DEFENDER LA BOMBA ATOMIKA

(Teksto-Audio)

En el Medyo Oriente de oy para ayegar a una pas estable es demenester de no dechar al Iran, inimigo djurado de Israel i de la Arabia Saudita de no poder posedar la bomba atomika. El solo payis ke la poseda siendo Israel, el no permetra nunka a ke el mundo shiito kon el kual esta en konflikto permanente a la eksepsyon del Azerbaijan, dezvelope esta arma destruktiva. El kontraryo avrira el kamino a ke los payizes sunnitos miraran de fabrikarla a sus tornos, estado ke no se podera mas kontrolar visto la inimista entre los puevlos ke biven en esta djografia.

Alora, kualo kale azer para esta kestyon ke dura dezde 10 anyos. Negosyar kon los Ayetollahes no dyo resultado visto ke eyos se espantan de peryer kon el tiempo sus rejimen teokratiko en kavza de akordo. Ademas se espantan de un sozlemantamiento visto ke el puevlo iraniano es sometido dezde un lungo periodo a un sistema anti demokratiko diktatorial, razón por la kuala miran a tener armada grande i bien ekipada. De otra parte los Ayetollahes pensan ke la posesión de la bomba atomika impidera a los inimigos ajenos de atakarlos i en mezmo tiempo ke eya dará el poder de enrikesersen i de enfuertesersen en la politika de vendida del petrol.

El pazvan del mundo Los Estados Unidos en akordo komun kon Israel se deklaro pronto a atakar las estalasyones de enrekesimiento del uranium en Iran si diplomatikamente no se topa una solusyon. Ma en estos dalkavos mezes detrás de puertas serradas, los dirijentes amerikanos miran de tratar kon los kolegos iranianos, una vez otra, a poder konverserlos de arestar el proyekto atomiko kontra dezblokar miliardas de dólares blokados en las bankas amerikanas. No se save si los dechizadores iranianos poderan ser merkados, visto la panaroya egzistente en eyos. Kon pasensia asperaremos el resultado. En todo kavzo los Estados Unidos no keren ser muncho implikados en los konfliktos del Medyo Oriente, koza ke deranja Israel.

Eske en las kondisyones aktualas Israel podera solo sin ayudo amerikano, atakar las instalasyones nuklearas del Iran, i mizmo sus depos de armamiento balistiko? Ken dize si, ken dize no, ma lo mas preokupante son las konsekuensas ke seguirán los grandes danyos kavzados en estos 2 payizes despues del atako. Ma djustamente a esto sovresale la “doktrina Begin” ke istorikamente mos ambeza ke en kavzo de vida o de muerte, ovrar adelantre i pensar las konsekuensas despues es mas lojiko. En el 7 Junyo 1981 erev Shavuot la armada aeriana Israeliana (IAF) sorpresyo el mundo en atakando i destruyendo el reaktor nuklearyo de Osirak ahuara de Bagdad. Begin pensó i vizo djusto, no fiarse de dinguna manera al sanginaryo diktator Saddam Huseyin inimigo de su payis. Israel no devia de estar las manos atadas a no azer nada kuando el Irak grande inimigo dezvelopava arma nuklearya.

8 F-16 i 6 F-15 avyones de gerra partyeron del Sinay, indose 1000 kilometros en territoryos inimigos, Jordanyano, Saudiano i Irakiano i en justo 2 minutos aharvaron i derokaron el reaktor en konstruksyon. Los aviones tornaron a sus bazas sin tener dingun danyo. Ek kod de la operasyon fue yamado ‘Opera’ la kuala fue resivida kon un antusiazmo inegualo en Israel, ma kritikada i kondanada en las Nasyones Unidas por el Konsilyo de Seguridad, i mizmo por Los Estados Unidos ke deklararon sus dezakordos sovre el atako en amenazando de no dar mas F-16 a la IAF. En akea epoka la administrasyon Reagan mirava de aserkarse de Huseyin, i por esta razón se sintyo en estrecho de no ser avizada del atako. Ma anyos despues de la gerra del Golf el ministro de la defensya amerikano Dick Cheney mando al jeneral israeliano David Ivry el kual fue el komandante de la IAF durante la operasyon Opera una foto satelita del reaktor derokado diyas despues de su destruksyon onde eskrivyo ‘kon mis rengrasyamentos i mi apresyasyon, izitesh muestro lavoro mas fasil durante la kampanya La Furtuna del Dezyerto’.

En Israel el espanto del risko de vida ke podiyan tener los aviatores en territoryos inimigos i el perikolo ke se podiya anular el akordo kon el Ayifto nuevamente sinyado, deskorejo muncho de los miembros de la struktura de seguridad de la Kenesset ke fueron kritikos de Begin, a sinyalar Yigal Yadin, el kapo del Mossad i el kapo de la intelijensya militar. Mismo viejos ministros de la defensya komo Ezer Weizman i Shimon Peres prezidente del partido Avoda se deklararon kontra una tala aksyon. Entonses nada de mal akontensyo a Israel visto ke Saddam Huseyin no tuvo la okazyon de fruaguar de muevo su reaktor, preokupado por defenderse kontra la envazyon amerikana, despues de la kuala fue enkolgado.

En el mes de Septembre 2007 la doktrina Begin fue demuevo aplikada kuando el primer ministro Olmert ordono a la IAF de derokar el reaktor nuklearyo de Sirya ke se avia empesado a ser edifikado en sekreto en Deir ez-Zor. Operasyon reushida ke demuevo enkanto la umanidad i lo ke no permetyo al diktator Bashar el Assad de empleyar su arma nukeyara mas tadre sovre su propio puevlo. Despues de este atako nada no akontensyo en Israel visto ke la Sirya se kedo muda.

Eske por la tresera ves la doktrina Begin puede ser aplikavle al Iran, esto es la kestyon aktuala ke preokupa el primer ministro Netanyahu i los shefes de Tsahal, la armada israeliana.

101 Kuentos Modernos de Djoha-Dr. SELİM YEHOSHUA SALTİ

Buy Now

Apretar al boton para ver todos los eskritos