ESFUENYOS BUENOS

Ayer demanyana me alevanti ke me va ir a ver a mi inyeto el chiko ke no se fue a la eskola porke estava un poko hazino. Tomi el kafe ke uzo, me visti, el tyempo esta maraviya desidi de yevarlo a kaminar i yevarlo a komer döner ke se tresale. Djusto ke va salir a kamino, empesa una luvya se esta avyendo los syelos. Koryendo me fui a la estasyon de otobus. Asperando el otobus dyeron anonso ke el otobus se bozdeo en el kamino, manko de una ora no puede vinir otro. Pensi kon esta luvya tomare un taxi, ande… ni un taxi no ay por semejansa, los ke estan pasando u estan todos yenos los ke estan vaziyos estan pasando en koryendo i no me estan tomando. Alora dishe tornare a kaza i tomare la araba. Torni a kaza, avri la chanta, komo no iva tomar araba no tomi la yave. Suvi a kaza avri la chanta bushko bushko, kon el telash ke sali de kaza, me olvidi de tomar la yave de kaza. Abashi ande la vizina ke tyene la yave de mi kaza, sono sono no ay dingunos. De muevo sali a kamino zar zor ya topi un taxi, me suvi, el shofor empeso a gritar ke le esto mojando los koltukes, ke son muevos, de vista ke abashe. Le arogi, mi ermuera lavora mi inyeto va kedar soliko kualo ay yevame kuanto es te pago.

Biride un trafik achakes de la luvya todos los kaminos se seraron.

Neyse ya vine ande mi ijo aryento las aguas, avri la chanta, la chanta de paras no tomi. Le dishe al shofor mi ermuera ya vyene, aspera un punto tomare de mi ermuera paras te pago, ke veyo, mi ermuera apenas me vido, kon adjile ke ya kedo tadre al echo, me meneyo la mano se suvyo a su araba i se fue. En diskutyendo kon el shofor, veyo ke mi inyeto se esta abokando por la ventana, me esta yamando.

Por aki el shofor me esta maltratando, por aya mi inyeto se esta abokando ya se va kayer, kero gritar i dizirle:

“No tabokes entra aryento ya esto vinyendo” no me esta salyendo la boz.

En supito me vine en mi. En mirando las notisyas de la televizyon, kedi durmyendo en la kanape de la kamera de asentar. Me desperti aryento la sudor.

Bendicho el dyo era un mal esfuenyo ke vide, las notisyas ya eskaparon ma yo dia entero estuve kon la enfluensa de este koshmar malo.

Keridos lektores,

Agora tengo solo un dezeo, una demanyana me kero espertar de este esfuenyo malo i sintir en las notisyas, ke la gerra ya eskapo, ke todos los esklavos ya tornaron a sus kazas sanos i rezyos, ke todos estan en pas, alegres i kontentes, i ke estan kantando

OSE SHALOM BİMROMAV U YAASE SHALOM SHALOM ALEYNU VE AL KOL İSRAEL VE İMRU AMEN.

HABERES BUENOS.

Apretar al boton para ver todos los eskritos