AEROPORTO SERRADO, PAYIS PRIZYON!

(Teksto-Odio)

(Yazarı sesli dinlemek için tıklayınız)

Si, keridos lektores no meldadesh yerrado, el aeroporto de Ben Gurion esta serrado sovre el orden del governo fina el 21 del mes, dia de alhad venidero a todo modo de trafiko aeriano. Ansi no es permitido a dingun pasajero de viajar. La dechizyon de serrar el aeroporto krea un grande ‘balagan’ a los israelianos i los estranjeros vijitando Israel de poder revenir o retornar a sus payizes. Un muevo jenero de prizon ke kree una konfuzyon jenerala al seno del payis.

Israel por mo del Covid-19 no permete dezde el empesijo del anyo a dinguna kompaniya aeronotika estranjera de trayer o yevar pasajeros , obligasyon ke fue impozada mizmo a la kompania nasyonala El Al. Solos los aviones de kargo poden aterijar porke son esensyal para la ekonomia del payis. Ademas Israel serro kon kavenado las frontieras kon Mistrayim i la Jordania lo ke mos da el sentimiento de bivir en una prizyon avierta debasho del sol. Ke va ser de la povlasyon obligada de viajar por razones de famiya o de ofisyo? Miles se están keshando de este estado ke los impide sea de tornar al payis o sea a los etranjeros de ir atras a sus lugares. Kon ke derecho Israel impide a los turistos o a los ajenos ke vijitan famia en Israel de no poder salir del payis. Munchos akuzan esta aksyon i mizmo kondanan el establisiemento israeliano de komportarse kontra de los derechos umanos .

La industria turistika en jeneral mostra su deskontentes a esta serradura ma su lobi no fue i no es kapachi de konvenser la otoridad del payis para a lo manko, de mirar de aflocharla un poko . Los ministros ke azen partida de la komisyon Covid-19 diyas enteros diskutan sin muncho meterse deakordo sovre la situasyon ke decha una munchisima djentambre en difikuldad de no poder viajar.

La sola ves, la semana pasada ke se permityo a un avión de aterijar fue el del primer ministro grego Kyriakos Mitsotakis , el kual vino a afirmar un akordo de turizmo entre Israel i la Gresia. En el poko tiempo ke estuvo en Yerushalayim se avlo de las kondisyones de los israelianos ke keraran pasar sus vakasyones en Gresia. Todos los ke izyeron sus dos achlamas(vaksin) i ke resivieron la karta vedre poderan ir sin difikulta a este payis ke los resivera a brasos aviertos. A esta okazyon el ministaryo del turizmo israeliano publiko la lista de los pokos payizes onde los israelianos poderan ir a vijitar. Ahueara de esto por las oras los israelianos no poden vijitar ni la Evropa oksidentala, ni los Estados Unidos i ni mizmo los payizes de Golfo persiko ,India i mas. Komo se save, los solos kaminos para vinir i ir de Israel es el espasyo aeriano i la mar. Ma komo se defendyo a las naves del turizmo i a las barkas privadas de aserkarse de las kostas israelianas todo el trafiko marítimo se limito solo a los vapores de komersyo.

Kualo va ser de los israelianos ke kedaron achunkados en Dubai? No se les permete de retornar antes de la fin de la semana vinidera mizmo si tienen menester urjente de aboltar a sus kazas. Munchos ke peryeron un serkano o ke se les hazineyo gravamente un miembro de sus familyas están en la imposibilidad de poder atakanarsen para topar solusyon a sus imobilidad. Los pokos ke podyeron entrar al payis sufrieron la karantina de 15 dias en oteles ke fueron ofrisidos debaldes por el ministaryo de la sanedad ma koza ke no reusho por ke en estos oteles no egziste un servisyo adekuado de limpieza.

En kurto dizere estamos en frente de un ‘blokaus’ jeneral, ke dingunos de mozotros no savemos dezde munchos mezes kuando se eskapara malgrado ke la ashlama de la povlasyon kontinua sin arestarse. Se pensa ke verso la fin del mes de julio de este anyo el 90 por siento del puevlo israeliano será vaksinado. Esperaremos ke esto mos permetera de viajar ahuera del payis sin difikuldad, si entremientes el virus no mos aze un djugo malo i se kambya en una mueva manera danjoroza ke mos forsara a azer ashlamas muevas.

De otro lado la industria del turizmo lokal esta sin echo dezde un anyo. Se espera ke los oteles serrados se avriran verso la fin de este mez al publiko israeliano, porke oy en dia ni en Elat ni en el norte del payis no se pode alkilar kamaretas. Solo los patrones de los’zimmer’ poden alkilar sus kamaretas a partikulares los kualos no devran ser muy nombrozos a bivir en estas kamaretas anchas.

Tal es el estado aktual en el kual mos topamos. Si los dirijentes del payis purfian de alejar la burokrasia i mostran un poko de koraje a alivianar la prosedura de defendensya de viajar, va ser una koza ke el puevlo de Israel será pronto a aplozar.