UN MOMENTO & EN EL FONDO DEL TIEMPO

UN MOMENTO

Un momento avagarozo Pasa de una ventana a la otra, Va asigiendo mis ojos fiksados En el espasio de la kamareta. El techo parese aserkarse, Va tokando mi puerpo hundido En la siya de paja. El eko de mis palavras mudas viene de una luz lonjana, se arrinkona entre solombras La cayadez kon maravia Va mirando. Mis oídos gritan penserios, Imajinando distansias. Alas de pasharos en dezorden, En boka de palombas preguntas: ¿Es posivle amar?

---

EN EL FONDO DEL TIEMPO

kuando la eskurrida kubrirá mi kara I la tuya I vamos a flotar en lo vazio O en los fondos kuviertos kon montones de tiempo, Ahí, muestro esprito Va kreser en kada letra i sinio, Va desbrochar komo un korriente de fuego, Va ensender palavras Piedridas entre medianas del tiempo. Estonses , muestros nombres Se van a gravar en los kaminos de sekreto I van a avrir las puertas de unión.