta espinaka ke no topava de pensar kualo se va azer.

La semana dalkavo, entrar al mupak era defendido, no seya ke mesklemos el hamets al kasher.  El haroset por siguro se aziya en kaza komo todo lo ke se komiya. No aviya nada pronto ni cateringes.  El diya de kalhamira era untar siraj. Parladearlo (esto era mi echo), kemar la migita del pan, aparejar la meza del seder, ke aresiviyamos lo mas poko vente i sinko almaş.

Kuando eskapo esto todo era la sira de ir al banyo, vistir lo muevo ke mos merkaron i estrenar los kalsados de rugan. Ke pekado ke la jenerasyon de oy no syenten esta emosyon porke ya tyenen todo en la mano la ora ke keren.

 Mi madre tenia uzo de mandar gatos de pesah a los ke no puediyan azer. İ por esto mi papa traiya a kaza  kaji 150 guevos.

 Kreyo ke en dinguna nasyon, mas de mozos los djudyos, no egziste emplear 150 guevos en una semana.

Agora no ay ni majar la muez, ni pasar la prasa por el tripito, kon un robot no esta sureyando ni 10 puntos, el haroset kon un telefon te vyene fin la puerta de kaza, la espinaka no se kere dicho, si no keres penar ay paketos prontos, mundada i lavada, i mas mijor ay un alay de cateringes ke te esta enbiyando todo fina kaza mezmo los chinis, pirones, kuchiyos i kucharas.

No ay estrenar kalsados de rugan ni vistimyentas muevas de moed. Kon estos todos kolaylikes malorozamente no ay akeos pransos de trenta personas. Lo mas de famiyas tyenen a los ijos afuera la sivdad, una noche de moed se estan vyendo en zoom.

 Emprimero 2 anyos de pandemiya, djusto ke mos salvimos de esta hazinura, el otro anyo aki en Turkiya en Hatay uvo un rash ke muryo miles de almas, djusto ke keriyamos un poko olvidar de todo lo negro, i empesimos a azer planos para el avenir, salyo la gerra ke no mos desho gana de bivir. Todos los planos ke izimos se destruyeron.

Keridos ermanos, malgrado todo yene aparejaremos la meza del seder, kon kuantas personas ke ay, mos alegraremos i konsyenteremos este moed de salvasyon, azeremos lores ke estamos en kaza sanos i rezyos, estrenaremos una bluzika, un fular, una charuka mueva, rogaremos ganeden bueno ke tengan a los ke peryimos, pasensya a sus famiyas, todos ke tornen a sus kazas sin sar i sin mal, pas i piyadad en los korasones i en el mundo entero AMEN.   

HAG PESAH KASHER SAMEAH. 

Apretar al boton para ver todos los eskritos