(Teksto-Audio)
(Yazarı sesli dinlemek için tıklayınız)
Los israelianos maz de un sieglo están en konflikto kon los arabos ke se nominaron ‘palestinianos’ sea durante el Yishuv sea después de la deklarasyon de la independensya en 1947. Eyos kon sus antisionizmo, i sus antisemitizmo nunka kijyeron achetar a ke los djudyos tengan una patria en sus tyerras biblikas. Eyos fueron suportados por muncha djente a traverso el globo i malgrado esto Israel fue kreyado kon el suporto de la umanidad en 1947 i dezde esta data no manko de dezveloparse tal komo lo vemos oy en dia.
Difisil de entender el refuso de los dirijentes ke se sevgiron durante anyos de no kerer achetar la realita del voto de la Asamblea de las Nasyones Unidas ke espartyo la Palestina en 2 estados. La rezolusyon 181 avia dado muncho maz tyerras a los arabos ke a los djudyos. Komo dize la dicha, ‘nunka i no’, en no achetando el partaje eyos kedaron fin oy en dia sin governo independente,solo kon un chiko territoryo onde se establisyo después de los akordos de Oslo la Otoridad Palestiniana. La realidad es ke, sin el movemento sionisto, el kual fondo Israel, no se podiya avlar aktualmente de un ‘palestianizmo’, porke es el ke endirektamente ambezo a los arabos de Palestina, kualo es el nasyonalizmo. Antes 1963 no se avlava de palestinianos ma ke de arabos sirianos ke se establisieron en la Palestina, grasyas a las fasilidades dadas por los otomanos i achetados komo otoktones por el rejim mandatorio inglez.
Entremientes Israel se dezvelopo, se defendyo kontra toda la uma araba en gerreyando kon fuerza i determinasyon lo ke le permetyo de ganarlas. Ademas absorbyo milyones de djidyos viniendo del mundo entero i en 70 anyos fraguo un payis maraviyozo i dezvelopo, una ekonomiya al nivel de las grandes demokrasiyas kapitalistas del mundo. Viendo esta realita siertos miembros de la Liga Araba finalmente entendieron ke sus enteresos nasyonales no son maz konsilyavles kon la kavza palestiniana i en el konteksto aktual de la politika mondiala dechizyeron de achetar la realita israeliana i de rekonoserla tal i kual de yure. Los maz importantes payizes arabos komo el Ayifto, El Maroko, Los Emirates Unidos, La Jordania, el Sudan ke representan sin inkluir la Arabia Seudita la majorita del pueblo arabo, todo en achetando de kerer kompatir kon sus ermanos palestinianos, no son maz insistientes a tener una politika inimiga kontra Israel. Kuryozo de entender la grande inimista de los dirijentes azyendo partida de Abu Mazen i del Hamas en Gaza de no kerer rekonoser Israel komo entidad djudia i de sonyarse ke un dia eyos van a ser kapaches de destruyir Israel.
El negasyonizmo del palestianizmo aktual es basado sovre el intereso material de la sosiedad dirijente de los territoryos palestinianos ke se mantiene de la sedaka ke resiven de los4 puntas del mundo, de parte de la potensyas ekonomikas i de los payizes muzulmanos rikos. ‘Esta tetika’ abandonarla no será nunka en el entereso de siertos sezudos palestinianos ke se incheron i kontinuaran a inchirsen sus aldikeras tanto ke el konflikto israelo-palestiniano kontinuara.
De otra parte no olvidar los antisemitos de la siedra ekstremita mundial komo los de la derecha, ke todo tenyendo prensipyos kontraryos se unisan sovre sus inimista kronika enverso el puevlo djudyo. Ademas de ver este chiko estado enfloreser i ser achetado entre los grandes payizes ekonomikos de la planeta krea un selo i un dezeo muy grande. El BDS kreado por un grupo de antesimitos notaryos es un echemplo.
Sera una buena lisyon para los pokos ‘amigos’ i militantes ke kedan oy de la kavza palestiniana de entender ke las demandas maksimalas i sus apasyonamentos de no azer ninguna konsesyon enverso de Israel no da maz ayudo a los palestinianos. De Dublin a Durban i a Detroit la demanda urjente de estar fermos enverso la non rekonosensya de Israel komo estado djudyo i de konvenser la kaye arabo palestiniana ke esto les va trayer la viktorya final es una mintira grande i kapitala. Porke kada anyo ke pasa Israel se aze militarmente maz fuerte, muncho maz enfluente en la diplomasiya, maz integrado en la rejyón, kon una ekonomiya, una teknolojiya i una demografiya siempre maz grande. La Nakba (dezastro) no se eskapara para los palestinianos si no trokan de direksyon en sus komportos.
Kon un poko de sezudariya se entiende ke los palestinianos no son i no serán kapaches de diktar termos a Israel. Estos sozde amigos de la kavza palestiniana los embabukan en una intranzijensya ke los yeva solo verso una kaleja sin fin. De otra parte el antisemitizmo de estos manaderos radikales bazandosen sovre el garez viejo, pusha a los palestinianos a azer yerros sovre la realidad del diya de oy.
Despues de los akordos de Avraam, un muevo ayre viniendo del dizierto arabo, metyo en una mueva figura las mintiras i los aktos de inimista sovre Israel en una difikulta de defensya. Israel a poko a poko esta ganando su batalya en las Nasyones Unidas i al seno de la Evropa Unida en arekojiendo votos en su favor, lo ke mos decha pensar ke la kuandidad de amigos de los palestinianos se amenguan kada dia ke pasa. No será una surpreza si los otentikos amigos de la kavza palestiniana enkorajaran en un tiempo serkano a los dirijentes palestinianos de no repetar otra vez el grande yerro ke izieron el 29 Novembre 1947 i de no eskuchar maz los antisemites ke tienen komo solo buto de azer mal a djudaizmo a traverso la planeta.