Eskrivir o no eskrivir!

Muy keridos lektores.

Muestro amigo de munchos anyos, Selim Salti me telefono antes unos kuantos dias para demandarme porke no esto esto eskrivyendo ay tanto tiempo i kesharse de mi. Antes sinko o sej anyos, le avriya aprometido de eskrivir…

Me averguensi !...

Siendo ke tengo un grande respekto i una muy grande amistad, no puediya romperle el “hatir”.  Ansi es ke esto empesando de muevo.

Komo lo savesh, pasimos – i estomos dayinda pasando- dias muy fuertes desde mas de 6 mezes.  No savemos kuando se terminara esta gerra, ni kuando – o komo- muestros sekuestrados tornaran a sus kazas.

Estamos entornados de enimigos de todas las partes, sin kontar los del interior, los ke estan aki entre mozotros. Todos mos keren matar, echarmos a la mar i efasarmos de la karta del mundo.  “Ke no ayegen ni alkansen” komo diziya mi nona Fani Alyon, ke este en ganeden.   Kada diya oyir uno o dos atentos al kuchiyo o kon armas de fuego, kada dia una mueva menasa, kada dia oyir i meldar ke un muevo pais esta kontra mozotros …

Dayinda no terminimos totalmente kon Azza (Gazze) ke mos kontinua a menasar el Hizbullah en el Norte… Asta kuando???

En esta situasyon, ken tiene ganas de eskrivir shakayikas i burlas? Ma komo dizen, “la vida esta siguendo (kontinuando)” , devemos de bivirla komo se deve…  I ansi es ke, komo le aprometi a mi grande amigo Selim, va azer el esforso de eskrivir de ves en kuando.

Agora keridos Lektores, antes de terminar, vos kero demandar si es posible de azerme saver kon un chiko mesaje vuestra preferensiya.  Kualo keresh meldar? Kuentikos chikos i anekdotas, o komo mas antes, provermos i dichas de muestra erensiya sefaradi?

Pas i amor en el mundo i espesyalmente en Israel !

Donate

Apretar al boton para ver todos los eskritos