İSTORYA DE UN AMOR

El tyempo del İmperyo Otomano, su nono era Kadi de Bagdad, su padre teniya un posto en el palasyo del Sultan, el ijo presyado de esta famiya Mehmet Galip, teniya una vida muy rika, se engrandesyo kon mosas, en una grande rezidensya en el mijor sentro de Estanbol en Chamlidja (ÇAMLICA).

Mehmet Galip komo meldo en eskolas etranjeras, saviya linguas, fue envitado a Estonya para tomar una edukasyon superyor.

En una fyesta en Londra, rankontro una muchacha İngleza (OLGA) ke a punto se enamoro.

Se aserko de eya, de vista enpesaron a konversar. En avlando, Mehmet Galip se ambezo ke esta muchacha se iva kada demanyana a kaminar kon su kavayo a Hyde Park.

Una demanyana Mehmet, se fue a Hyde Park, Olga ya estava aya kon su kavayo. empesaron a kaminar endjuntos, komyeron en un restoran, esto kontinuo kada diya.

Estavan orozos, en un esfuenyo dulse. Ma una demanyana se despertaron de este esfuenyo porke Mehmet ya aviya kompletado su edukasyon i deviya de tornar a su pais.

Espartir no era posible sin pensar muncho Mehmet le demando a Olga:

“Keres kazarte kon mi i vinir a bivir a Turkiya”?

Eya salto de la alegriya. Unos kuantos minutos dospues empeso a yorar

Mehmet le demando

“Ke afito un punto antes estavas loka de la alegriya no me keres byen”

“Te kero byen a murir. Ma es emposible no lo puedo deshar a Jack”

“Jack? Ken es Jack”

Olga empeso a kontar:

“Mis padres, eran aktores de teatro, teniyan kompanyas ke viyajavan. Kuando mi padre muryo, mi madre fuyo a Australya kon un ombre de la kompanya i me desho kon mi nona maternel. Povereta mi nona, era prove, me protejo, me engrandesyo i me topo un novyo ke sola salvasyon era de kazarme. Ma las dezgrasyas no eskaparon, mi marido era soldado se fue a la gerra i mas no torno, desho detras una mujer de 16 anyos, prenyada de ocho mezes. Jack es mi ijo”.

Mehmet la abraso i le disho:

“No ay dingun problem mos vamos a ir kon tu ijo”.

Se suvyeron al Orient Express arivaron a Estambol.

Mehmet le disho: “No ay dingun problem” ma aviya problemes grandes.

Era los anyos de okupasyon, todos ansyozos del estado del pais. En este modo un estado trayer una mujer Ingleza kon un ijo era un dezastro.

Kuando entraron a la kaza de Mehmet, la famiya se revolto, el padre empeso a gritar:

“Dande salyo esta novya Ingleza”! En estando el pais yeno de Inglezes, komo nada es espiyona, ¡este ijo no lo kero!

Kurto el amor era muy muy grande, eya troko de relijyon se konvertyo en Muslumana, se tapo la kavesa, se troko el nombre, Olga se izo NADİDE.

El pais se salvo, se establisyo la republika. Todas las leyes trokaron. Un turko ke lavora en en una sosyeta del estado, no puediya tener mujer etranjera. Mehmet, komo teniya un posto grande, le propozaron de divorsar.

El esta propozisyon la tomo komo ensulto i les disho:

“Mi mujer desho su pais, su famiya, su echo, vino kon mi, troko de relijyon yo no divorso”.

I dyo su demisyon. Empeso a lavorar en echos diferentes para mantener su famiya. Entremyentes les nasyo i una ija i un ijo.

Ma malorozamente los echos no kaminaron bueno vendyeron platas, djoyas, kazas i fueron a morar a kazales diferentes, al fin kayeron a un estado de no tener un bokado de pan para komer. Eya nunka se kesho, syempre allado de su marido kon pasensya i kon amor.

Un diya vinyeron de la ambasada İngleza para tomar a sus ijos i edukarlos. Ma eya los arondjo de kaza les disho:

“Mi marido es Turko i yo so Turka mis ijos se van a engrandeser allado de sus padres”!

Mehmet Galip de las ansyas, se dyo a bever se izo alkolik i muryo, Nadide paso unos anyos muy difisil se izo hazina i muryo de pnomoniya en la kaza de su ija kerida i su ijo ke lo amava muncho.

Los Turkanos van a konoser muy byen a estos artistos famozos.

El ijo se yamava MÜŞFİK KENTER La ija se yamava YILDIZ KENTER.

Apretar al boton para ver todos los eskritos