KONSEKUENSAS DE LA GERRA DE 1973

(Teksto-Audio)

(Yazarı sesli dinlemek için tıklayınız)

La semana pasada komemorimos los 48 anyos de la gerra de Yom Kipur en la kuala no se desidyo en final ken fue el verdadero ganador. Israel, Misrayim , la Siria, o el puevlo arabo en jeneral?

Difisil de dar una repuesta justa, ma por siguro el payis ke meresyo lo mas el titolo de vensedor fue Israel, por ke si no vensiya el devia despareser de la jeografiya del Medyo Oriente, visto ke la intisyon de los ejipsyanos i de los siryanos era de destruyir el payis i echar a la mar o matar lo mas posivle de djudyos israelianos. Por esta razón Israel en defendyendose peryo serka 2800 soldados por lo mas mansevos koza ke kreyo una grande travma i una grande furya al seno de la sosiedad israeliana. Por lo mas la elit reganchon de la siedra ke estava en el poder no supo ver vinir la gerra en konfiyandose a las informasyones de la CIA ke avia dicho ke en dia de Yom Kipur el Ayifto no keria atakar, koza ke salyo falsa i ke kavzo un grande desorden en la armada israeliana por no estar pronta.

Malgrado todo durante 16 diyas Tsahal kon un nombre inferyor de soldados i de armamiento fue kapache no solo de arestar la envazyon de las armadas inimigas en el territoryo israeliano, las kualas peryeron enjuntos mas de 20.000 almas, ma de okupar tyerras ejipsyanas i siryanas i si no avia la presyon enternasyonal, los israelianos ivan un poko otro tomar la tresera armada ejipsyana en kativo. El profesor Avineri dize, no importa komo empesa una gerra, es al final ke kale juzgar su resultado. No juga rolo si la gerra de 1973 empeso mala basta ke ver el resultado ke dyo.

Malgrado, ke después de las ostilidades el moral del puevlo israeliano suvyo al pino, el payis peryo 10 anyos de su ekonomiya i se entrego a la dependensya militar i politika de los Estados Unidos, la kuala lo ayudo durante el konflikto. Desde de akel tiempo ke Tsahal uza en eksluzivita el armamiento amerikano. Ademas una de las razones ke la politika interna del payis troko de chapeyo fue la gerra de 1973, ansi la siedra desho su lugar a la derecha, la kuala troko el sistem de la ekonomiya ke konosemos.

En despartes de Israel los ke salyeron ganados fueron Anwar Sadat en persona i los Estados Unidos. Sadat sin muncho dar a entender a Hafez el Asad de sus intensyones de eskabuyirse de la Rusia fue kapache después del armistisyo de romper la tutela rusa i de achetar el ayudo Amerikano el kual era muncho mas favoravle del punto de vista del armamiento i del apoyo ekonomiko. La Rusia aviya dado durante anyos bastante armamiento a las dos partidas arabas ma nunka apoyo ekonomiko. El resultado fue ke Sadat salvo el Ayifto de la ruvina i ansi salyo ganyante achakes de la gerra de Yom Kipur. El sigundo ganyante fueron Los Estados Unidos porke ganaron muevos aliados en el Medyo Oriente. I a mi umilde opinyón el treser fue Israel ke se enrezesyo eternalmente en su jeografia.

Ma de otra parte uvo los ke peryeron i areyevan dainda las konsikuensas de esta gerra. Eyos son la Rusia , el OPEC i la Siria.

La Rusia kon sus tankes, sus aviones i sus misiles todo en siendo efektiva no ofresyo un ekipamiento invensivle, ansi el mizmo senaryo de 1967 se repeto. De punta de vista diplomatika la peryita fue muncho mas grande porke la gerra permetyo a los amerikanos de azer la pas entre Israel i el Ayifto i ansi decharla ahuera del sirkolo de influensa diplomatika de la rejyon.

De otra parte el kartel de los vendedores de petrol, el OPEC, donde los miembros ke no kavzaron la gerra ma ke miraron de inchir immensemiente sus trezoryos en inflijyendo un ambargo sovre el produkto en pujando su presyo quatro tantos, a la fin salyo peryido visto ke el mundo oksidental enfrente de esta situasyon, kon pasensya bushko i topo petrol en la mar del norte de la Evropa , fabriko karros chikos kon una konsomasyon basha i en muestros días el mundo entero mira de topar muevas enerjias las kualas izyeron kaer los presyos del varil debasho de los 30 dolares. I lo ke provoko a la kayida de los rejimes de Libya i del Irak i la ruina de la ekonomiya de Venezuela.

Kuando a la Siria, la famiya Assad no se rendyo kuento de su despotizmo i ke sus ambisyones de arevatar el Libano, la Jordania, israel i una parte del Irak i mizmo un chiko territoryo del sud de la Turkiya fue i es un eshuenyo ke no se realizara nunka. El proyekto de la Grande Siria fue dezde su anonsyo kaji muerto. Eyos insitieron i okuparon el Libano, atakaron la Jordania i para poder gerreyar vazyaron la kasha del estado afin de mentenir una grande armada, sin kerer okuparse de la prosperidad de sus propyo payis. Ansi ay 10 anyos ampeso la revolusyon siryana. Su estado desgrasyado ke kavzo milyones de refujiados i mas de medyo milyon de muertos no esta para eskapar. La diplomasiya de refuzar la pas , la obstinasyon de no kerer kreer una republika demokratika sovre la demanda del puevlo, el dedenyo de rekonoser derechos a las minoridades, el aventurizmo militar todo esto es el rezultado de las ideas ke se imajinaron en los anyos 70. Para mi es la Siria ke peryo lo mas en la gerra de Kipur i el Golan por demaziya.