Es Superman judio?

“Up, Up, y Oy Vey” un livro eskrito por el Rabino de Jabad Simcha Weinstein esta kontando komo la istoria judia, la kultura i las valores judias ayudaron los kreadores judios a formar los karakteres del komiko.

La duble identidad ke estos karakteres biven, esta reflektando las dos vidas ke el judio de la diaspora bive; su vida privada komo un judio, i su vida publika. Estos superheroes estan reflektando el judaizmo en tres kontekstos diferentes; istoriko bibliko i kultural. Segun el Rabino Weinstein, eyos son los desendientes de una tradision judia yena de superfuersa komo Samson por egzamplio. Estos superheroes son lo mas etranjeros malentendidos en una tierra etranjera.

Los kreadores de Superman son dos judios amerıkanos; Jerry Siegal i Joe Shuster. Siegel i Shuster krearon un personaje ke reflekta las proprias valores judias. Segun Weinstein la istoria de Superman tiene paralelizmos kon la vida de Moshe Rabeno. Un padre salva la vida de una kreatura metiendola ariento de un sesto (o una kapsula espasial) i la embiya flotando a un muevo mundo ande va bivir en la seguridad. La kreatura rankontra una famiya mueva en su muevo mundo. Todo tiempo Superman esta gidado por el saverisio i los konsejos de su padre. Superman bive dos vidas kon una identidad sekreta. Komo Moshe Rabeno, Superman salva la djente de los dezastros.

Siegel i Shuster nunka deklararon ke Superman es judio i probablamente no tuvieron la entision de dizirlo porke en el tiempo de la segunda gerra mondial mezmo en la Amerıka aviya grande predjudizmo. En sus primeras istorias Superman en vezes kitava en medio los planes sekretos de los nazis almanes. Los amerikanos no lo puedian entender ma en su livro Weinstein eskrivio ke en el anyo1940, el ministro de propaganda de los nazis, Josef Goebbels denonsio Superman komo judío.

En su livro Weinstein esta kontando la enfluensia judia en los superheroes, komo Batman, Capitan America, Hulk, Los Kuatro Fantastikos, Spider-Man ı X-Men, la majoritad de estos karakteres son kreados por artistos judios. Todo empeso kon la reushitad de Superman.