KADA ANYO KE FYESTAMOS PURIM, ESTE MOMENTO ME VYENE A LOS OJOS

Eskrito por un rabino.

Deke estava aya en en este momento?

Munchas vezes pensi en esto, i kada vez ke fyestamos Purim, este momento me vyene a los ojos.

Aviya empesado mi karyera rabiniko. Un myembro de mi komunidad me disho ke una mujer keriya avlar kon mi. Eya tyenyendo difikuldad de kaminar, si es posivle ke me vayga a su kaza.

‘Kon grande plazer’ le respondi, i tomi el adreso de la mujer. Me esto averguensando en dizyendo ke muncho tiempo negliji de kumplir mi promesa.

Una noche pensi ke maz no podiya tadrar mi vijita i me desidi de ir i avlar kon eya. Bushki el adreso kon grande difikuldad, i a la fin topi la kaza de la mujer. Un mansevo me avryo la puerta. Estava pronto para salir afuera.

“Yo so Rabino Blech, vine para avlar kon la senyora Kohen”.

El mansevo empeso a tremblar. No pude entender su reaksyon. “La senyora Kohen es mi madre”. Entrimos aryento. Kuando me vido la sinyora me disho ke estava muy kontente de verme. El mansevo ke estava pronto para salir, vino i se asento kon mozotros. La madre aspero ke se vayga para poder avlar kon mi. Ma, el mansevo no teniya entisyon de irse.

“No keriya avlar delantre de mi ijo, ma pode ser ke es mazal ke seyga ansina. La razon ke kije avlar kon un rabino tiene dariyaver kon el. Yo vengo de una kaza djudiya relijyoza. Mis avuelos eran orgoyozos de sus erensya djudiya, i bivyeron de akuerdo kon la tradisyon djudiya. Ma parese ke agora, estas valores se van a eskapar en muestra famiya. Mi ijo esta salyendo kon una mujer ke no es djudiya, i tyene entisyon de kazarse kon eya. Me esto konsintyendo ke esto me va destruir”.

Kon esto, el mansevo empeso a yorar en diziendo: “Tengo una konfesyon de azer, atorgar mi falta’’.

Me vino al tino ke akeya noche era noche de Noel, i pode ser ke el mansevo se iva ir a la eglizya kon su amiga.

“Sí, rabino, esto salyendo kon una kristyana, i mos keremos byen. Me esta azyendo presyon ke me konvertiska al kristyanizmo. Aksepti porke la kero byen. I esta noche, la konversion se iva realizar. Ya saviya ke iva ser muy duro para mi madre. I pode ser ke mas no me iva achetar en su kaza’’.

“Kuando estava salyendo esta noche, no estava salyendo solo de mi kaza, estava tambien salyendo de mi famiya, de mi pasado i de todo modo de atadisho ke tengo kon los djudyos. Esto iva ser mi separasyon del puevlo djudyo. Avri la puerta en pensando ke iva ampesar para mi un vida mueva. Me enkanti kuando te vide delantre la puerta, komo si estavas blokando mi kamino. Entendi ke esto no podiya ser una koensidensia. Esto era un mesaje. Entendi ke el Dio no keriya ke azyera lo ke teniya entisyon de azer”.

Yo no aviya eskojido el momento, el Dio me lo aviya eskojido. Entendi ke akeya noche, el Dio me aviya embiyado komo un mesajero para realizar su objektivo divino.

Yazarın tüm yazıları için tıklayınız