7 mezes de gerra kon el Hamas no esta para eskapar. Todas las propozisyones de arestar el fuego no dyo resultado fin oy en diya, visto ke Sinwar tomo koraje del konflikto entre Israel i el Iran en el kual le paresyo ke Israel topandose en situasyon difisil de tratar va achetar kondisyones ke le dará la posibilidad de kedar bivo en Gaza, lo ke sinyifika una viktorya para el Hamas. El governo Israeliano no esta pronto a darle este gozo ma al kontraryo esta dechizado de atakar la sivdad de Rafiah en el sud de la banda para eliminar lo poko de fuerza ke les kedo a los terroristos. Ansi destruyir la fuersa militar del Hamas i de mirar a salvar los 133 arevatados israelianos.
Los payizes árbitros en este konfilkto kontinuan a renkontrarsen sea en Katar, sea en Kairo i mizmo en Tel Aviv para kontinuar a topar un akordo ke dará satisfaksyon a las demandas israelianas sin ke Sinwar sea matado. No se pensa ke una solusyon esta en vista, malgardo la presyon del puevlo israeliano de achetar lo mas de las kondisyones del Hamas kontra la liberasyon de los arevatados. El Hamas de su parte deklaro ke no esta mizmo en situasyon de liberar mas de 20 israelianos no saviendo onde el resto se topan ariento de los túneles sin fin.
Malgrado todo, komo la kestyon de Gaza sera rejidura despues ke la gerra se termina. Los dirijentes politikos oksidentales espesialamente los amerikanos i los evropeos de una parte, los de los payizes arabos visinos de Israel de la otra no entienden la politika ke Israel konduizera enverso los moradores de Gaza ke kere ke se rijen eyos mizmo, sin el Hamas i bien entendido debasho de su tutela, komo la semejante egzistyendo en Yehuda i Shomron. Se aspera ke un muevo konflikto, estaves politiko ampesara entre las partidas el kual no será del todo bueno para Israel. Ken i ken de las potensyas mondialas o rejyonalas se mesklaran i se ajuntaran kontra Israel ande las Nasyones Unidas ke será por seguro el ‘ring’ entre los adversaryos onde una partira de los payizes inimigos de Israel komo la Afrika del Sud i la Turkiya miraran por sus interesos internos de defender el Hamas, de un sujeto ke no los konserna.
Israel en matando el líder Saleh Arouri i eliminando en mayor parte la armada terrorista i en rekuperando bivos o muertos los arevatados se puede dizir ke arivo a su buto en deklarando una medya viktorya. Ma kualo va ser el futuro de Gaza una ves ke la armada israeliana se travara? Ken es ke dirijara los 2 milyones de otoktonos en la absensya del Hamas? Bueno o malo dezde 2006 la zona fue administrada por el diktad fondemantalisto islamiko, en su absensya ken es ke la tomara debasho su kontrol visto ke eya nesesita ser rekonstruizada i resivir asistensya de vida para la povlasyon traumatizada ke peryo moradas i negosyos.
Israel de su parte reklamara ke una ves salido de Gaza, ke no se formara un muevo Hamas para atakar su puevlo. Israel será muy egzijente a obtener de la futura administrasyon todas las asuransas a este sujeto. Los ekspertos israelianos i amerikanos pensan propozar 3 diferentes maneras de enstalar una administrasyon despues la gerra.
1- La Otoridad Palestiniana, la kuala kolabora kon Israel en Yehuda i Shomron podera aplikar el mizmo sistem en la zona de Gaza.
2- Krear al seno de las Nasyones Unidas una koalisyon internasyonala ke establisera la pas interna i dará ayudo umanitaryo por una peryoda limitada fin ke eleksyones liberas se poderan azer. Un modo de fuersa UN similar a la del Libano.
3- Formar un grupo de payizes arabos de la rejyon ke rekonosen Israel enjuntos kon el Ayifto i la Arabia Seudita, ke mandaran sus servisyos de polisiya.
Por las oras dingunas de estas 3 alternativas son buenas i realizavles deklara el profesor Nathan Brown de la Universidad George Washington, espesialisto en politika internasyonala. Difisil de poder establisir las alternativas 2 i 3 i dunke lo ke keda es de establisir la Otoridad Palestiniana. Muncho se avla a este sujeto ma ay 2 entrompesos mayores, los palestinianos eyos mizmos i el governo Israeliano. El governo Netanyahu es kontra el establesimiento de un payis independiente palestiniano, por esto no le gusta darle lugares muevos a administrar a la Administasyon Palestiniana, ke la topa además muy flocha. Los palestinianos de mezmo no les gusta los dirijentes aktuales espesialamente Mahmud Abbas, kaji eskayido ke kolabora kon Israel i ke devra retirarse de la prezidensya. Brown ajusta ke sin la asistensya aktiva de Israel la Otoridad Palestiniana no podera estar en poder en Gaza.
Bueno, se ve ke el governo i el puevlo Israeliano deklaran no kerer mesklarse de los echos internos de Gaza despues de la gerra. De su parte Netanyahu pensa ke los shefes de los trivos o ombres de negosyos kapaches formen un djenero de governo para administrar la banda de Gaza. Ma no olvidar ke la menasa de Hamas siendo prezente la elit ke dirijera la banda será intimidada i de ke no matada.
Kon regreto se ve las difikultades ke se asperan en los tiempos vinideros i ke dezrepozaran la vida en Israel. No uvo i no avra eskabuyisyon de Gaza sin topar una solusyon politika al konflikto Israelo-palestiniano. Ken save puede ser ke devemos asperar unas 2 jenerasyones i si no mas para salvamos de esta sekatura de kavesa.