KE PEKADO SER DJUDYO
- Dr.Selim SALTİ
- 3 gün önce
- 4 dakikada okunur
Djudyos ken somos, kestyon ke los goyim se demandan ma ke a mozotros no mos viene al tino. Kale ke los djudyos del mundo i los Israelis devran saver kualo eyos reprezentan en la umanidad, sus rolos, sus egzistensyas i mas.
Dezde el atako arepunyado del 7 oktobre 2023 el puevlo djudyo se izo una vez mas el objekto de una grande animozidad globala. Despues de la abominasyon ke areyevo en las manos de los barbaros i la repuesta ke el puevlo israeliano dyo, oy Israel es akuzado de krimen de gerra, de jenosidio i de limpieza etnika. Los niveles de aborresyon i de distorsyon son muncho mas egzajerados. Diremos ke esto no es muevo del todo. La razón verdadera ke Israel es ardamente atakado no es Gaza, o jenosidio, o la okupasyon de Yehuda i Shomron o sus luchas kontra los arabos, ma un grande tapon, un kapak para guadrar una koza mas profunda. El aturvo no es lo ke Israel aze ma lo ke es. Israel i a traverso eya los djudyos no serán nunka achetados komo nasyon libera. Esta nasyon tan chika no devra tener tanto fuersa dizen los manaderos antisemitos. Komo puede ser ke Israel no teniendo petrol, no una grande povlasyon, kondanado por las Institusyones Internasyonalas i sin tener alianzas importantes kon otros governos a la eksepsyon del de los Estados Unidos, enserklado por inimigos, kalomniyado por las selebridades mondialas se pueda defender?
La repuesta esta en ke Israel inova en el armamiento, en la medisina, en la seguridad, en la teknolojiya, en la agrikultura, en la intelijensya i en su puro dezeyo de kreatividad. Koza ke manka en munchos otros payizes inimigos de Israel o simplemente en el oksidente a mayoriya selozo enverso el saverisyo i la kreativita del puevlo djudyo. Transformimos eI dizyerto en una guerta fértil i además somos kapachis de aferrar las roketas antes ke mos agan danyo, savemos salvar arevatados kon misyones danjorozas i fuimos kapachis de ganar gerras ke se pensavan ser peryidas. El mundo antisemito en frente de esta realidad keda kon la boka avierta. Adjutare ke este mizmo mundo se ensela del futuro de Israel, porke entienden ke si el keda repozado se azera el payiz el mas avansado de la planeta. Esto los forsa a dar eksplikasyones falsas, a azer kashkarikas en los lobis a su sujeto i enfin a mirar de apretarlo kon diplomasiya i kon los medyos internasyonalos.
Deke los inimigos de los djudyos se azen medyos lokos en viendo su adelanto, por la simple razón ke entienden ke el fue el puevlo eskojido, ke el Todo Poderozo lo proteja de satan. No egziste semejante istorya de vida en otros puevlos ke la del djudyo ke sovrebive oy, ni los babilonianos, ni los romanos, ni los kruzardos, ni la inkizisyon, ni los pogromes, ni la Shoa no abastesyeron a ke despareska.
De otra parte kale en mizmo tiempo observar el puevlo de Israel i tener un espejo a las krizas enternas aktualas. Munchos isrelianos se olvidaron la istorya o no se la ambezaron komo kalia. Para munchos de eyos la identidad djudiya empesa en 1948 kon la fundasyon del estado. El egzilo largo, las persekusyones i la manziya de la diaspora les parese komo una verguenza, komo abokar kavesa a su destino. Ma no devran de olvidar ke 2000 anyos de galud i de sufriensa no abastesyeron a eliminar la determinasyon del puevlo djudyo a sobrebivir. Sin tyerra, sin armada, siempre persekutado los istoryanos se demandaron durante siglos komo un nes semejante pudo egzistir. A traverso los siglos los djudyos krearon una propya sivilizasyon spirituala i intelektuala malgrado ke los imperyos miraron a destruyirla.
Los fundadores del Sionizmo sekular tenían la esperanza de eskabuyirsen de la istorya misteryoza del djudaizmo. Eyos pensaron ke una vez ke Israel va ser un payiz ‘normal’ la metafizika spesiala de los djudyos iva desapareser i ke Israel se asemejara a las otras nasyones del mundo las kualas no serán mas antisemitas. Ademas si la ideolojiya sionista se espande en el puevlo djudyo su sufriensa i su galud desaparesieron, koza ke no es el kavzo oy. Al kontraryo kon el establisimiento de Israel el antisemitizmo pujo, el ansi se topo en una situasyon onde fue ovligado de gerreyar munchas vezes i kon maraviyas siempre salir viktoryozo.
Mas Israel miro de imitar a las otras nasyones muncho mas medyokre se izo. De ke ampeso, a tener konfiensa en su kapachidad militara kon tristesa se ve ke se izo mas vulneravle. La dalkavo ironiya es ke los goyim respektan djudyos ke se respektan eyos mizmos, ke onoran el djudaizmo i sus identidades. Es klaro ke en guadrando su identidad el djudyo no se eskabuyera del antisemitizmo. El djudyo vinsera el antisemitizmo kuando se tendra derecho i fuerte, una grande partida de la manseves israeliana realiza este fakto al kontraryo de las jenerasyones viejas ke no supieron rijir sus situasyones las kualas fueron sovre las influenzas de los ‘izmo’ ke los dezunyo. Sera djusto de dizir ke el tiempo ya vino para los djudyos de no dizir mas ‘ke pekado ser djudyo’.
Por el Dr. Selim Salti
Es ke meldatesh la eskrita de una semana antes?
Yorumlar