top of page

Esfuenyos Ekstraterritoriales




Oy en dia avlamos muncho sovre politikas de nasionalidad – ken va ser Espanyol, ken va ser Portugez. Posivle ke esta situasyon mos parese mueva ma por tanto mas de syen anyos antes, muestros bisabuevlos tambien avlavan sovre obtener papeles evropeos. En su livro Esfuenyos Ekstraterritoriales: Sivdandad Evropea, Djudios Sefardi, i el siglo vente Otomano, Profesora Sarah Abrevaya Stein (una inyeta de Chanakkalelis) mos konto de los esforsos i los modos ke djudios del Imperio arrekojian papeles protektivos de estados ajenos.



Miles de djudios, la mayoria los rikos, tentavan maneras diferentes de obtener papeles de proteksiyon. Munchos de eyos estavan en Salonik, Izmir, i Estambol, ma tambien los elites de Gelibolu i otras sivdades chikas. Estos djudios azian parte del sistem de kapitulasyones: tener un papel de proteksiyon (en vedra no es igual a sivdandad) les dio el derecho de eskondersen en tribulansas ajenos sovre echos komersiyales i mizmo politikos. Ansina evitavan los tribunales i las leyes otomanas, el askerlik, i a vezes los impuestos otomanos.



Komo obtuvieron estos papeles? Abrevaya Stein mos ekspliko ke una parte podian prezentar un orijin fiksiyonel de “djudios de Bayonne” en Fransia i achakes de esta istoria tener papeles fransezes. Otros utilizavan la mizma manera por Italya, komo “djudios de Livorno.” Munchos de estos ‘Italianos’ son sivdadinos de Italia fina oy; konosko algunos.



Un otro estado fue Portugal, komo oy, ke dio papeles kon la djustifikasyon ke los sefardim del Imperio yegaron de Portugal. No era posivle de provar ken en Estambol fue reelmente un imigrante de Portugal, o ken yego direktamente de Portugal. Dunke todos estavan “elijible” komo oy. Mas tadre, Espanya tambien se intereso en kultivar relasyones kon – en la frase de un senator Espanyol – espanyoles sin patria. Frankamente, en akel dia (i oy), la mayoria de los sefaradim no estavan interesados en “rekonsiliasyon” kon Espanya i no tuvieron dinguna nostaljia por un pais muy leshos de sus vidas. El avokato Gad Franko de Izmir ekspreso esta idea direktamente en una letra.



Abrevaya Stein mostro ke estos papeles se konvirtieron en rizikos en diferentes tiempos. En tiempos de gerra, estados protektores abandonavan sus protedjes o refusavan de akseptarlos en sus propias tierras o los okupantes los ekspulsavan achakes ke tenian “papeles del enemigo.”



En jeneral, el livro de Abrevaya Stein es una koleksiyon interesante de istorias de personajes de muestros bizabuelos. Viyajes a evropa, latinamerika, i mizmo a Delhi i Shanghai ande chikas komunidades de djudios de Bagdat se instalavan. Un livro kurto, Esfuenyos Ekstraterritoriales merese ser meldado.

Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page