(Teksto-Audio)
(Yazarı sesli dinlemek için tıklayınız)
Al tiempo, ken se lo pensava, ke el sistema sosyalisto del kibutz organizado en forma de kooperativa, onde se devia lavorar la tyerra en kollektivita por ombres i mujeres volontaryos sin ser pagados, komo un soviet, donde el buto era de poder dar a todos los miembros igualmente un tedjo i de kualo mantenerse , a ke, kon los anyos troke i se aga kapitalisto.
Los padres fondadores de Israel pensavan ke este sistema de sosieta viejo de 100 anyos va turar eternalmente. Si Ben Gurion bivia oy, se iva mareyar, surprenido de ver ke el kibutz se izo kapitalisto. Kualo fue la kavza de este fenómeno? La repuesta vo la dare umildamente de lo ke me ambezi a este sujeto.
La importante razon fue la dechizyon tomada antes 50 anyos durante el governo sosyalisto de krear industrias al seno del kibutz. Bien entendido esto no fue fasil porke los dirijentes malgrado el suporto material i los enkorajamientos administrativos del governo se endevdaron sin mezura a las bankas lokalas i etranjeras. De otra parte, no tenyendo una bastante eksperiensa del merkado enteryor i eksteryor ansi ke a sus senos de espesialistos de finansa, fueron obligados kon el tiempo a vender por un bokado de pan siertas de estas industriyas ke avian vinido al nivel de fayita.
Una grande partida de las fabrikas fueron establisidas en los anyos 1970 i 1980 , munchas de eyas en haveransya entre los kibutzes o kon sosietadas privadas de afuera del sistema. Los kibutzes no tenyendo sus propyos fondos fueron obligados de emprestarse dinero en grande kantidad en forma de kredito kurto o de mediano tiempo para realizar sus proyektos. Malorozamente esto kavzo un dezastro en la peryoda de la iperenflasyon de la ekonomia del payis ke forso los kibutzes a demandar ayudo del governo. En kavzo de refuzo esto keria dizir deklarar la fayita la kuala metiya en perikolo el sistema kibutz.
Entre los anyos 1989 i 1996 el governo de la derecha, las bankas i el movemento kibutz afirmaron 2 arreglamyentos para salvar los kibutzes donde el proseso fue terminado en 2010 sovre el kual 19/20 miliardas de shekeles de devda fueron anulados. La kondisyon ke akompanyo este ayudo fue ke el kibutz devia de ser estrukturado diferamente i si posivle privatizado koza ke rendyo sus miembros mas responsables porke la proprieta les paso a eyos . 30 por sien de los 270 kibutzes egzistentes fueron privatisados i el resto, todo en modernizándose kedaron en forma de kooperatif. Munchisimo de eyos engajaron espesialistos de afuera del sistema i mizmo empyegados i ovreros los kualos ayudaron a ke la industriya se dezvelope komo kalia durante estos dalkavo 10 anyos. Los responsavles del kibutz moderno entendyeron ke si no keren kayer una ves mas a ser forsados a demandar un arreglamyento devian partajar la direksyon de la industriya kon jente profesyonalmente kompetente de afuera del sistema, i mizmo azersen sosyos(haver) kon eyos. Esto dyo su fruto i finalmente se ve ke aktualmente los kibutzes se izyeron manadores de grande prosperita.
Sovre las analizes echas en estos dalkavos tiempos las industrias de plastik i de kauchuk ke reprezentan el 28 por sien(%) de la produksyon totala son las mas importantes i son segidas kon un porsentaje de 19 % del ekipamiento industrial i de makinas en general. Siegan kon 13 % los produktos agrikolos i komidas prontas, 11 % los produktos de teknolojia i de elektronika , 7% de la endustriya de papel, 6% de las melenzinas i produktos kimikos i mas. Serka del 60 % de las fabrikas de los kibutzes -140 de las 235- se topan en la región norte del payis, i oy en dia el risko de alishverish (negosyo) de eyas es muy basho.
Sovre las analizes de la sosiedad “Coface” las industriyas de los kibutzes trayeron en el anyo 2020 48.1 miliardas de shekel de revinido, i se aspera ke este anyo kon una pujita de 4.6% va ser 50.3 miliardas de shekeles, donde el volum de las ekportasyones depasara el 50% de las vendidas en generalas.
Komo se ve, liberados del viejo sistema los kibutzes se iziyeron sentros de rikeza i de dezvelopamiento. Esto grasyas a la kombinasyon de la privatizasyon del movemento kibutz, kon el estado de prosperidad del merkado israeliano i el dezeyo de sus miembros de kerer profitar de las oportunidades ke el dinero da. Kaji todos los miembros de los kibutzes industrialos se izyeron patrones de sus kazas i las dividentes ke resiven en siertos kavzos de las vendidas de sus aksyones depasan el milyon i medyo de shekel uno sovre otro. Avizo a los potansyal olim kon formasyon teknolojika de azer sus aliyas i de establirsen, si los achetan, en los kibutzes ke prometen un buen avenir.