KONSEJOS I SUS REALIDAD

 Buenos dias keridos, kon esperanza de recibir novedades alegres.

 De chikos anyos, me akodro; en kada okazion, sera si kavzimoz danyo

o ke mos dieron una ovra; resiviyamoz un konsejo. Konsejos; ke kon

anyos entendimos la valor.

Esta semana me akodri de trez konsejos. De el enpesijo de mi vida,

komo una kreatura; los adapti kon tyempo a mi vida.

Despues de mi kumplimiento de minyan (Bar mitzvah), Siendo ke estava

estudiando en el seminaryo, ke era pozisyonado en el sentro de

"Haskoy". I yo ke mi morada era serka la eskola, en "Mallem" (los

Haskoylis, konosen bien el deredor.) Me propozaron a menejar el depo

de elementerio ke apartiene a el mupak de la Eskola. En la eskola

Aliansa de Haskoy i el Seminaryo ke davan sus servisio en la mizma

kontruksion; los elevos resivian komida ora de midi.

El primer konsejo ke fue adaptado en mi meoyo fue"Aze buendad i echa

a la mar".... lo ke yo entendi de esto fue; ke el benadam en su vida deve

de ayudar, a los ke nesesitan. I esto deve de azerlo sin denguna

esperansa de profito.

A las vezes lo uzavan en manera; "Aze buendad i echa a la mar. Si

dengunos no, los peshkados lo saveran” ... (Seguro ke los peshkados

saven esto, asta ke el peshksdor, los peshkara.)

I yo; komo un ijiko bueno, ke en anios mas chikos; saliya a rekojer

donos; para el sinagog, el hospital o la komunitad. Aksepti la ovra. Ovra

ke me ovliga de; espertar kada demanyana maz antes de lo ke uzava.

Alkansar a avrir el depo. Sigun el menu de el diya. Pezar, i aparejar todo

lo ke nesesitan para gizar. Pasarlo a el mupak. Kontrolar si manka

desparte de lo ke egziste en el menu, adjustar todo i alkansar a la

eskola por mi edukasion.

Adelantando kon los anyos, un otro konsejo me akompanyo. Este

konsejo anke ke se siyente serkante a el konsejo primer. Es el kontraryo

basikamente. El konsejo dize " Plazer ke no tiene su profito, su danyo se

aspera.". Munchos entre nozotros, enpesaron kon el primer konsejo, i

munchas vezes se enkontraron kon el segundo.

Unos salen a Azer buendad sin esperansa de profito. A las vezes se

topan en una situasion, ke se azen de mil leyes; a la desizyon ke

tomaron para ayudar...

Un rabi me aviya korijado dizyendo; tu kontunea a tu bienfezensia. El

rabi, Kontuneo kon un treser konsejo ke me akodro. "Tov Shem

mishemen tov" ke ez; un buen nombre sera mijor de azete bueno. En

esto le di razon a el rabi. Le konti el kavzo, ke verdad mente afito en la

Turkiya. Una firma famoza ke munchos anyos la nombraron kon el azete

ke fabrikava. En uno de los diyas tomaron semplos de azete a la

laboratuar, para kontrolar la kalitad. La resultat fue ke el azete ke

fabrikan kontiyene kantidad grande de parafin mesklado ariento.

"TOV SHEM MISHEMEN TOV"....

Saludozos todos asta el renkontro ke viene. (A kontunear.)

Albert ANAH

Bağış/Donation/תרומה

Apretar al boton para ver todos los eskritos