top of page

ALIYA ES LIBERTA


(Teksto-Audio)

(Yazarı sesli dinlemek için tıklayınız)



En estos diyas de pessah ke selebramos kon joya la fiesta de la libertad, los savyos mos ambezaron ke antes 3300 anyos los djudyos eskapando la servitud de Ayifto i asperando 40 anyos en el dizierto antes de vinir i konoser la tyerra promitida, se demandaron kualo será muevo i kualo los asperava. Durante el sieglo pasado después del galud ke duro kaji 2000 anyos mozotros djudyos dispersados a traverso el mundo ampesimos komo muestros antepasados a retornar a bivir en esta mizma tyerra promitida por D. i es ansi ke yamimos esta suvida a Israel ‘aliya’, en demandandomos kualo va ser la muestra vida futura aya.


No ay duvda ke en los días modernos kada trokamiento de sielo traye a kada persona, a kada famiya eksperiensas partikularas i personalas ke solo kon el tiempo eyas mos kontaran sus kombates kontra las difikultades ke renkontraron durante sus establisimientos en tyerra de Israel. No es fasil de ser imigrante, espesialmente en Israel si la persona no konose el ebreo, su idioma nasyonal, las kustumbres diferentes, la kozina espesiala, la difikulta de no poder topar fasilmente lavoro mizmo si el es armado de un saverisyo alto en konosensyas umanas o de teknolojiyas. En siertos kavzos abandonar un verdadero konforto de vida nesesita un koraje ideolojiko remarkavle, ke esto pensó devra ser la mueva definisyon del sionizmo.


En partida ya paso la primera moda del ideal sionizmo de baza ke antes de la independensya de la patria djudia era el tema prinsipal ke dava a entender ke kaliya sin kondisyon sakrifikarse para arebivir la tyerra ke avia kedada en estado primitivo. La nosyon de sakrifisyo de los padres fondadores del Israel moderno i sus determinasyones sosyalas de bivir solo para dezvelopar el payis ya izo su kamino. Oy Israel es un payis yeno de teknolojiya avansada, militarmente fuerte i inovativa en la industria i el komersyo. Su povlasyon de mas de siete milyones de djudyos dizen ke tienen una vida oroza, demokratika i justa. Los istatistikes lo pruvan, los israelianos son kontentes de bivir en mayoriya en sus payis. Es seguro ke egziste una minorita en la diaspora ke no se siente del mizmo avizo i si pensa ke Israel no es para eya no tiene ke de kedar ande se topa en tomando el risko en munchos kavzos de ser minoritarya entornada de antisemitizmo. Los ke se topan en estrechura de parnasa o en estado de inimista en el lugar en el kual biven, por lo seguro, Israel es tyerra de salvasyon.


Israel es un mirakolo para akel ke se siente djudyo. Afiguravos lo ke muestros muy viejos ansyanos estarían prontos de demezuramente sakrifikar para solo poder respirar unos kuantos momentos el ayre kalyente de Israel, kuando a mozotros mos viene oy natural. Somos orozos de orasyonar al todo poderoso i repetar las orasyones de muestros antepasados ke miles de anyos arogaron a poder vinir a bivir en la tyerra promitida, en Yerushalayim.


Bien entendido vos dire ke Israel no es el ganeden de muestros eshuenyos, egziste en su interyor difikultades seryozas, komo la burokrasiya ke da afedento , el snobizmo entre las diferentes klasas popularas, los ashkenazes de una parte los mizrahim(oryantales) de otra parte, los muy relijiozos ke no rekonosen mizmo el establisimiento politiko, los laikos ke son kontra eyos, los arabos non asimilados ke miran ser de parte de los teroristos, la difikulta de achetar a los djudios de kolor viniendo de afrika, todo esto tomara tiempo para normalizarse. En mayoriya todos estos grupos son komo trivos ke todo en biviendo en djuntos no se mesklan fasilmente. Ademas la vida politika politisyana aktuala del payis no permete a ke un governo se forme porke la lucha es entre los politikos ma no entre las diferentes ideolojias sosyalas. Los partidos de la derecha israeliana por ke razón tyenen dirijantes ke pormo sus egos no se meten deakordo para formar un governo stavle.


A esta okazyon kero, keridos lektores, dar mi sentimiento sovre la aliya de los djudyos turkanos de antes la fondasyon de Israel fin oy en dia. Komo se save istorikamente los djudios turkanos son los ke kedaron kaji 80000 a bivir después de la kreasyon de la republika turka establisida por el grande líder Mustafa Kemal Ataturk en las frontieras aktualas de este estado. Erensya de los sultanos otomanos los djudyos se toparon supito no apartener mas al puevlo djudyo ke a ser sitadinos de relijyon djudia. Aziendo parte de esta minorita miro kon entereso la aliya echa por esta entitad ke no sufriyo de las matansinas del nazizmo. Durante los anyos 1935 a 1945 mas de 4000 djudyos turkanos suvieron a la Palestina debasho del mandat inglez, la mayoriya siendo sionistos de la primera ora de la segunda imigrasyon evropea.


En 1950 sovre la independesya de Israel, la mayoriya de la povlasyon prove , kaji 35000 personas ke no tenían nada de peryer ma ke al kontraryo de ganar en eskabuyendose del antisemitizmo de las otoridadas de Ankara durante la Sigunda Gerra Mondiala suvieron a Israel i eyos fueron los ke sufrieron lo mas de las difikultades primeras de la kreasyon del estado. La aliya turka kontinuo sempre a una kadensya flocha ma en los anyos 1970 i en los anyos 1980 uvo 2 otras importantes aliyas, esta ves de los desendientes esnafes (bourgezos) edukados los kualos se asimilaron kon perseverensya a las kondisyones del payis. La aliya aktuala es limitada a serka de 100 personas por anyo. En realidad kualker ke seya el motivo de esta imigrasyon oy bive en Israel la mayoriya de los djudyos turkanos ke se pensa kon sus desendientes sabras a kaji de 100000 personas.


Yenos de la tradisyon ’kayades’ ke eyos pratikaron en sus payis de orijin, en Israel no se enteresaron muncho a la politika interna en kedando i aki kayados, ma esto no kere dizir ke no dieron elementos de valor a la sosieta israeliana. La Asosiasyon de los Turkanos (Itahdut Yotsei Turkiya) grasyas a sus dirijentes aktualos se repertoriyo la liste de munchos de eyos, ke espero ke se publikara en serka. Ademas grasias a esta asosyasyon yena de ardor de sus kolavoradores, los muevos olim de Turkiya todo no siendo numerozos son resividos kon brasos aviertos i ayudados de toda manera en la prosedura de sus establisimientos. Aktualmente no keda ke mas ke 12000 djudyos en Turkiya, donde una grande partida de la manseves no keryendo ser el ‘museo’ de esta vieja komunidad se egzila kuando lo pode i entre eyos ay munchos ke vienen a azer sus estudyos en Israel. Ayudarlos será muestro dover.

Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page