EL ROLO DE LOS PROFESORES JUDYOS EN LA EDUKASYON TURKA

"Duspues del establisimyento de la Republika Turka, Mustafa Kemal Atatürk se metyo a azer reformas en el payis. Desde el anyo 1923 fin el anyo 1938, Atatürk se konsentro en la modernizasyon de la Turkiya, bazandose sovre los modeles evropeos. Sus variyos planos sovre la modernizasyon de la edukasyon turka avyeron el kamino a grandes reformas de las universidades de Estanbol i de Ankara.

El Ministro de Relasyones Eksteryores se adreso al Profesor Andreas Schwartz de Zurih sovre este sujeto i le demando de kontaktar los profesores de la Almanya afin de organizar un programa de reforma en el payis. El Governo Turko estava pronto a angajar estos profesores sin konsiderar sus relijyones. El solo kriteryo era la performansa akademika de los kandidatos.

ElGestapo peno muncho para meter obstakulos a la despartisyon de los profesores judyos ma el Governo Turko reusho a salvar los profesores ansi mizmo los ke estavan aprezados. Duspues de la muerte de Atatürk, en el anyo 1938, su suksesor ke era en mezmo tyempo su amigo entimo İsmet İnönü kontinuo la mezma politika.

El Govemo Turko sinyo kontraktos kon munchos profesores judyos i aksepto a pagarles una buena mezada. Los primeros anyos estos profesores fueron permetidos a ansenyar en sus linguas nativas kon traduktores, ma duspues del kuatren anyo, eyos fueron ovligados a ansenyar en Turko .

El 18 Novembro 1933, La Grande Asamblea Nasyonal (Büyük Millet Meclisi) kito una mueva ley i ramplaso la vyeja eskola (Darülfünun) kon la mueva, ke es la Universidad de Estanbol de oy (İstanbul Üniversitesi). Kon la dezinyasyon de los profesores judyos, la mueva universidad, en poko tyempo se izo uno de los mas grandes sentros de edukasyon i de investigasyon de la Evropa. Otras fakultades fueron tambyen fondadas: komo la Fakultad de Linguas, Istorya i Jeografya, la Fakultad de Juristos, i el Instituto de Agrikultura. Munchos de los sientifikos ke se fueron a Ankara fondaron las Fakultades de Arte, Muzika i Medikeriya en esta sivdad.

El ekspulzado architekto Clemens Holmeister ayudo a konstruir los edifisyos de la Asamblea Nasyonal i el profesor Paul Hindemit, el ediflsyo del Opera i el Teatro del Estado.

En el anyo 1935, duspues ke las leyes de Nuremberg se deklararon, los bibliotekaryos fueron forsados a abandonar sus karreras. Estos bibliotekaryos ke eran akseptados a la Turkiya aviyan aplikado un korso de tres mezes en las libreriyas. Eyos izyeron adelantar el sistema de las libreriyas en el payis en dando lekturas en las provansas, en establisando muevas institusyones, i en publikando magazines sientifikas. La majoridad de estos korsos se davan en las Fakultades de Medisina, Matematika, Siensyas Naturales, Siensya Juridika i Arte. Dozyentos profesores fuyeron de La Almanya a la Turkiya, los syen de entre eyos eran judyos. Profesor Robert Anheggar (kazado kon una mujer judiya) ansenyo la lingua i la litertura almana. El linguisto judyo Profesor Andrea Tietze ansenyo las linguas del Medyo Oryente i se izo turkolojisto en Los Angeles duspues de la gerra. El filolojisto judyo Profesor Erich Auerbach ansenyo literatura i eskrivyo el selebro livro 'Mimesis'. Los profesores Edward Said i Rudolf Nissan ansenyaron en la Fakultad de Medisina. El profesor E. D. Hirsch ansenyo la kultura literar. Los profesores Elife Newmark i Dr. Felix Hariwitz ansenyaron ekonamiya i el profesor David Zimmerman ansenyo istorya. Los bibliotekaryos Sorda Tledecke, Dr. Max Pfannestiel, Dr. Walter Gottschalk adelantaron el sistema de las libreriyas en diferentes fakultades.

Estos profesores kontribuaron a la organizasyon del sistema evropeo moderno en las universidades turkas. Eyos lavoraron kon muncha kerensya, se ambezaron el turko, tuvyeron amigos turkos i ansi kreyaron pontes entre el Oksidente i el Oryente. Munchos de eyos emigraron a los Etados Unidos duspues de la gerra, i unos kuantos resivyeron la identidad turka: Profesor Hirsch es uno de estos. Aparte de ansenyar en las universidades, syertos partisiparon en munchos proyektos reformadores en la Turkiya. El Profesor Albert Einstein les ayudo muncho para fuyirsen de la Almanya. Akeyos diyas, en munchos payizes evropeos se diziya ke 'La Universidad de Estanbol es la mijor universidad almana establisada afuera de la Almanya'.