No es posivle de mandar un mesaje sin emojis de bezos korasones i rozas.
Munchas vezes eskrives un mesaje, la repuesta si es solo una kara ke riye es ke es komik, u byen una kara yorando es ke le embaraso, un dedo es ke ya esta dakordo, palmas es ke ya le plazyo. Komo estos miles de semboles, rozas, paşaros, korasones de mil maneras. İnovasyones me plaze ma en vezes ya estamos abuzando, Malorozamente no esta kedando ni amistad ni amigavle. Fin las envitasyones de boda i de barmitsva sestan mandando kon whatsupp. Esto pujo en la pandemiya ma agora ya estamos mas libres, malorozamente ya kedo esta manera, Me akodro kuando ivamos den kaza en kaza kon ke alegriya a dar las envitasyones kon los nombres de los envitados kon una ermoza kaligrafi.
Komo me plaze azer shakayikas, kuando me vyene una envitasyon kon whatssup, de vista le esto mandando una fotografiya de una lira de oro, la verdadera no la estamos alkansando a lo menos kon la foto me kontentare, debasho le eskrivo MAZALTOV siguro kon vente korasones i rozas.
El otro diya me vino un mesaje de un eskritor nombrado HAKAN KINAY. Tanto me riyi lo kije partajar, no me echesh kulpa si esta un poko verguensa no es mi kulpa.
Koduğumun Kodu (le metere al kodigo)
La vida mos esta pasando kon kodigos. Las bankas, las kartas de banka, la segurita personal, el ofisyo de posta, e-governo, e-ospital, munisipalidad, el facebook, google, instagram, tweeter, Hotmail, gmail, mobil, zoom, empleyar de un sentro ofisyal todo kon kodigos.
Una konversasyon de telefon de un marido i mujer;
-Alo
-Ke haber hanum
-Muy buena
- Kestas azyendo
- Para ke te de repuesta kale ke entres el kodigo de marido i mujer
-Kualo ke kodigo loka salites
-Kerido, presto, lo ke tyenes 22 segondos
-22 segondos??? Aviyon es esto???
- Eskrive el kodigo de seguridad ke te vino kon mesaje al mobil i por sedaka no seya ke lo diğas a dingunos
-Ya eskrivi agora kualo ke aga
-Ande esta eskrivyndoe yo no so robot aze klik
-Ya ize
-Agora eskrive el kodigo
-Ya eskrivi no aksepto dizeme tu hanum
-Bueno eskrive uno kon majiskul otro kon miniskul
-Bueno yasto eskrivyendo dizeme
-MeKğarE.... Alo... alooo ya se korto
-Guaydimi te olvidates el kodigo,
- Me dize entra de muevo
-Entra
- Mesta demandando el meil, los tres shifros de alkavo del mobil, la alkunya de antes de kazar de mi madre, bre mi madre ay 20 anyos ke muryo ke alkunya kere?
-Aze atansyon El kodigo kale ke seya de ocho u mas karakteres
-Ya eskrivi, no akspto,
-Kale ke ayga letras majiskul i letras miniskul,
- No aksepto, me disho ke no esta muy konfiyente,
-Mete i shifro,
-Ya meti no aksepto,
-Kale ke metas sembolos de sinyo,
-Yene no aksepto, me disho este kodigo ya lo empleyi antes dos mezes,
-Mete otros karakteres, emprimero eskrive el kodigo vyejo,
-Si me akodrava no iva travar las makot de paro,
- Eskrive de muevo KE MeKğarE... ya aksepto?
-No! no eskapo
-Eskrive el kodigo ke te mado al mobil,
-Biride ya paso los puntos
-Ayde mira de muevo a los mesajes,
-Va salir loko yene ke kodigo me mando? Ha Ya lo topi ya esto eskrivyendo oh ya eksepto
-Ke eskrivites paşa
2./ LeMeteTeReAlKoDigo
Al vermos.
