top of page

KOMO AZER KON GAZA?




(Teksto-Audio)








Siempre ke se avla en Israel de la banda de Gaza, de esta enklave, onde biven kaji 2 milyones des arabos, nunka fue i sera para bueno i mos demandamos ke djinero de sekana mos aspera kon los grupos de terroristos egzistentes en este territoryo. Dezde la fundasyon del Estado djudyo ay 75 anyos nunka uvo repozo kon los de Gaza, ke durante miles de anyos los djudyos fuimos i estamos en konflikto.


En los diyas pasados el Djihad Islamiko echo un montón de raketas sovre los lugares vizinos de la enklave, en Israel onde kavzo un muerto en Rehovot. Por kontra los aviones israelis bombardearon los lugares stratejikos de estos terroristos fanatikos ekipados por el Iran, ke les da armas i dinero, en destruyendo rezervas de bombas, de kampos militares i mas.


La razón de este dalkavo konflikto fue ke Israel elimino 4 lideres importantes de esta organizasyon, difisil aktualmente de ser remplasados. El Djihad ovra independientemente del Hamas, organizasyon prinsipala ke dirija la banda, i resive sus ordenes del Iran el kual purfia a kerer azer danyo al estado djudyo, ke konsidera komo inimigo del islam.


En realita el Djihad no fue kapache de azer grandes danyos a Israel visto ke los miles de raketas echadas fueron destruidas por las raketas de los sistemas antiroketas ke los israelianos enventaron. Grasyas a su saverisyo el puevlo isreliano injenya su defensya, si no miles de siviles se ivan a murir. Malgrado esto los ke moran en el sud del payis sufrieron de truvyos psikolojikos i munchos de eyos decharon sus kazas, sus echos, para guadrarsen de la muerte. Mas de danyo material no servyo a nada el atako de los arabos ke solo dyo dezrepozo a la povlasyon israeliana. Ansi mos demandamos a kualo serven estos atakos? Sovre mi, a azer propaganda mintiroza en pretendiendo ke los djudyos matan kon bombas kreaturas, mujeres i aedados arabos de la enklave. Lo ke no es verdad, visto ke la armada israeliana nunka se permetera de komportarse ansi, i se puede dizir ke eya mira en kavzo de gerra a no matar siviles. Todas las provas egzisten a este sujeto.


Pekado de ver ke en el mundo aktual esta propaganda falsa izo su kamino. En el oksidente demokratiko egziste la konviksyon ke el puevlo de Gaza bive en una prizyon. Lo ke no es verdad visto ke Israel no es el solo ke kontrola las fronteras de la banda, sinon ke se las partaja kon el Ayifto. Ademas es falso de dizir ke Gaza es el lugar el mas povlado del mundo, Monaco, Makao son lugares por echemplo muncho mas povlados. Es verda ke egziste en la enklave una mizerya grande i ke los dirijentes del Hamas i del Djihad se inchen las aldikeras kon el dinero ke resiven komo ayudo internasyonal i ke al bodre del Mediteraneo egziste villas i moradas modernas okupadas por la nomanklatura de los ermanos muzulmanos, por lo mas sustenidos por el Katar i mizmo por la Turkiya en despartes del Iran. Es ansi ke el puevlo de Gaza kativo bive imprizonado, persekutado i diskriminado por sus propyos dirijentes ke no les rekonosen dinguna libertad. La banda de dirijentes de Gaza, por sus enteresos miran a ke la povlasyon kede prove, poko dezvelopada i sin lavoro, ansi poeder justifikar la lucha kontra Israel, okupante de la Palestina ke devra ser liberada. Eshuenyo grande, ma ke por las oras es visto komo realizavle.


Durante los akordos de 1979 Israel, miro de dar atrás este territoryo, al viejo patron, el Ayifto ke refuzo de tomarlo. Enfin en 2005 no topando remedyo a una solusyon achetada para una lunga truva el governo israeliano desidyo de travarse de la enklave sin obtener kualker akordo. Koza ke fue muy penivle para los israelianos biviendo en esta tyerra dezde 1967. La Otoridad Palestiniana no siendo kapache de dirijar el lugar el Hamas ayudado por los Ermanos Muzulmanos tomo el poder i la direksyon de el en echando i matando a todos los ofisiales ke Abu Mazen avia nominado. Ansi ampeso una peryoda ke alterna entre gerra i truva ke dura fin oy en dia. Es ansi ke las dos partidas miran de ganar tiempo, sin finalmente desidir ken el vensido i ken es el ganado.


Esta politika de asperar para ver si el inimigo trokara de atitud no traerá por seguro la paz. Ademas Israel en su tiempo izo el yerro de salir de la banda sin tener nada en mano, dechando a las organizasyones terroristas la posibilidad de organizarsen militaramente kon un arsenal riko. Difisil i muy kostozo en almas si Israel kereria rekonkistar esta banda. Todos los governos Israelianos ke se seguiron los dalkavos anyos no supieron topar formulas a este konflikto mizmo en azyendo konsesyones, kon la sola alternativa de mirar de ayudar al puevlo arabo de tener mijor vida koza ke se aspera ke forsara a los dirijentes del Hamas a trokar sus politikas de inimista en achetando una truva ke durera anyos. Deke no, ser optimisto es bien.










Comments


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page