ORIENTASYONES MUEVAS

(Teksto-Odio)

(Yazarın yazısını sesli dinlemek için tıklayınız)

En mi arikolo ‘’despues de Manama’’ editado en esta plataforma, el anyo pasado avia eskrito:’ Ke lo keran bien o no, Israel es inevitable’ en el Medyo Oriente. Ademas ajusti ke después de las propozisyones sovre los proyektos amerikanos echos en la kapitala del Bahrein las kozas entre Israel i el mundo arabo vana trokar, se avlara dunke de una perioda de antes de Manama i de después de Manama, i ajusti: Bivir i ver …

Bien, estamos en la perioda de después i vemos kon grande satisfaksyon ke Bahrain i Los Emirates Arabos del Golfo rekonosieron a Israel de fakto. Munchas espekulasyones fueron echas sovre el rekonosimiento de Israel por otros payizes arabos, ma fin oy en dia no vimos rezultados. Kon esto, en la rejyon no pasa dia ke no vemos muevos dezvelopamientos politikos. Vos dare aki mi estimasyon sovre los dalkavos evenementos entre Israel i los payizes arabos vizinos.

El Libano: 30 anyos de inimista achakes del Hezbollah, de no avlarsan entre los governos direktamente, de tratar solo a traverso los reprezentantes de las Nasyones Unidas(UN) supito se desparesyo. Deklarasyones fueron echas ke las 2 partidas se van a renkontrarsen en el sityo de las fuerzas armadas del UN en el sud del Libano para diskutir del konflikto sovre las aguas teritorialas entre los dos payizes. Kada parte pretende ke el triangolo disputado onde se espera reservas de gaz le apartiene. Ken tendra razón por las oras no se save. Durante 6 mezes en la prezensya de los Estados Unidos las partidas esperan topar un compromiso. Kualo izo ke el Hezbollah no se deklaro kontra esta entrevista? Kon sus aksyones teroristas, esta organizasyon shiita kreada por el Iran mizmo en deklarandose kerer salvar la Palestina de la entidad sionista i de destruyir Israel i siendo miembro importante del governo libanezo alevanto los brasos i se entrego a la fayita del payis, kon espanto de ver un soslevantamiento jeneral del pueblo libanezo.

Ademas los Estados Unidos izyeron presión sovre los dirijentes kristyanos para ke finalmente el Libano se integre en el akordo de gaz de la Mediteranea oryantla i si se topa gaz en la zona en konflikto, ke eya tome su parte. De la boka del presidente de la kamera de deputados Nabih Berri antiisrael notaryo fue echa la deklarasyon ofisyal de la avyertura de las negosiasiones en yamando el estado djudio, Israel i no komo uzava a yamarlo ‘entita inimiga sionosta’. De su parte el presidente fransez Macron jugo un rolo importante para ke Beyrut aga konsesyones enverso Yerushalayim i parvino a konvenser todas las minoridades de este payiz. Ansi se puede dizir ke el Hezbollah después de la trajedia del porto de Beyrut i de la kriza ekonomika grave ke perdura en el payis, su fama peryo muncho de su popularidad. De tura ke sea.

Eske esto es una mueva manera de rekonoser Israel? El tiempo mo lo dira..

El Sudan: Munchos se demandan de ke el Sudan no deklaro fin agora su rekonosimiento de fakto de Israel, malgrado ke la prensa internasyonal deklaro este evenimiento komo iminente. Komo se dize ‘detrás de la puerta. La razón fue ke los demokratos amerikanos refuzaron de sakar de la lista de los payizes ke ayudan el terrorizmo, el Sudan. Esto era la kondisyon prinsipala ke el governo sudanezo avia demandado del sekretaryo de estado amerikano, para rekonoser Israel. 2 senatores importantes demokratikos Chuck Schumer i Bob Menendez refuzaron de achetar el akordo kon el Sudan visto ke el durante munchos anyos fue el payiz ke ayudo el terrorizmo musulmano en su territoryo. Achetar a kitar este payiz de la lista kere dizir ke las demandas sovre las indemnidades de la tragedia del 11 Septembre de las famiyas de las viktimas no se poden mas juzgar. No olvidar ke Bin Laden, Abu Nidal, el Hezbollah, el Djihad Islamiko i mas organizasyones semejantes fondaron kampos para entrenar terroristos. Todas eyas danyaron i danyan a la trankuilidad del Medyo Oriente, de la Afrika i mizmo de las Amerikas. Agora ke el Sudan se arepiente de darles lugar a estas organizasyones terroristas en su tyerra, refuzarle de kitarlo de la lista parese un poko estrano. Oy el payiz tiene muevos dirijentes amigos del oksidente, porke no darles una chans? Dire difisil de responder positivamente, malgro ke pretenden establisir una demokrasia. Ansi Israel deve asperar muncho mas, malgrado ke non ofisialmente las partidas están en kontakto.

f-35: Muncho tiempo, kaji 20 anyos tomo para planifiar este avion de kombate uniko, ultra moderno, muy karo kaji 100 milyones de dólares ke los aliados de los Estados Unidos están mirando de obtener. . El fue livrado por el produktor Lockheed Martin, después de las armadas de mar i aver de los Estados unidos(200) a Israel. Oy Israel es el solo a tener esta arma superiora en el Medyo Oriente. El komendo 50 aviones fermo i 25 en opsyon. Ya resiviyo 25 de eyos i kon los Estados Unidos es el uniko payiz ke los empleyo kontra sus inimigos kon grande reushita. Esta situasyon le da una superioridad de kualita ke dingun de los payizes de su doredor tienen. Israel en prinsipyo no kere peryer esta superioridad i dunke no esta kontente de ver ke el Katar,el Bahrain,los Emirates, la Arabia Seudita, la Turkiya están mirando de resivir lo. La Turkiya por el momento esta eliminada ma no los payizes arabos. Las otoridades militaras amerikanas miran de kalmar este sentimiento de duvda de los dirijentes israelianos por ke les aseguran ke los arabos mizmo si sinyan oy un kontrato no resiveran sus aviones antes de 2025 i meterán tiempo para poder usarlos. Ademas lo amerikanos limitaran la kuantidad para kada payiz. En vista Singapur, por echemplo, no resivera ke 4 aviones ma tiene una opsyon de merkar otros 8. Ken save komo serán las armas en 5 anyos i komo Israel mirara de defenderse! Ma el puevlo israeliano es akavidozo, kuando se trata de la defensia del payiz, toda mueva orientasyon politika-militar le da mirikiya!

Nota: Sovre mi dalkavo eskrita ‘Entender la vizión araba’, munchos lektores dieron sus opiniones, ken kon optimizmo i ken kon pesimizmo. Keriya responder a los pesimistos ke eskrivieron ke nunka se de ve azer konfiensa a los Arabos. Otro pretendyo ke la interperetasyon de la vizion no es justa. Les dire simplemente si no bivish en Israel i estash debasho de la influensa de la propaganda inimiga tenesh razón. Ma en Israel entendemos i konosemos muy bien la mentalidad araba i savemos komo interpretarla. Ademas muestros dirijentes aktualos no son buenachos i saven analizar las kozas. Esta eskrita fue el fruto de un lavoro echo despues de aver diskutado kon akademikos arabos ke no son muy amigos de Israel i ke lo ke les enteresa es la situasyon difisil de los payizes del golfo persiko en frente del Iran. Miri de darvos sus sentimientos, nada mas.